عزلة السقر

البارت الخامس عشر

#عُزلة_السقر
البارت الخامس عشر
للكاتبة لبنى الموسوي

داخِلُهُ شَديدُ السَواد ، حَتىٰ أنَّـهُ لا يَعلَم ماذا يُريد
غَريبٌ في طَبعِـهِ وَفي مَزاجِـهِ مُمَيزٌ فَريد
إنَّـهُ مُشَفرٌ لِلغاية
وَفي شَفَراتِـهِ هُنالِكَ رِواية
فَـ مَنْ يَا تُرَىٰ لِـ فَتحِ تِلكَ الشَفَرات يُجيد ؟ وَبَطلُ حِكايَتنا غَامِضٌ عَنيد . ✍🏻
____________

- حذرتچ وأرجع أحذر ، من تحچين وياية اِنتبهي على نبرة صوتچ لأن الگدامچ ماله أمان ..

- أعرف مالك أمان ولا أني المتلهفة على الحديث وياك ويا ليت تغادرني فورًا لأن مالي مزاج لأي نقاش ..

- شنو سويتِ بالاِتفاق ؟

- أكو غبي مبلغك أني خارقة القدرة ومن أريد شي بس اگول له كن فـ يكون !!!

- يعني ما رحتِ للمقر ؟!

- رحت ، وأعرف بيك مراقبني وتعرف رحت بس يوم واحد مو كافي حتى أنفذ لك التريده ميحتاح لها ذكاء

- دتلعبين بالنار ، واللعب بالنار خطر على الأطفال ..

- أمان .. تنهدت بـ قلة صبر : حل عني وكل شي طلبته راح يصير بس محتاجة وقت بسيط حتى لا أنكشف

- ماشي وراچ مثل الظل ، نشوف وين توصل وياچ ..

- الله كريم ..

اِستدار يغادر الغرفة اِقتحم عطره أعماقي ..

- عطرك ..

نظر لي بـ اِستفهام ..

- نعم !!

- عطرك هذا غيره واترجاك مترش منه بعد طالما أنتَ موجود داخل المصحة ..

- السبب ؟!

- يامن تعرف عليه وأخاف يشك بالموضوع إذا صارت وتقابلتوا صدفة .

رفع كفه تلمس بيه لحيته واِبتسم بـ نظرة حقيرة ..

- وشلون تعرف عليه ؟

- بالطريقة نفسها التتعرف بيها على عطر أختك ..

- مو هذا قصدي ..

- تفرها عليَّ أفرها عليك لذلك من الأفضل تلزم لسانك حتى متسمع مني كلام يمس رجولتك ويغضب رب العالمين

- تمام ، ما راح أغيره ..

- تغيره ، مجبور تغيره وإلا مستحيل تتخيل شنو ممكن يصير لك قبل ليصير لي إذا عرف يامن بالموضوع !

رفع عينه على السقف بـ طريقة مُستفزة ..

- تخيلت .. ثنى طرف شفته : عادي

- زين ممكن تصعد لي اللفل شوية وتتخيل أختك شغف متزوجة واحد ميسوه ومن دون علمكم ؟

رجع رفع عينه مبتسم بـ حقارة ..