💫💘 العار 💘💫

💓 الحلقة 1...💓

💫💘💫

☄️ #البداية...☄️

الشمس قوية حارة و سيركيلاسيون واقفة و كرهبتو رغم الكليماتيزار الا أنو حاسس روحو بلحق مخنوق ، طقس هذا يكرههو ، ما يحملوش ، مولود في الشتاء و يحب الشتاء و المطرة ، يحب النسمة الباردة  و الجو هذاكا  الكل ، يكره الصيف و حكاياتو  ! سرح و هو يستنى في الضوء الاخضر باش يكمل ثنيتو ،  يخمم في الي صارلو  و  ينعل في الكلب الي اعطاه الثيقة و في اخر دقيقة جبد بيه ، حتى هو ما يترباش من الثيقة  ، من وقت ما صار فيه مع نورهان ، حلف الثيقة لا ، لا للانثى و لا للذكر ، أما في بالو ميلود غير ، ميلود  فرخ صغير مزال كيف تخرج و كان قراي بارشا ، ما حبوش يضيع مستقبلو و يدخل في سيناريو الزطلة و الفساد  كيف بارشا اولاد من حومتهم ، هذاكا علاش خلاه يخدم معاه و دخلو في دولاب الخدمة و في مدة قصيرة علمو كل شيء على خدمتو ، ما فيبالوش باش يبيعو و يمشي يتحامى في عدوه ، أما مايسالش باش يكون كيفو كيف غيرو ، الي يغلط الكل يخلص مهما كان ! و يا حسرى منين كان يغفر و يسامح ، تو الي يرشو بالماء يرشو هو بالدم !
فاق  من سرحتو على التاليفون ينوقز ،  هز  يتبسم !
_اهلا بالعم ! وينك !!
_الحمد لله. أما بربي لا عاد تقولي عمي و العم ، تكبر فيا يهديك ، اش بيناتنا أنا و أنت ، أنت في ال40 و أنا في 50 سنة .
تبسم و هو يسمع فيه ! عمرو 67 و يصغر في روحو ديما هههه!
_القدر يا عمي ، القدر هو الكل !
_يا سيدي ما تقدرنيش ، قلي المنجي ، سيرتو كيف يبدا معانا الجنس اللطيف ! ههههههه !
_هههه باهي يا عمي !
_زايد الحديث معاك و الله ! قلي توا اش عملت مع ميلود ! كيفاش باش تعمل في فلوسك و السلعة ؟
_السلعة رجعت سايي ، هاي في الثنية للدبوات و فلوسي نحيها من عينيه ما تخافش ! الي صار كف ليا باش  عادش نامن المفرخة متاع توا  !
_موش حكاية تأمن و ما تامنش ، حكاية أنو هو طماع ، كيف لقى باب ما اكبر ، باعك في دقيقة !
_ما اكبر مني كان العالي يا عمي ، أنا مستقوي بربي و ماشي صحيح ، كلهم يلعبو في الاكحل ، كان أنا صفحتي بيضاء ما عندي مناش نخاف !
_كلامك  صحيح ، ربي ديما معاك !
_و نعمة بالله ! هابط للحومة اليوم و لا ؟
_اش باش نقلك ما نعرفش ، خلينا نبدلو اليوم نسهرو في وتيل و لا قعدة في دار واحد من الأصحاب !
_ما عينيش ، نحب نسهر في داري ، تعرفني ما نرتاح كان فيها
_ أنت سرتك مدفونة فيها ، عوض راك في الفيلا الجديدة و لا بورتمان  من بلاصك الجديد. ، شاددلي الدار هذيكا موش عارف علاش !
تنهد و هو يسمع فيه ، الدار هذيكا بناها ليها و فرشها على ذوقها ، كل حاجة فيها تخليه يحس روحو عايش  ، هي مشات و بقات اثارها فيها ، على هذاكا ما نجمش يخرج منها ، ما نجمش يسكن في بلاصة أخرى ، هذا  بخلاف أنو يحب حومتو و اولاد حومتو الي واقفين معاه و الي شطرهم يخدمو معاه و هو  ساكن بيناتهم ،محسسهم أنو منو فيهم ، جايبين مجهودهم معاه في الخدمة ! الشانطي متاع ستة شهور في اربعة شهور يوفاه و هذا الكل بيهم هم ! معمل عليهم و معملين عليه و ماهوش مقصر معاهم جملة وحدة ، الي يستحق العينة يلقاه الأول واقف معاه ، الي تصيرلو مشكلة يحاول يعاونو و لا يلقالو حل ، موش مفرط فيهم جملة و لا هم مفرطين فيه زادا !