💫💘💫
☄️ "لم تكن تريد من هذه الحياة أكثر من يدٍ لا تفلت يدها ذات ظلامٍ ، أو ذات زحامٍ، أو ذات خصام، أو ذات ملام..." ☄️
عندو ربع ساعة من الي فاق و هو يتفرج فيها ، ليلة البارح بلحق تقول منام معاها ، أول مرة في حياتو يحس بزياد و محبتو ، و يعذرو على تمسكو بنورهان رغم الي عملاتو معاه ، خاطر هو زادا رغم الي عملاتو معاه ريم ، ما نجمش يخرجها من مخو و لا يتحمل انها تغيب عليه من جديد ! عارف روحو حرايمي و عارف روحو ما فلت حتى وحدة جات بين يديه ، أما قبل ، الي تجي الليلة من غدوة يفيق عايف جد بوها الأول ، أما هاذي غير ! الي صار البارح بيناتهم كان بارادتها اكثر من ارادتو هو ، تنهد كيف تفكر السيناريو ، تقولش أول مرة يعرف مراة ، طاحو بايديه ما أصغر و اشب منها ! أما هي غير ، كل شيء فيها حاسو غير ، تقولش ساحراتو ! حكاية بنتها و الفلوس الي حاسس انها ناقصة خيط أما تو يعرفو في وقتو أكيد !
جبد يدو بالسياسة من تحت راسها و قام ، ليلة كاملة و هي راقدة في حضنو ! و متمتع بقربها!
جبد الريدو متاع الشباك باش ما تفيقهاش الشمس ، و نقص في الكليماتيزار و قام خارج ماشي لبيت البانو ! عمل دوش و خرج خفيف ، رجع للبيت باش يلبس دبشو يلقاها راقدة كيف ما خلاها ، تبسم و لبس دبشو ! و خرج ما غير حتى صوت !
تعدى للباتيسيري الحومة جاب كورواسون و جاب زوز قهاوي و زاد خذى الخبز و رجع للدار ، حطهم في الكوجينة على الطاولة و حل الفريجيدار جبد باكو الجي و الزبدة و المعجون و رجعلها للبيت ، حط يدو على خدها بالسياسة يفيق فيها !
_ريم فيق ريم !
حلت عينيها و تبسمت ، الراجل هذا قد ما عملت معاه الدوني ، قد ما كان حنين و سيس معاها ، رغم فارق العمر و هي زادا موش صغيرة أما معاه حاسة براحة و امان ، اصلا الي حساتو معاه البارح ما حساتوش مع راجلها الأول من سنين ! راجلها الي و هي على ذمتو لا رحمها و هي مطلقة لا رحمها !
_صباح الخير !
_صباح النور ! قوم نفطرو و نمشو نجيبو بنتك !
وقفت من الفرحة ، تغزرلو موش مصدقة الي يقول فيه !
_بلحق !
_بلحق , ألبس دبشك و ايجا افطر و باعد خلينا نخرجو !
_ياهي ! أما كيفاش موش باش يعطيهالي !
_قتلك نجيبوها ، تهنى الليلة ما تبات كان معاك !
_يعيشك
قالتها و نڨزت عليه باستو من خدو ، خلاتو يتبسم عليها ، يا عمبو عمرو ، عرس قداش من مرة و عرف نساء قد شعر راسو و ما حسش الي قاعد يحس فيه توا معاها !
لبست و لحقت عليه للكوجينة ، الكرواسون على الطاولة والخبز السخون ، القهوة ، حاجات خلوها تتبسم ! قربت منو و عاودت باستو من خدو !
_يعيشك يا المنجي ! و لا نقلك سي المنجي ؟
تبسم و هو يسمع فيها !
_اش من سي ، و أنت خليت فيها سي ، أقعد افطر ! خلي نقلك اش باش نعملو !
قعدت و خذات كعبة كرواسون ، تأكل و تتكلم !
_قبل ، كيفاش باش تعمل في فلوسك ، كيفاش باش نرجعوهم من عندو !
_اش عندك فيا ، فلوسي نرجعها اليوم قبل غدوة كان نحب ! أما بنتك أهم و كان الفلوس تخليه يعتقك أنت و بنتك ، خليهالو !
تبسمت و هي تسمع فيه ، تكلمت و عينيها تغزرلو !
_مسامحني و لا ؟
طبس راسو ، هو اصلا موش عارف الجواب ، اذا مسامحها و لا ، كل الي يعرفو أنو المرأة هاذي حركت فيه حاجة مدفونة توا سنين !الايام تجري و من فرحتها موش حاسة ، اليوم عندها أربعة شهور عرس ، زياد طائر بيها ، موش مصدق أنو عرسو و أنو هي حلالو ، حومة كاملة حاطينها فوق روسهم ، من الي كانت نورهان ولات مدام نورهان ، أما هي الثيقة لا ، اكثر من رانيا ما تثيق حد !
