💫💘💫
☄️ "ضاقت علي كأنها تابوت 💔.." ☄️
روحت للدار بالسيف ، موش عارفة وجيعة قلبها رجعت على بدنها الي بكلو صبح يوجع ! اخيب احساس أنو تحس انو الدنيا الكل رافضاتك و تخلات عليك ، حتى صحتك زادة تحب تمشي و تخليك !
تعدت للدوش ديراكت ، مخنوقة خنقة كبيرة ، ماهيش منجمة تتنفس من الي تحس فيه ، غلطت و غلطت و غلطت ، ماهيش أول انسان يغلط في الدنيا هاذي أما هي حسابها كان كبير !
ما نجمتش تقعد واقفة ، دوش دارهم عربي ، هبطت قعدت في القاعة ، و الماء هابط عليها من الدوش ! لفت اكتفاها بايديها ، من يوم يومها ما عندها حد ، حتى الي يدخل في حياتها ، يا يخربها يا هي تخربلو حياتو و يبعد عليها أو تبعد عليه !
خرجت بالسيف ، المنشفة لافتها وشادتها خائفة لا تطيح ! لبست جبتها. طلعت للفرشها و تمدت ، هاربة للنوم ما عندهاش غيرو أكيد !
وصل هداية قدام الدار و شد ثنية الشانطي الجديد ، قلبو مليع ، من الي شافها و ضاهر حالها صعيب ، موش فاهم شبيها ، زعمة مريضة و لا فما شكون عمللها حكاية ! أه منها و من حكايتها الي ما حبتش توفى ! يا عمبو قلبو ، عوض يخمم في عرسو الي على قريب و في البنية الي ربط روحو بيها ، يخمم في نورهان , نورهان لعنتو الي ما وفاتش و ما نجمش ينساها !
هز التاليفون و طلبها ، الوحيدة الي باش يلقى عندها الأخبار الكل أكيد !
_الو صباح الخير !
_نهارك زين ، سي زياد ، اش حالك. !
_لباس يا نجاة ! قلي باش نسالك !
تبسمت و هي تسمع فيه !
_باش تسالني على نورهان !
سكت و هو يسمع فيها ، مكشوف عند الناس الكل و هذاكا الصحيح ، عارفينو مازال يحبها !
_قلي ياخي مريضة !
_صحيح مريضة ، وقت سمعت بيك خطبت طاحت و هزيناها للسبيطار ، مسكينة السكر طايح بارشا و الطبيب رقدها نهارين و قاللها ترتاح ، عندها جمعة شادة الدار !
قلبو عصر عليه ، تخنق و هو يسمع فيها ، يعني هو السبب في مرضتها ، أما هي اش قلقها موش عمرها لا حبتو ، عمرها لا حست بمحبتو ليها ! موش هي الي خلاتو و هربت مع غيرو ، اش مقلقها كيف يخطب و لا يعرس !
_باهي نجاة ، يعيشك ! تستحق حاجة كلمني !
علق التاليفون و يسوق و سارح ، لا قربها راحة و لا بعدها راحة ، مخنوق بلحق و موش عارف راحتو وين ! ...
هبط للشانطي و برد قلبو في الخدامة كيف لقاهم هزو بوز وحدهم و يركركو في التاي ! ...
واقف و يغزرلها كيف هبطت من كرهبة زياد ، قلبو تليع ، يعني عرفو من دون بنات الحومة الكل ما لقى كان هداية يخطبها ، هداية الي كانت العقل و الروح ! و مازلت حبو الوحيد !
خلاه ما تعدى و في دقيقة كان قدامها قبل حتى ما تحل الباب و تدخل ، لا همو لا بوها و لا امها كان يشوفوه ! و الي زاد قهرو أنو هي كانت تتبسم ، ضاهرة فرحانة بزياد و بالخطبة !
طلعت راسها ، تفجعت كيف شافتو ، في بالها طارق حكاية و تسكرت من هاك العام ! تكلمت و هي تكبس في صوتها ، ما تحبش ترخ ، هي حمدت ربي أنو نسات الي كان بيناتهم ، بخلاف موقف بوها منو الي رافضو و عرسهم مستحيل عندو ، هو وجعها بارشا و نسات بالسيف الي صار !
_اش تحب طارق ! تفضل !
_اش نحب أنت تعرف أنا اش نحب بالضبط ، فهمني هداية ! فرحانة بلحق بالخطبة و مقتنعة بزياد ! نسيت الي كان بيناتنا الكل هداية !
