💫💘 العار 💘💫

💓الحلقة 67...💓

💫💘💫

☄️ "‏العين التي تمتلئ بك لن تنظر                                        لغيرك حاضراً كنت أم غائباً..." ☄️

واقفة  تستنى فيه يخلص في الفونداز الي عينيها ما شاء الله عليه ، لا حشمت و قالت معاه شكون و لا فهمت روحها أنو طفاها ! فما بنات ليهم الكي بالنار على ما يلوحو ارواحهم عيناني !
خلص و رجعلها ، وين يغزرلها تڨحر ، أول مرة يشوف نوارتو تڨحر و لا للفونداز الجرد الي كانت تبزنس فيه !
شد ذراعها و خرجو الإثنين ، طبس عليها يتبسم !
_شبيها نوارتي !
طلعت راسها و غزرتلو و تكلمت !
_بصراحة فددتني الفونداز كيفاش تغزرلك ، تبزنس فيك عيناني !
_اش عندك فيها ، المهم أنا مع شكون و عاشق في شكون ! راك في عينيا نوارة و ما نشوف حتى مراة غيرك !
تبسمت و طبست راسها ، تكلمت و هي تغزرلو في عينيه !
_اش مازال ناقص ؟ نتصور كان تابيات البيت ! أنا عندي وحدة  ! نكملو وحدة أخرى و نروحو ، يكفينا !
_لا ماناش مروحين , باش نفطرو الأول ، مازال بكري و أنت راك جعت من الدورة الي عملناها !
تبسمت و تكلمت !
_اي و الله جعت !
كملو قضياتهم و شدو الثنية ,
دخلو للروستورون ، دوب هزت عينيها قابلها ضياء ، قلبها حستو سقط بين ضلوعها ، موش خوف منو ، ما عندها ما تخبي و محمد امين في بالو بحكاية خطبتها منو قبل  !
كانت باش تقولو خلينا نخرجو ، نبدلو البلاصة الا انو ما فماش علاش ، هي مع راجلها توا و ما عندهاش علاقة بضياء حاليا !
قعدو في طاولة في الوسط ، معضم الطواول معبيين ! وقيت فطور !
جبد الميني و مدهولها ، حطو في يدها و كبس عليها !
_اليوم باش نأكل على ذوقك ، كيف ما حياتي الجاية الكل على ذوقك نوارتي !
تبسمتلو ، موش عارفة علاش مربوثة ، خاطر ضياء موجود و لا خاطر كلامو مسها ؛ تكلمت و هي مطبسة راسها !
_ان شاء الله محمد !
اختارت سباقيتي  بولوناز ليها و لازانيا ليه ، ما يحبش السندويتشات  و الحكايات هذيكا !  طلعت راسها على خيال وقف بجنبهم و قلبها سقط بين ساقيها و هي تشوف فيه بتبسيمتو المستفزة ، تلفتت لمحمد الي نطق من الصدمة فيه !
_تفضل خويا حاشتك بحاجة !
_ما حاشتي بشيء ! جيت باش نشوف بنت الأصل الي لا تخرج لقهاوي و لا روستورونات معايا و مع غيري هاي ما شاء الله مفتقة مواهبها   ، هاو تبدل الحال كيف بطلت منك !
وقفلو و حط يدو على صدرو ، يحكي و يلز على سينيه !
_ الي تحكي عليها مرتي ، احترم روحك ، و بالك ما راتكش راجل و تستاهل تخرج معاك ! و توا تفضل لا نمرمد بيك القاعة ؛
ضحك ضحكة مستفزة و تكلم
_بشكون تمرمد القاعة ، مازلت ما تعرفش روحك مع شكون تحكي ، أسألها شكون ضياء و هي تو تقلك ! و المرة هاذي ما حبيتش نعمل مشكلة خاطر اصحابي معايا ، المرة الجاية ما تعرفش اش نجم نعمل فيكم الزوز !
_ايدك و ما تعطي , اقلب منضرك !
هز روحو و رجع لطاولتوو و خلى محمد امين يغزل ، هي قعدت تغزر ما تكلمتش جملة ، الا ما مشى !
_محمد اش عندك فيه ، ما تتغشش !  راو كيف خطبني ما حبيتش نخرج معاه ..
قص عليها و تكلم
_مانيش متغششة نوارة ، ما غير ما تفسر ،  كان جاء يفهم ، وحدة كانت خطيبتك و مشات على روحها ، كيف تشوفها لا تقربها لا تحشمها ! أما اش عندك تقول فيه ! ماهوش راجل !
كملو الفطور و قامو شدو الثنية ، الكميون معبي بقضياتهم ، اش مزال على العرس ، ايامات و كلو يبقى حديث و يرتاحو الإثنين .