#عُزلة_السقر
البارت الثاني والستون
للكاتبة لبنى الموسوي
عِزةُ النَفسِ هيَّ تَقديسٌ لِلذاتِ ..
وَلا يُقدِسُ ذاتَـهُ إلا مَنْ عَرفَ قَدرَ نَفسه
فَـ تَرفعَ بِها عَنْ كُلِ ما يُقللُ مِنْ شأنِها
أو يحطُ من قدرِها
حتىٰ باتَ يَرىٰ جَميعَ الناس دُونـهْ .✍🏻
♡♡♡♡♡♡♡
عادي جدًا متوقعة هالخبر راح يوصل له بطريقة أو بأخرى لأن كنت متأكدة كلش زين ماكو شي يخص السقر يخفى عن السقر نفسه لذلك رسمت طريقته بالهجوم داخل مخيلتي قبل لا يتحقق على أرض الواقع وبديت استعد لمجابهته على أتم الاِستعداد وأجهز نفسي للدفاع عن نفسي بكامل العدة يعني أبدًا ما كان سؤاله عن موضوع يونس صدمة بالنسبة لي ، الشيء الوحيد الخيب آمالي كنت متأملة بجماعته يخفون عنه حقيقة الأمر على الأقل بينما يتجاوز مرضه ويرجع بالسلامة لأن حاليًا أقل توتر عصبي ممكن يؤثر على اِستقرار حالته الصحية وأكيد همَ أعرف الناس بهذا الكلام ، لهذا السبب أني مستغربة شلون وصلوا له الخبر بمثل هالتوقيت !
أمان : أني مو دألغي شنو هالتجاهل !
قدر : ليش تسألني وكأنك دتحقق وياية وهذه النبرة الغريبة البصوتك شنو معناها بس لا حضرتك دتشك بيَّ ! اِنتبه أمان الدتحچي وياها مو رخيصة من رخيصاتكم أني مرتك وإذا هيچ عادي تشك بمرتك لأن ما عندك ثقة بيها فجدًا عيب بحق رجولتك تخلي المو كُفء تشيل اسمك إلا إذا كنت رخيص مثلها !
أمان : منو جاب طاري الشك لغوة زايدة لتلغين أني سألت سؤال صريح وأريد أسمع جوابه منچ ومهما كان الجواب ما لچ حق تدخلين وياه للشقة وحدكم
قدر : ليش وين داخلة وياه للحمام مثلاً ؟ شنو أنتَ تتصور يونس عنده الشجاعة الكافية حتى يستخدم دهاءه بصورة تسمح له يتمكن مني ، أني قدر أمان وقدر ماكو رجال يگدر يلمس من راسها شعرة وحدة إلا إذا كان عديم شريف وبالغ الذكاء للحد اللي يگدر بخبثه ومكره وخططه الشيطانية يفوق ذكاءها وشدة نباهتها حتى يسيطر عليها ساعتها وياخذها بالغدر
ما أدري شنو حچى لإن اِرتفاع نبرة صوته بالصُراخ طغى على وضوح الكلمات وبعدها فصل المُكالمة ، نزلت الموبايل من أذني الاِتصال جارٍ لكن الخط هوَ المقطوع ، نهيته من يمي وصفنت على الشاشة
تمام بما أنهُ هسه أشغلناه عن موضوع يونس بنفسه نرجع نتصل حتى نصالحه مجبورين ليروح يصير بالرجال شي من القهر وتشيلين ذنبه قدر المُحتالة
حچيتها أخاطب نفسي ورجعت اتصل الجهاز مُغلق !
غمضت اكتم غضبي شلون هسه أوصل لهذا العنيد شكله راح يرد لي إياها ويقلب الطاولة عليَّ لصالحه
ضميت الموبايل بجيبي وطلعت ، صاحت بيبي وراية وين رايحة رديت هسه راجعة بدون ما اِلتفت عليها وغادرت القصر متوجهة للمصحة ، دمار موجود عند شغف طرقت الباب ودخلت شافني تفاجأ بوضوح أشرت له يگوم وطلعت تمشيت مسافة لنهاية الممر بس اِلتفتت صار بوجهي باوع لي بنظرة الاِستغراب
أنت تقرأ
عزلة السقر
Mystery / Thrillerفي عُزلتي مَعهم غاية والغاية تُبررُ الوَسيلة كُـنتُ أنويّ مُداوتَهم فَـ إذا بي أكتشفُ أنَّ خلفَ أمراضهم شِفائي وفي بُعدِهم سُقمٌ لا شِفاءَ بَعدهُ أبدا .. فَـ ما الحَلْ لو غادَرونيّ ؟ ضَيعَتُهم ضَيعَونيّ نادَيتُهم اِسمَعونيّ .. لا تَرحلوا ، قِفوا ه...