تكلمت و هي تحاول تكون طبيعية ، حكايتها معاه يوما ما كانت حياتها ، أما اليوم بدأت تتجاوز و فرحانة بحكايتها مع زياد ، زياد الي الف وحدة تتمناه !
_نسيت طارق ، نسيت و فرحانة ، ما عندي علاش نتفكر الي فات !
تبسم تبسيمة وجيعة و تكلم !
_علاش فرحانة خاطر خليت الي يحبك و خذيت واحد ميت فاني في غيرك ، حومة كاملة تعرف عشقتو لنورهان و الناس الكل تحكي أنو خطب توا باش يسكر حكايتو معاها و ينساها ، يعني ما خطبكش محبة فيك ، كان أنا نحبك هداية ، كان أنا !
يحكي بوجيعة كبيرة ، حبها و مازال يحبها و رغم زياد عرفو و صاحبو و يحبو بارشا ، أما ما في بالوش الوجيعة باش تجيه منو هو ، هو الي ياخذلو هداية و عينيه تغزر !
رغم وجعها كلامو و رغم متاكدة أنو جزئيا صحيح ، تكلمت و هي تحاول تتبسم !
_عادي تو ينساها معايا ، هاني أنا نسيتك ! تو ينسى هو زادا !
قالت كلامها و دارت داخلة وقت سمعت صوتو ، يحكي بلهجة حارة خلات قلبها يدق من جديد !
_انا ما نسيتكش هداية ، مازلت نتنفس فيك ، مازلت نقوم الصباح و كلي أمل يطلع فراقنا منامة و منها نفيق ! مازلت نحبك ، ما تغلطش ، ما تعرسش بيه ، موش باش يحبك كيفي و لا باش يفهمك كيفي !
تكلمت و هي تسكر في الباب في وجهو !
_انت عمرك لا فهمتني ، حبيبتي ممكن أما وجعتني اكثر من الي حبيتني ، و محبتك الي بكلها وجيعة ما حاشتيش بيها ، ما حاشتيش !
دخلت وسكرت الباب ،خلاتو واقف في بلاصتو ، قهرتو و قسمتلو قلبو ، ما عندوش زهر معاها جملة ، كل وين يقول هاي بدات تلين تطلعلو بطلعة جديدة ، أما حكاية زياد المرة هاذي موش تفذليك ، كان ياخذها هو يموت ! يموت و لا يقتلو و يقتلها و يقتل روحو أكيد !
_اطلع نوصلك ، راجع للحومة بطبيعتي !
_يعيشك معلم !
_بيناتناش ! الوالدة لباس عليها !
_الحمد لله ! الكبر و زاد عليها دخلتي للحبس ، كان موش أنت رحمتني و دخلتني نخدم معاك راني لتوا بطال !
تلفتتلو و ربت على كتفو و تبسم !
_عندي نضرة في الناس ، أنت راجل و تستاهل الخير ، و كيف ما يقولو ياما في الحبس مضاليم !
_مضلوم و الله يا معلم مضلوم ، صغير و لعبو بيا كيف ما حبو !
_هذاكا حال الانسان ، كل حد كيفاش يجيه الابتلاء ! و شكون لاهي بيها الوالدة ، قلت عندها القلب و الدم !
_بنت جيرانا ، حاسبتها كيف امها و اكثر ، كل صباح تجيها ، بنية متخلقة و حنينة ، تعرف مشى في بالي ماعادش فما بنات كيفها ..!
يحكي و سهى أنو قاعد بجنب عرفو ، من كثر ما عاجباتو نوارة و حس روحو تعلق بيها ، و زياد خبرة في الحب و يشمو من بعيد ، تلفتتلو يتبسم !
_وقتاش نمشو نخطبو مالا !
عينيه وقفت و هو يسمع فيه ، تخلوض و دخل بعضو !
_خطبة شنية معلم !
_خطبتك أنت و بنت الجيران ! اذا عاجباتك و باهية مع ميمتك و عارفة وضعك و ما فيه اش تستنى باش تدق الباب و تدخل على اصولو !
طبس راسو و تكلم !
_زعمة تقبل بيا ، و لو قبلت بوها باش يوافق ، امام جامع يعطي بنتو لفار حبس !
تلفتتلو باعد ما كان مركز مع الضوء الاحمر الي شعل !
