عزلة السقر

البارت السادس

#عُزلة_السقر
البارت السادس
للكاتبة لبنى الموسوي

عُزلَتي مَعهُم مُختلِفة لِلغاية ..
إنَّها أشبهُ بِـ المَريضِ الَذي دَخلَ في غَيبوةٍ سَريرِية
فَـ علىٰ الرَغمِ مِن وِجودِ الكَثيرِ مِنَ البشرِ حَوله
إلا إنهُ لا يَستطيع مُخالطتِهم وَكأنهُ إتخذَ مِنَ العُزلةِ مَهربًا للتخلُصِ مِن أوجاعِه .✍🏻
____________

انصدمت من تصرفه بـ شكل !! اي نعم اعرف هوَ گاعد يحاول يبعدني عنه بـ مُختلف الطرق لكن نهائيًا ما اجى على بالي يستخدم هالطريقة المتليق بيَّ على الأقل

كان رد فعلي على تمرده أكبر من أن أرفع كفيني على صدره حتى أبعده عني .. لذلك نزلت إيدي بـ كل هدوء من تحت الـ بلوز الـ مرتديه و انطيته ذيچ الگرصة السمانية الناتجة عن صبري الطويل اللي كان ولا زال المصدر الوحيد للسيطرة على إنفعالاتي و كتم غضبي عن كل تصرف يصدر من هالرجُل غريب الأطوار

مجرد ما إبتعد متألم لكمته بوكس ..
على أثره بصق الدم من حلگه على الأرض مباشرةً

لعبت نفسي أكثر ما هيَّ لعبانة .. إندار عني بـ لا مبالاة متوجه للحمام يغسل وجهه من الدم والحمرة الملئت شفته ، تقدمت بسرعة أخذت شريط المنوم وغادرت

صار يامن بـ وجهي توه طالع من غرفة عِناق ، ما عندي طاقة اتحرك بقيت واگفة بـ مكاني هوَ تقدم عليَّ ، بس وصل لونت الإبتسامة ملامحه من مظهري الكوميدي

- هذا منو المسوي بيچ هالشكل ؟!!

- لتسأل ما عندي جواب حاليًا ، المهم البنات شلونهن

سحب علبة المناديل من جيبه .. قدم لي إياها

- امسحي وجهچ بالأول بعدين نحچي

-لا يمعود هيَّ مال كلينكس غير يصير خريطة
لازم اروح أغسله الماي هوَ حله الوحيد انتظرني راجعة

- ليش هوَ بعده ما صاير خريطة ؟!! والله ضحكتيني

- ها بدينا تصنيف ، عادي يعني إذا تحب أذكرك باليوم السوالك المريض فتحة هوائية بـ بنطلونك وأنتَ تمشي بـ زود ولا تدري شديصير وراك ، تذكر زين لو ما اني كان صرت مصنفة لكادر المصحة ومرضاهم

إلتفت على جوانبه .. يراقب إذا اكو شخص قريب من عندنا وراها تقرب من مسامعي حچى بـ همس :

- الستر حلو بلوة عمري

- گول لنفسك بالأول

- يلا يلا روحي غسلي بسرعة ليجي واحد يشوفچ بهذا المنظر وبعدين گولي عود يامن ما ستر فضيحتي

- ناس متجي إلا بالعين الحمرا

بس حچيتها ضحك بـ صوت عالي ، ضربته على زنده ورحت للحمامات غسلت ورجعت له بعده واگف بنفس المكان دينتظرني من وصلت يمي سحب منديل من العلبة ومسح وجهي من الماي بـ يده .. إبتسمت