💫💘💫
☄️ "أحبُّ وجهَكِ وهو يتجول في أنحاءِ ذاكرتي❤️..
لا تشبهين احد .
فقط يشبهك
#رذاذ_العطر
و #لون_الورد
و #هدوء_الماء
و #قوة_الحنين...." ☄️
قامت ما استنتش حتى رانيا تقوم معاها ، خرجت تجري ، و قداش شواتها غزرة عينيه ، للهدجة حبتو ، للهدرجة توجعت منو ، يعني وجيعتو منها ولات وجيعتها هي زادا !
يغزرلها كيف خرجت تجري ، علق التاليفون و تنطر وراها ، رانية الي كانت لاحقة عليهم ، حبست في بلاصتها كيف شافتو كيفاش تنطر قدامها ! خليهم يحكو و لو ما كتبش المكتوب يصفو القلوب !
تغزرلو كيف وقف قدامها ، موش فاهمة اش قاعد يعمل هو خطب و يحضر في روحو باش يعرس اش يعمل توا !
عينيه قعدت تتفحص فيها و كانو يحب يحفظ تفاصيلها اكثر و اكثر ، ناسي أنو هي محفورة فيه و في قلبو ساكنة ؛
تكلمت و الغش ماليها !
_اش تحب زياد ! تحب تهبلني ! كان الي عملتو الكل تحب تأخذ بثارك ، فنقلك راني متت بالوجايع ، ما عادش نحمل وجيعة جديدة !
يغزرلها و موش عارف اش يقول ، هو فعلا ! موش عارف روحو اش يحب و لا شنية الي يعمل فيه ، كل الي يعرفو أنو مازال يحبها أنو شوفتها تقضي عليه و على كل دفوعاتو !
تكلم و هو يغزرلها !
_اطلع نحكو شوية في الكرهبة !
تبسمت تبسيمة وجيعة !
_ما عادش عنا ما نحكو ، أنت حكيت كل شيء بحاجة وحدة ! خطبت ربي يهنيك ! اكهو وفى !
يغزرلها غزل عليها ، تكلم و هو يغلي !
_اش تحبني نعمل مالا ، نقعد عايش على اطلالك و نقعد نتيتم عليك ! قداكش انانية و الله !
تبسمت بوجيعة ! تكلمت بصوت رعشة البكاء ماكنتو !
_انانية صحيح ، خاطر حبيتك !
قعد يغزرلها و تكلم !
_حبيتني ، زعمة وجيعتك كيف ما وجيعتي؟ و حتى كان وجعتك اش تحبني نعمل !
_ما تعمل شيء زياد ، ما عاد يفيد شيء في حكايتنا ! أنت حبيتني و أنا ما كنتش في المستوى و وقت انا حبيتك أنت شفت حياتك ! كهو خلصنا ، ذوقتني الي ذقتو أنت و بالوافي !
ما عادش منجمة تزيد تاقف دقيقة أخرى قدامو ، تعرفو مزال يحبها أما كل شيء ضد المحبة هاذي ، كل شيء و اولهم الماضي و اخرهم خطبتو و المرأة الجديدة الي دخلت لحياتو !
تحركت خطوتين وين وقفتها يديه من جديد ! يديه الي كبست عليها و كانها ما تحبهاش تمشي و تبعد عليه ، تلفتتلو تحكي و الدموع مرغرغة عينيها !
_سيبني زياد ، مانيش متغششة عليك ، من حقك تحب و تعيش و تأخذ وحدة توالمك ، تحبك و عمرها لا غدرت و لا خانت ، وحدة ما عندهاش ماضي معاك ! مانيش متغششة عليك ، انا متغششة على روحي ، على قلبي خاطرو دق ليك وقت الي أنت اخر واحد يلزم يدقلو ، اخر واحد زياد !
قعد يغزرلها ساكت ، موش لاقي اش يقول ، يحب يهرب بيها و يفرغ قلبو ، يحب يحكي و ما لقاش كيفاش ! موش عارف كيفاش يتصرف ! فيقو تاليفونو الي نوقز من جديد ، هداية تطلب فيه ! و كانها إشارة باش يفيق !
تبسمت كيف سمعت تاليفونو ، تاليفونو الي جبدو قدامها و شافت الاسم المكتوب " هداية " ، قد ما موجوعة من الحكاية ، قد ما فرحتلو أنو عالاقل الي خطبها المرة هاذي تحبو و تلوج عليه ، موش كيف ما كان حالها !
تلفتت لرانيا و شاورتلها باش تجي !
دارت مروحة و هو قعد واقف في بلاصتو ، موش عارف التخلويض اللي عملو اليوم ، ما حقوش لحقها و لا حقو وقفها و حكى معاها ، كل مرة يقول ارتاح أول ما يرجع يشوفها يدخل بعضو ، ركب كرهبتو و هز التاليفون و طلب هداية ، هداية الي تقولش حست بيه و كبشت و هي تطلب فيه ! طلبها و هو مصمم , الدنيا الي وقفت على نورهان يلزمها ترجع من جديد !
_الو هداية وينك
_وينك أنت ، علقت عليا بكري لباس !
_لباس ، قلي اش قولك نعرسو آخر الشهر ! يناسبك ؟
جاوبتو بتبسيمة ؛
_يناسبني أكيد ! يناسبني زياد !