خرجت على طراطش صوابعها من البيت باش ما تفيقوش و تعدت للكوجينة جبدت التاست ، كلها أمل الشهر هذا يطلع فما حاجة ، دخلت للتوالات و خرجت بدمعتها تلمع في عينيها ، ماهيش فاهمة وين المشكلة ، ماهيش مصبرة ، لا تشرب في حرابش و لا عاملة شيء ، دورتها منضمة ، و حياتهم اكثر من عادية ، مداومين على العلاقة و زياد مطاوعها في كل حاجة تطلبها !
مسحت دمعتها و دخلت للكوجينة ، طيبت القهوة و جبدت الڨاتو من الفريجيدار و الزبدة و المعجون ، جبدت الخبز من المخبزة و سخنتو في الفور ! حضرت الطاولة و دخلتلو لبيت النوم ، تحاول تتبسم أما ما نجمتش ! طبست باستو من خدو ! و تكلمت !
_زيدون ، حبي فيق ! السبعة و نصف توا !
تلفتلها يتبسم ، جبدها ليه ! طقس خريف و يجبد من البدن ، حاسس روحو مبيل !
_صباح الورد ، مانيش باش نمشي نخدم اليوم ، اليوم باش نعديه معاك !
تبسمت و هي تسمع فيه !
_ نهارك فل ، جو مالا قوم نفطرو و نشوفو اش باش نبرمجو اليوم !
قام معاها يتبع فيها كيف الوليد الصغير ، نورهان و عشقة نورهان و معزتها في قلبو ، لو تقولو اعطيني عينيك ما تغلاش عليها !
قعد على الطاولة يغزرلها ، سارحة شوية و تحاول تخبي سرحتها بتبسيمة ، كل وين تطلع راسها و تلقاه يغزرلها !
تكلم باعد ما شد يديها و كبس عليها !
_شبيك حبي ، شبيك ، فما حاجة مقلقتك !
تكلمت و هي تحاول تتبسم
_توا احنا عندنا اربعة شهور معرسين ، و كل شهر نقول الشهر هذا باش نطلع حبلة ! و ما يصيرش !
تبسم و كبس عليها !
_ما تقلقش روحك حبي ، تحب نمشو للطبيب ؟
تبسمتلو ، كانت حاشمة تقولو أما هو يفهمها على الرمش !
_ايه و الله نحب ! اش خص كان نمشو اليوم ! اش قولك !!
_كيف ما تحب حبي ، نفطرو و بدل دبشك ، تو نهبطو لوسط البلاد ، نعرف طبيب غادي !
تبسمت و هي تغزرلو ، قلبها واجعها و نوعا ما مفجوعة ، يا خوفها كان تطلع بيها حكاية و ما تنجمش تجيب صغار !✴✴✴✴
هاااو العمم طللل علييكمم🎊
اماا شراايكمم في انواا ساامح رييم انتم مع او ضد الي عملواا😉
و حكايتهمم عاجبتكم اولاا😘
مش مركزيين فيهاا برشاا اما سااعات تلقااو لقطاات لييهمم🙂و كييف العادة نورهاان و زيااد لاازم يكونواا متواجدين في اي حلقة😍
شراايكم في علاقتهمم و تو نورهاان حاابة على صغييررر🥰
و تتصورواا فماا حاجة خطيرة للدرجة انهاا متجيبش صغاار😐نعرف الحلقة هااذي زاداا قصيرة🥺
غدوة انشالله عالصبااح نحطلكمم حلقة اخررى و نزيدكم بإذن الله🥰انشالله عجبتكممم الحلقة و استمتعتواا بيهاا برشااا🤍
ليلتكممم زيينة و ملتقااناا غدووة❤️
تنسوووش الجااااامممم و اراااءكمممم حبااايبي 🙏🤍نحببببببكمم و نبوووسكممم وحدة وحدة ♥️❤️
أنت تقرأ
💫💘 العار 💘💫
Romanceبنوتااتي 😍نفتتحواا كرونيك جديدة من اعز ما تقرااو💕 حكاايتها متأكدة بش تعجبكم 😘و بش تعيشوا معها لحظة بلحظة🤍 و بش تغوصواا في احداثها ♥️ومع كل حلقة بش تزيدوا تتعلقوا بيها🥰 و كيما تعرفوني منودكم كان بالحاجة الممو و الباهية🥰 اقراوها و نش بش تندمواا...