💫💘 العار 💘💫

💓الحلقة 45...💓

💫💘💫

☄️ "يتغير الإنسان في حالتين :
إذا زاد وعيه أو كسر قلبه 💔..." ☄️

عندو مدة من الي فاق على وضعو ، من الدار للخدمة للجامع ، صلاة الفجر و المغرب و العشاء  ، هذوما الثلاثة يصليهم جماعة في الجامع ، و الضهر و العصر بحكم الخدمة يصليهم في الشانطي !
روح حكاية الاربعة ، وين يلقى امو مطبسة على البانو تغسل في الدبش !
طبس عليها و وقفها يتكلم !
_علاش هكا يا ميمتي ، موش قتلك خليلي تو نروح نغسل وحدي دبشك و دبشي ، تلهى بصحتك و دواك و اش عندك في الباقي !
تنهدت و هي تغزرلو ، هي زادا مشوية عليه و على نواره بنت الحلال الي كانت قائمة بيها كيف بنتها ، تكلمت و عينيها مدمعين ! يبقى المكتوب هو الي حكم !
_وليدي أنت تاعب في الخدمة ، تزيد تجي تتعب في الدار  ! هاني نتمرمد و باعد نرتاح !
_اللطف عليك ميمتي ! برا ارتاح في الصالة ، تو ندوش و  نبدل دبش الخدمة و نكمل أنا نغسل !
دوش و غسل دبشو  و مع اذان المغرب خرج شاد ثنية الجامع ، يقرا في دعاء في تاليفونو و يعاود يحفظ فيه ، ما عندوش ثقافة دينية ، أما حابب يتعلم ، كل مرة يحفظ دعاء ، كل مرة يتفرج على داعية و يفهم منو حاجات غايبة عليه !
شد الصف الأول و قعد يستنى في المصليين يتلمو ، جبد كتاب القرآن و حل صورة الرحمان ، وين وقف البارح فيها ! يقرا ما لاحضش الي واقف يغزرلو حاير فيه ، يغزرلو و قلبو واجعو ، فكرة انك تضلم انسان كبيرة بارشا , هو موش ضلمو كان هو ، هو ضلم بنتو زادا ، بنتو الي حاسسها ذابلة و ما فيهاش روح من بعد حكايتها معاه  ! ..
خرج باعد ما صلى راجع للدار ، يلزمو يحضر العشاء لامو باش تشرب دواها ، حتى هو في الدنيا هاذي حد غيرها ما يحبو و حد غيرها ما حاس بيه ! حتى نوارة توا ما عادش لايم عليها ، عندها الحق تختار اهلها ، الي ما عندوش اول ما عندوش آخر ! ...
دخل للدار ينادي على بنتو !
_نوارة يا نوارة وينك !
خرجت من بيتها حايرة ، مشات وقفت قدامو ؛
_نعم بابا لباس ؟
_لباس بنتي ، شد خوذ الفلوس هاذي و غدوة اهبط للسوق أنت و امك ، خوذ كسوة جديدة و كبوط للشتاء !
_مايسالش بابا ، خلي فلوسك تستحقها ، عندي كبوطي متاع عمناول ! و الكساوي مكدسة في الڨارد روب !
_شد خوذ , من وقتاش ترد على بوك ، كيف أنا ما ناخذش لبنتي شكون باش ياخذلك ! نحبك تأخذ الجديد كيف كل عام !
تبسمتلو و خذات الفلوس من سكات ، ما عاد حاليلها شيء ، اش تعمل بيه الكبوط و هي اصلا وقتاش تخرج من الدار و حتى كيف تخرج ، دوبها دوب العطار و لا الخضار  متاع الحومة !
قعد يغزر لبنتو ، حاسس روحو جنى عليها ، هي من الاول قد الطرف و اليوم زاد بيها الحال ، ضعفت بطريقة ملحوضة ، الحلو و البشابش  الي كانت تموت عليهم ، ما عادش يحركولها شعرة ، تفطر معاهم بالسيف و العشاء كل مرة تتسبب بحاجة باش ما تقعدش معاهم على الطاولة ، مسكرة على روحها ، ما عادش بنتو ضحكة الدار و كانو ضحكتها مشات مع ولد نزيهة !
نادى للمرتو للبيت ، مرتو الي دخلت و سكرت الباب !
_لباس يا حاج ؟
_لباس ! قلي ياخي نوارة مازلت تحكي مع ولد نزيهة ، مازال بيناتهم حاجة ؟
_ووه ووه يا حاجة ، أنت حلفتها على القرآن و تعرف بنتك ، وفات هاك الحكاية ، ربي يعوض عليها بولد حلال يهنيها و يفرحنا بيها !
تنهد و هو يسمع فيها ؛
_الطفلة حالفة كان ما تأخذ راجل غيرو ، ماكش تشوف في حالتها يا مراة ! كل يوم تزيد تضعف على الي قبلو !
_قعدت فوق الفرش بجنبو و تكلمت و عينيها مرغرغة !
_و شنية الحل يا حاج !
_تعرف ساعات نقول كان يعاود يخطبني فيها نعطيهالو و ساعات نقول خليها للمكتوب !
_توا هذا حديث يا حاج ، الطفل راو كان في الحبس ، ما يجيش !
_الطفل الي تحكي عليه كل يوم يصلي معايا الفجر حاضر ، زدت سالت عليه قالولي من الخدمة للدار للجامع ، يمكن غلط قبل و ربي تاب عليه !
_عاد موش نعطوه بنتنا ! الحق نحبلها واحد مرتاح ماديا و يهنيها..
قص عليها يغزرلها
_عمرو ما كان الهناء بالمال ، هاك شفت ضياء كيفاش طلع فكرو و كيفاش غلط فينا و هو رديتو لا مرة لا اثنين و ما سمعنيش كلمة عيب !
_ووه يا حاج ، يعني نويت تعطيهالو !
_و شكون قالك هو مازال حاشتو بيها ! ربي يسامحني كسرت خاطر بنتي و خاطر الي رايدها !
حطت يديها على كتفو و تكلمت بحنية كبيرة !
_خليها على الله يا حاج أي حد في بلاصتك يعمل الي عملتو ، ماكش غالط يا حاج !
سكت ، قلبو يعلم بيه كان العالي على الي فيه !