عزلة السقر

البارت الأربعون

#عُزلة_السقر
البارت الأربعون
للكاتبة لبنى الموسوي

خَسارَتي أمامكَ اليَوم هّوَ اِنتِصاري غَدًا
لا تَعتَقدْ أنّني هُزِمتْ
أعلَمْ أنَّـهُ لا ضَيرَ إذا إنكَسرَ غُصنُ الشَجرَةِ في مُواجَهةِ ظُروفْ الرِياح القاسِيةْ
فَـ ما زَالَتْ جُذورُها المُتفَرِعةِ مُمتدةٌ في عُمقِ الأرضْ
سَـ يَنمو ذَلكَ الغُصنُ المَكسورِ مِنْ جَديدْ
لِتنطُقُ أوراقُها الوعدَ وَتَفي أشواكُها بِالوَعيدْ .✍🏻
꧁꧁꧁꧁꧂꧂꧂꧂

وقفت بمواجهته مثل التمثال سكينة الأجساد تُعاكس الحرب الشرسة للأرواح، الهدوء مو دائمًا يعني السلام أحيانًا يكون تمهيد لثورة عارمة تكتسح الأعماق لتدمر الأنفُس وتُخلف الخراب فَـ يصبح المرء منا إذا ما خاض غمارها في عدادِ الموتى وإن اِستمرت عندهُ الحياة

بتلعثم الحروف وتمتمت الكلمات تساءلت والرجفة جدًا واضحة بنبرة صوتي شلون وعن طريق منو وصلت له هذه الصور لكن بطريقة مُفاجئة وقبل لا أتمم سؤالي صرخ بيَّ صرخة قطعت مسرى الدم بجسمي حتى يطلب مني بعدها الكف عن قول الأكاذيب ومواجهته بالحقيقة الكاملة من دون زيادة ولا نُقصان

قدر : ممكن تهدأ شوية حتى اگدر اجمع الكلام واجاوب على كُل اسئلتك

يامن : اهدأ !
اي ليش لا شوفي هدأت ، أني هادئ هسه احچي

قدر : سابقتك للشقة .

حچيتها وغادرت بسرعة لو نبقى تنتاقش بالمصحة ما أستبعد يحرگها عليَّ وعلى البيها أخوية وأعرفه شگد ما طبعه هادئ بس من يعصب ميشوف بعيونه بعد، وصلت للشقة أحس الحرارة تطلع من خشمي غسلت وغيرت ملابسي دأسد الكنتور رن الجرس طلعت بخطوات عجولة فتحت له الباب ودخلته للغرفة حتى مبدئيًا ناخذ راحتنا بالكلام لأن اكيد هذا النقاش هوَ بعينه ما يُسمى بالهدوء الذي يسبق العاصفة، گعدت گدامه ضايعة من نفسي أحس العقل توقف تمامًا عن التفكير لدرجة عجزت أعرف بأي طريقة أفتح الموضوع وياه ومن أي نقطة ابدأ الكلام وأني على يقين تام كل شي راح يسمعه مني راح يكون بمثابة الصاعقة التنزل على راسه من بعد سنين طويلة من الثقة العمياء بيَّ وبتصرفاتي، الخذلان شي صعب جدًا وللأسف أني خذلت أخوية حتى وأن كان هذا الأمر خارج عن اِرادتي لكن تبقى النتيجة واحدة سلب الثقة ممن لا يستحق سوى الثقة لتصبح أيام حياتي المُثمرة بسخطه واِنعدام عطاءه شحيحةٌ عِجاف

متقابلين بالجلوس على السرير بيني وبينه مسافة قدم رمى لي بيها الصور بحركة تعبر عن شديد سخطه وحد من نظرته عليَّ ينتظر مني البدء بالتبرير

باوعت عليه بثبات وقررت بحزم ما زال عرف إذا صار الوقت المُناسب أعترف بالحقيقة من دون لف ودوران أحسن ما اظل خايفة بعدما يمر الموقف بسلام ويرجع يكتشف كذبي من جديد هذه أولاً أما ثانيًا كشف الحقيقة أمام يامن من صالحي حاليًا بغض النظر عن نتيجة هالفعل لأن هوَ حاليًا العقبة الوحيدة بطريقي لإتمام مُهمة الثابت وبزوال هالعقبة تزول العوائق ولو أعرف كشف المستور راح يكلفني الكثير لكن صبرًا