_اش عندك في بوها ، ساعات الناس الكل تبدى راضية على علاقتكم الا الشريك في حد ذاتو ، و وقتها أول ما تجيه فرصة مع غيرك يمشي و يخليك ، و ساعات يبدى متمسك بيك لدرجة يخلي الدنيا الكل و يجي معاك ! أملى يدك منها هي و شوفها و أنا نعاون خويا ، و الله موش خاطرك ولد حومتي يا محمد امين ، أما خاطرك صافي و نضيف ! و هذا شفتو في المدة القصيرة الي خدمتها معايا !
تبسم و هو يسمع فيه !
_كيفاش نشوفها ، نحكي معاها ؟
_اي احكي معاها الأول !
_هي متدينة و حشامة و عمرنا لا قعدنا رأس رأس باش نحكي معاها !
تبسم و هو يسمع فيه !
_اخلق أنت الفرصة و اقعدو رأس رأس و احكيلها ، حتى دقيقة من زمان ، باش تعرف موقفها و احساسها !
تبسم و جاوبو !
_ان شاء الله !
حطو زياد قدام الدار و كمل ثنيتو ! جبد المفتاح من جيبو و قداش فرح كيف سمع صوتها ، في العادة تجي كان الصباح و اليوم هاي صباح و عشية بحذاهم !
دخل و تكلم !
_السلام !
طلعت راسها و غزرتلو وقت جات العين في العين تبسملها ! طبست راسها و قلبها يدق ، ما تحبش تصدق أنو يتبسملها أو يغزرلها باعجاب ، ما تحبش تحلم و تفيق باعد على انها منامة !
ردت عليه بصوت ضعيف و وقفت باش تروح !
_و عليكم السلام ، نخليك توا خالتي نزيهة !
تكلم و هو يغزرلها ، يحب حتى إشارة منها فقط باش ينطق الي في بالو !
_انا نجي و أنت تروح ، تقولش غول ، للهدرجة نخوف !
تبسمت و تكلمت !
_حاشاك ، قلت نخليك على راحتك !
_عمرك لا قلقتلي راحتي ، بلعكس !
طلعت راسها و غزرتلو وين تبسملها من جديد ، يا و الله حكاية ، قلبها باش يطير ، زعمة صحيح اللي تحس فيه ، عندو احساس ليها ؟
✴✴✴✴
مولد نبوي شرييف البناات🕊️🎊
انشالله ياا ربي ينعااد علييكمم بالخييير و الصحة🎊🤍🕊️
احكوولي كيفااش تعداا نهااركمم🤍
طيبتواا العصيدة😉
نقلكمم حااجة علياا اما مناكلش العصيدة منحبهااااش 😂😒
يلاا نرجعوااا تو للكروو متاعنااا 😉
شرااايكم فالمفااجئة 🤍
طااارق و هداااية طللع عندهمم ماااضي مع بعضهمم 😉
شنو تتصورواا طاارق يععمل بعد ماا سمع بخطووبة مديروااا من الطفللة الي يحبهاا 😍زعمااا يفضح الي بينااتهم ولاا يسكتت🔥💥
و اخيرااا نوارة و محمد طلواا علينااا😘
زعماا شنو يستنى فييهم 💓
و كيفااش بش تكوون علاقتهمم 💕
انشالله تكون عجبتكم الحلقة 💗
و استمتعتواا بيهاا برشااا❤️
بربي تفااعلواا شويااا لبناات 🥺
بلحق غاايضتني الكروو خااطر هي مزياانة وانتم مش تعطييو فيهاا في حقهااا😓
و متلووموش علياا كيف منهبطش😐
خااطر لحقيقة فماا فيكم الي ميستااهلش😒
ربي يخليلي بنااتي و حباايبي الغاليين😘
الي ديماا يتفااعلواا معاياا😘 و يكتبوولي في اراءهمم 😘
و يتفااعلواا معاياا و نحكييو😘
و االبااقي الله يهدي🙂
الحااصل منغير منزيد نطوول عليكمم😍
تنسووش الجااااامممم و اراااءكمممم حبااايبي 🥺🙏🤍
ليلتكممم زيينةة و نحببببببكمم و نبوووسكممم وحدة وحدة ♥️❤️
أنت تقرأ
💫💘 العار 💘💫
Romanceبنوتااتي 😍نفتتحواا كرونيك جديدة من اعز ما تقرااو💕 حكاايتها متأكدة بش تعجبكم 😘و بش تعيشوا معها لحظة بلحظة🤍 و بش تغوصواا في احداثها ♥️ومع كل حلقة بش تزيدوا تتعلقوا بيها🥰 و كيما تعرفوني منودكم كان بالحاجة الممو و الباهية🥰 اقراوها و نش بش تندمواا...
