💫💘💫
☄️ "التلميح بالحب أجمل من الإعتراف به.." ☄️
ماهوش مصدق أنو اخيرا ولات حلالو و أنو اليوم كتبو الصداق !
غطى امو و دخل لفرشو و طلبها ، وين هزت عليه بالوقت تتبسم !
_نوارتي !
_محمد امين وينك !
_كنت ميت بالحياة و كيف رجعتلي حييت من جديد !
_اللطف عليك ! الحمد لله غصرة و تعدات !
_غدوة العشية نشوفك ، و وحدنا زادا ! توا كتبت الصداق ما نتصورش عمي حمد و لا خالتي جميلة يعارضو في الحكاية !
تبسمت و تكلمت بصوت واطي !
_ان شاء الله ! ما نضنش يقولو لا !
علقت التاليفون باعد ما قعدو يحكيو يجي ساعتين ، متوحشاتو و متوحشها و ربي عالم الي في قلوبهم !
خذالها كوفري بارفان و ديو كادو الصداق ، لو بايدو ياخذلها اكثر ، حتى الذهب رضات بالبسيط و ما تشرطتش عليه ، خاتم و براسلي فينو ما فيهمش هرج زايد !
هي بالنسبة ليها هو مكفي و موفي و الدنيا تاقف عند غزرة من عينيه !
ما حاشتهاش بالمديات ، قد ما حاشتها بيه ، القلب حكم و هي أول مرة تحب ، هو زادا حبها و تبلى بيها و ربي نضرلو بعين الرحمة و كتبها ليه !
فاق الصباح اليوم كونجي بحكم أمس كتب الصداق ، فيق أمو , امو الي توا تهنات عليه ، مراة صالحة و انساب باهيين ، لو تطيح بيه الدنيا باش ياقفو معاه !
_اش نعملك فطور الصباح ؟
_لا ما تعملي شيء ، نوارة باش تجيني شوية أخرى كيف العادة ، ايييه الحمد لله رجعت هاك الايامات ! عييت من القهاوي الماسطة في الصباح و البرودو الي تطيبلي فيه في نصف النهار !
تبسم لامو و ضحك بالصوت !
_نستاهل يا نزيهة ، نستاهل !
_ايا برا اخرج الطفلة عدك بيها جات !
_و علاش نخرج امي ، نسيت راني كاتب الصداق !
دلوحت راسها و تكلمت !
_خاطرك كاتب الصداق أخرج يا ولد الحلال !
تبسم و خرج.
دخل لبيتو يبدل في دبشو وين يسمع في الباب يدق ، عرفها نوارة حياتو ، خرج يجري حللها الباب يحكي و يتبسم ،
_صباح الورد ، تبرمج أنت و حماتك و أنا اخر من يعلم !
_نهارك ياسمين ، اش برمجنا ؟
بعد من الباب باش دخلت و كمل كلامو !.
_حكاية الفطور و القعدة متاع الصباح !
تبسمتلو و جاوبتو
_موش برمجنا ، هذيكا عادة و رجعنالها و ان شاء الله يا ربي الدوام !
تبسم و قرب منها يوشوش ، شفايفو قراب لخدها ، هي توا حلالو ما فماش علاش يحشم و لا يخاف تفهمو بالغالط !
_اش مزال و تنور الدار ، اشهرة نحضر روحي و نعرسو !
مازلت باش تجاوبو بخروج امو
_نهارك زين بنيتي ، و أنت برا أقضي شورك. اش حكينا عاد !
_باش نلبس سبادريا و نخرج امي ، تطرد فيا من الدار !
قعدت تضحك عليه و على كلامو مع نزيهة و باعد تعدات للكوجينة باش تعمل قهاوي و تطيبلها كعبات عضم مسموطين في الماء !
لبس سبادريه و طل على امو الي مركزة في التلفزة و تكلم ؛
_هاني ماشي امي ؛
_ربي معاك !
وصل للباب و حلو , جات لبالو فكرة سكرو بالصوت و رجع يمشي ما غير صوت للكوجينة وين قابلاتو واقفة على الكونتوار ! قرب منها و وقف بجنبها دورها ليه يتبسم !
طلعت راسها و قداش حشمت من الجاست متاعو !
تكلم و هو يتبسملها !
_فما حاجة حبيت نعملها أمس باعد الصداق غير حشمت من بوك و امك !
حلت عينيها تغزرلو مستغربة كلامو !
وين جبدها لحضنو و كبس عليها ، طبس راسو و باسها في جبينها ، يحكي بمعزة !
_الحمد لله الي أنت حلالي ، الحمد لله الي أنت باش تنور داري ، ربي يخليك ليا نوارة !
_و ربي يخليك ليا محمد !
قعدت خانسة تستحلى في التحميلة و كلامو المزيان ! ما بعدت الا ما سمعت امو تناديلها !
_خليني نمشي أنا لا نزيهة تعملي حالة اليوم !
خرج و هو يتبسم ، ما غير صوت حل الباب و عاود سكرو !
كيف تاثق في ربي و تشد طريقو يعطيك على قد نيتك الطيبة و يحللك ابواب الرزق في وجهك أكيد !
أنت تقرأ
💫💘 العار 💘💫
Romanceبنوتااتي 😍نفتتحواا كرونيك جديدة من اعز ما تقرااو💕 حكاايتها متأكدة بش تعجبكم 😘و بش تعيشوا معها لحظة بلحظة🤍 و بش تغوصواا في احداثها ♥️ومع كل حلقة بش تزيدوا تتعلقوا بيها🥰 و كيما تعرفوني منودكم كان بالحاجة الممو و الباهية🥰 اقراوها و نش بش تندمواا...
