عزلة السقر

البارت السابع عشر

#عُزلة_السقر
البارت السابع عشر
للكاتبة لبنى الموسوي

كُنتُ أنظُرُ لِأَعْيُنِهِمْ الَتي تَتَأَلَمْ ،
وَعَنْ ما في دَاخِلِهِمْ تُحاوِلُ بِالصَمتِ أنْ تَبُوحَ وَتَتَكَلَمْ
حَتىٰ سَألتُهُمْ ذَاتَ مَساءْ ..
ما الَذي يَجعَلُكُمْ تَقبَعونَ في حُفَرِ الأَوهَامْ ؟!
أجابَوني بِـ تَرَدُدٍ وَ تَلَعثُمٍ : لَـ رُبَما الخَوفُ مِنْ نُطقِ الكَلامْ .✍🏻
______________

- غريب !!

- اي نعم غريب ..

دق ناقوس الخطر بـ راسي : غريب المُتخفي من أيام وليالي طويلة مُستحيل يظهر نفسه للعلن تحديدًا لشخص يُعتبر سائل عابر مجهول الهوية مثلي تمامًا وبمنتهى السهولة والسلاسة إلا إذا كان طرف ثالث هدفه من هذا الفعل اللعب بـ اِسلوب المكر والخديعة على الحبلين !

تحمحمت ، خلعت المناظر وسندت جسمي على بنيد السيارة مبتسمة بـ اِستنكار ..

- بس هذا أبدًا مو صوت غريب اللي أعرفه !!

- ليش حضرتچ من وين تعرفيني ؟!

- يعني همْ تريد تتوهني عن صوتك و همْ أنتَ نفسك تائه عن صوتي ، إذن الگاعد يكلمني مُستحيل يكون غريب ..

- وهوَ منو غريب ما أعرف أحد بـ هذا الاسم ؟

- قبل دقيقة گلت أني غريب !!

- يعني متصلة علي من رقم دولي غريب ! معناها أنتِ غريبة وآنة غريب ..

- هاا هيچ الحچي صار مثل لعبة الغُميضة !!

- هسه غير تگول هيَّ منو ..

- مو قبل لا أعرف أنتَ منو ..

- تحچين لو انهي الاِتصال ؟؟

- ما راح تنهيه قبل لا تگول لي أنتَ منو وغريب وين ؟

- يابة دروحي ..

حچاها بـ ضجر وغلق الخط بوجهي : مو مشكلة خلينا نشوف غيرك ما راح توگف عليك ..

- ألوو السلام عليكم ..

- وعليكم السلام ، منو وياي ؟؟

- عمو أبو عدنان ؟

- اي ، منو أنتِ !

- أريد توصلني بـ غريب إذا ممكن ..

سكت لـ ثواني وسكوته المُفاجئ اِعطاني اِيعاز بـ وجود تخطيط فوري لمحاولة سريعة في المراوغة بالكلام ..

- غريب شيني ما جاي أفهم عليچ ؟!

- ما معقولة ما تعرف غريب !!

- غريب يعني واحد اسمه غريب لو شيني قصدچ ؟

- اي نعم ..

- واحنا ما عندنا واحد بـ هذا الاسم ، أكيد متوهمة ..