عزلة السقر

البارت العاشر

#عُزلة_السقر
البارت العاشر
للكاتبة لبنى الموسوي

أنا أخوضُ مَعهُم حَربًا مُعاكِسة ، حَربٌ شَرِسة
سِلاحيَّ الفِكر ..
وَسِلاحهم الأنَـفة ..
أنا أُحاوِلُ الخُروجَ مِنْ هٰذهِ الحَرب كاسِبةٌ لِـ وِدِهمْ
وَ هُمْ يُحاوِلونَ الخُروجَ مِنْ هٰذهِ الحَرب تَارِكينَ خَلفَهم عَداوةٍ وَبغضاء بِـ أقصىٰ ما عِندهم .✍🏻
_____________

وصلت للمغاسل سمعت رسول يئن ، طرقت الباب مرة مرتين بعدها صحت رسول راح أدخل ؟ من مجاوبني اضطريت أفتح الباب وأفوت بدون ما أنتظر الإذن منه

واگع بالگاع الدم مخضب لحيته والمغسلة مكسورة يمه

اسرعت ناحيته، رفعت راسه من الأرضية بصعوبة رغم قوة بدني إلا أنهُ ضخامة جسمه تفوق قوتي بـ كثير

- گوم رسول اترجاك ساعدني لتنجلط ضغطك صعد

- بس اِنتظري لحظة ..

حچاها بـ ملامح عبوسة يحاول يتمكن من الحركة ..

- شبيك بـ شنو دتحس ؟ رجلك متشنجة يعني !!

هز راسه بالإيجاب ونصى عليها كاتم وجعه بصعوبة ..

- المغسلة السبب مو ؟؟

- اي ، دخت فجأة ردت أسند نفسي عليها وگعت بيَّ .

- زين انطيني إيدك أني أساعدك تگوم ..

حچيتها ولزمت كفه ، عدلت گعدته و أخيرًا ، مجرد ما اِستقام بجسمه صار الدم يتدفق بـ غزارة ، ثبتت ظهره على جدار الحمام وطلعت بـ عَجلة جبت علبة المناديل ورجعت لگيته فاقد الوعي تقريبًا ..

جثيت على رُكبي يمه ، سحبت راسه ثبتته بـ مستوى الرقبة والعمود الفقري بـ وضع مستقيم وبديت أمسح الدم وأني أحاول أجبره على اِستنشاق العطر الموجود على معصم إيدي بـ وقت واحد ..

الحمد لله فاق بعد ثواني ضئيلة ، اِنتظرته شوية حتى يستعيد وعيه بالكامل بعدين نهضت دأطلع أصيح يامن يساعدني لزم كف إيدي بـ قوة ، منعني أتحرك

- وين رايحة ؟؟

- أبلغ يامن بـ وضعك علمود ناخذك للمستشفى ..

- ميحتاج صرت أحسن ..

- شنو صرت أحسن !! أنتَ شايف حالك شـ صاير بيه

- قدر اترجاچ لتجادلين هواي ، كافي عليهم مصيبتهم ما عايزين تشغليهم بيَّ ، هذا أني گدامچ بخير وعافية

- زين گوم أني أخذك بس ساعدني وأوگف على حيلك

- ما أريد مستشفى ..

حچاها وثبت كفوفه على معصم إيدي ، سندته بسرعة عانينا بشكل مينوصف يلا گدر يستقام بوگفته

ردت أخذه لـ غرفة يامن رفض ، نومته بغرفة الضيوف وقست له ضغطه مو بس صاعد مفول لو ما الله ستره ونزف خشمه دم كان اِنجلط الرجُل لا مُحال