علق التاليفون و خرج يجري ،من الي قالو جعفر راو العرف بعثو باش ياخذلو موعد كتبان صداق في البلدية و هو موش مصدق، يعني باش يعرس بهداية ، يعني باش تضيع من بين يديه ! المرأة الوحيدة الي حبها في حياتو ، باش ياخذها عرفو و عشيرو !
وصل بحذا دارها و طلبها علقت عليه ، عاود طلبها عاودت علقت
كتبلها مساج و بعثو (اذا موش باش تخرجلي قدام داركم باش نعملك فضيحة و نزيد نمشي نحكي للزياد )
قرات المساج و هبطت تجري ، تدعي بيه و تعاود ، موش حابب يخليها ترتاح ، موش فاهم أنو حكايتهم مستحيلة و أنو زياد فرصة ليها وحتى لو ما يحبهاش ، فباش تعيش مرتاحة أكيد خاطرو انسان متخلق و مستحيل ياذيها !
خرجتلو قدام الدار ، تڨحرلو !
_تفضل سي طارق ، وقتاش باش توفى السينما الي أنت عاملها ! افهم أنا مخطوبة و عرسي قريب !
قلبو وجعو من لهجتها ! قداشها قاسية عليه ، غلطتو أنو ما عندوش الي عند بوها و عند زياد !
تكلم و هو يغزرلها , قهرتو ضاهرة في عينيه !
_لما تندم يا هداية و ريتو طارق هذا لما تتمنى ضفرو ما تلقاش !
تعدى و خلاها واقفة ، موش بايدها ، مستحيل تعكس بوها و لو حبتو طارق أما اهلها و بوها ابجل ، و زياد الف وحدة تتمناه مستحيل تسلم فيه بالساهل و لو ما تحبوش ! و لا عندها ادنى احساس ناحيتو !
شد ثنية الدبو يغلي ، عارف أنو عندهم سلعة جديدة اليوم و أكيد باش يلقاه واقف عليها ! ماهوش باش يخليها تفرح. على جثتو تأخذ زياد و باعد هو الي وقتها ماعادش باش يغزرلها !
دوب دخل قابلو واقف يحكي بالتاليفون ، مشى وقف بجنبو من سكات ، يستنى فيه يكمل تاليفونو !
علق التاليفون و تلفتلو
_اهلا طارق ! جابك ربي !
_جابني المكتوب ! حاشتي بيك ، أما خلينا نمشو نحكو في الكرهبة خير !
مشى معاه. عندو مدة حاسو بيه حكاية ! و ما حبش يكبشلو !
_ايواه نسمع فيك. أن شاء الله خير !
_تعرف أنا راجل و ما نحبش الغدرة ، و ما نحبش نغدر صاحبي و لا صاحبي يغدرني ، هداية الي هي توا خطيبتك. كنا احباب ، ثلاثة سنين أنا نموت عليها و هي الروح و العقل فيا ، للحد ما خممت ندخل من الباب و نمشي باصلي ، عمك عثمان حقرني و طردني و حرم عليها تشوفني و لا تقابلني ! من وقتها بدأت المشاكل ، تو ستة شهور من وقتها و أنا متعذب ، هي ما شاء الله نساتني و ناوية تبدى معاك من جديد ! أما أنا ما نسيتش ! أنا ما نجمتش ننسى ! جيتك برجلة كاني صاحبك و خوك ما تعرسش بيها ، ضقت حرت أنو المرأة الي تحبها تمشي مع غيرك و تخليك ، ما تضوقهاليش ! مانيش حملها ، ما عنديش صبر ايوب كيفك ، ممكن نقتلها و نقتل روحي وقتها ! هداية ساكنة و معششة في قلبي ! و أنت قلبك ساكنة فيه نورهان ، يعني باش تضلمني و تضلم روحك كان عرست بيها !
قعد يغزرلو مصدوم ، عمرو لا تخيل السيناريو هذا ، عمرو لا شك أنو تنجم تكون عندها حكاية حب قبلو و مع شكون مع صاحبو و عشيرو !
✴✴✴✴
دخووول رااايق مسبب للحرااايقق 😂🔥
شراااايييكمممم فاللقفللة😂
فالاخيير طاارق حكى لزيااد و مخلاا شي في قلبواااا 😉
انتم مع او ضد الي عملواا😐
اني شخصيااا مع الي عملواا🙂
كاان لازم يحكيلوااا كل شي 😉
و شراايكمم في تصررف زيااد😐
الي رغمم انووو خااطب هدااية الاا انواا ميزاال مخواا و قلبواا في نورهااان🙂
برشااااا احداااث تستننى فييكممم بنووتاات🥰 والله الناار بش تزييد تشعل غيير تفااعلوااا💥
انشالله تكوون عجبتكممم الحلقة😘
و استمتعتووااا بيهااا🥰
تنسوووش الجااااامممم🙏 و اراااءكمممم حبااايبي 🥺🤍
لييلاكممم زيينة و ملتقااناا غدووة باذن الله❤️
نحببببببكمم و نبوووسكممم وحدة وحدة ❤️♥️
أنت تقرأ
💫💘 العار 💘💫
Romansaبنوتااتي 😍نفتتحواا كرونيك جديدة من اعز ما تقرااو💕 حكاايتها متأكدة بش تعجبكم 😘و بش تعيشوا معها لحظة بلحظة🤍 و بش تغوصواا في احداثها ♥️ومع كل حلقة بش تزيدوا تتعلقوا بيها🥰 و كيما تعرفوني منودكم كان بالحاجة الممو و الباهية🥰 اقراوها و نش بش تندمواا...
