💫💘 العار 💘💫

💓الحلقة 13...💓

💫💘💫
☄️ "أسقط في عاري بلا حراك، أسأل إن كانت هنا الرصاصة الأولى أم أنّها هناك؟" ☄️

قعدت تدندن مع الغناية هي و رانية ، رانية الي رجعتها للسنين لتالي ، رانية الي زهرها ما يبعدش على زهر نورهان ! رانية بخلاف انها يتيمة الأم و البو كيفها و هاذي اكثر حاجة جمعتهم رغم فارق العمر الي ما بيناتهم ، نورهان أكبر من رانية بخمسة سنين ! الا انهم كانو أصحاب بلحق و كانت اكثر من اختها ، أما للأسف من الي دار بيها فراس خسرت الناس الكل ، وقتها حازم نبه على نورهان باش ما عادش تخالطها !
تلفتت على غفلة مرة أخرى تلقى عينيه فيها ، يغزرلها من جديد ، غزرة سخطت قلبها بوجيعة ! أي حبها بارشا و مستحيل يكون ما حبهاش اذا لليوم هذا مازال آثار محبتو ضاهرة ؛ تعرف أنو الي يعمل فيه خاطرو موجوع منها و عندو الحق ، اذا هي لو رجع فراس مستحيل ترجعلو ، خاطر بلحق كرهتو ، الي عملو معاها وجعها ، فما بالك الي عملتو هي للزياد ، ساعات كيف تخمم تقول عندو الحق أنو ما يتلفتش لوجهها !
تلفتت لرانيا كيف سمعت صوتها !
_قوم نعملو شطحة ، بالله الغناية تهبل !
_لا نحشم ، ما نجمش !
_اش من تحشم ، شوف بارشا يشطحو ، نساء و رجال !
وقفت و وقفتها معاها ، في الأول كانت تميل بالسيف خاطر حاشمة و باعد طارت الحشمة و اندمجت مع الغناية و الشطيح ، من الحاجات الي تحبها بارشا قبل و تحس روحها في مود آخر كيف تعملها الشطيح ، جدتها قبل كل عرس تبدى ترص فيها تقولها ياسر مخفوڨة !
عينيه ما نجمش يهزها من عليها ، بالسيف عليه زادت على مرمتو بشطيحها. قعد يتبع في حركتها ، لين حس بنخزة العم ليه!
_ارحم روحك ! علاه عامل فيها هكا ! ما تستاهلش و الله !
تلفتتلو و رغم فاهمو علاش يحكي أما استفسر
_اش عامل بيها روحي ؟ شبيني !
_هابل عليها و هي ما تستاهلش ، تعرف شنية مشكلتك معاها انك ما وصلتلهاش. أما نتصور كان وصلتلها راك نسيتها و فتتها !
قعد يغزرلو حاير !
_فاش تحكي عمي ، يزي من التخلويض !
_مانيش نخلوض ! ليلة معاها و تو تعافها ! اصلا أنت بفلوسك تنجم تجيب ما خير منها بالف مرة !
ڨحرلو و تكلم !
_عمي لا أنا متاع الشيء هذا و لا هي ! عمرها ما كانت متاعو !
الضحكة المستفزة الي ضحكها عمو فددتو ! كانو يحب ياكدلو عكس كلامو !
_كيفاش عرفت ياخي !  تعرف عليها كيفاش كانت عايشة السنين الي فاتت و المرأة الي هربت مع ولد عمك و خلاتك توقع منها كل شيء ! جرب حظك بالك تبرا و ترحم عليا !
قام من جنب عمو ،  موش منجم يزيد يسمع حتى كلمة أخرى ! تعدى و غزرلها وين جات العين في العين , غزرتو تبدلت ڨحرة !  خرج  البرا و تكى على كرهبتو و شعل سيڨارو ! فادد من روحو و منها ! ما فماش حل لحكايتو ، يا يخرج هو من الحومة يا تخرج هي منها !
تلفتت لرانيا تتكلم ! غزرتو حسستها بنقص كبير لحضتها و كانها عملت جريمة كيف شطحت !
_خليني نروح أنا توا !
_حتى أنا باش نروح ، خالتي وحدها في الدار. ! أما هات نقيد نومروك و نبرمجو قعدة مع بعضنا كيف ايام زمان !
خرجو جميع باعد ما خذاو نوامر بعضهم ! مشات خطوتين و تشوف فيه واقف و متكي على كرهبتو و سيڨارو في يدو ! دوب شافها قدم ناحيتها ، حتى رانية ما عمللهاش حساب !
تغزرلو قاعد يقرب منها ، قلبها غصرها ، موش عارفة اش باش يقوللها أما قربو صبح جنة بلحق ليها !
يتكلم و عينيه نار ، وجهو مغصور و العرق يقطر من جبينو !
دوب قرب ، رانية بعدت و كانها حست أنو باش تلحم بيناتهم ، أنو انسان يقطع العرس و الدنيا الكل على خاطر انسان اخر ، هذا احساس تعرفو و جرباتو ، هي زادا كيف حازم بطل منها و عرس باقبال ، حياتها وقفت لا نجمت تقدم و لا نجمت تعرف غيرو و تتجاوزو و هو حب عمرها ، فما بارشا ناس كيفها و كيف زياد كيف تحب تحب مرة وحدة و ما تنساش و لا تنقص محبتها و حتى و لو الطرف الثاني ما يستاهلش المحبة هذيكا !
وقفت على جنب تغزرلو ، تكذب كان تقول موش غايضينها الزوز ! أما نورهان هي الي غلطت !
تكلم و هو يغزرلها في عينيها !
_يلزمك تخرج من الحومة ! ما فماش حل آخر ، الحومة ما ترفعناش الإثنين ! أنا ناخذ دار جدتك و  نعطيك فلوس استقر بعيد عليا ، بعيد على الحومة الكل ! 
يحكي بنترة و غش كبير ، قعدت تغزرلو مصدومة ، توقعت كل شيء ، كل شيء الا الي تسمع فيه !
ما نجمتش تتكلم من صدمتها ، موش عارفة اصلا علاش مصدومة ، اش متوقعة منو يجيها بالاحضان و يقلها نحبك و سامحتك و نرجعو لبعضنا ! أكيد لأ و أكيد هذا مستحيل زادا !
ما نجمتش تجاوبو و لا نجمت تمشي و تخليه و لا نجمت تفهم الوجيعة الي في قلبها كيفاش باش ترتاح منها ، علاش متقلقة و علاش حايرة هي ! علاش غصة في حلقها و الدموع رغرغت عينيها ، ممكن كانت انانية و هي فعلا انانية ، شكون ما يحبش حياة هانية مع حد يحبو و هذا الي صار معاها ، ما كانش بايدها كيف حبت فراس ، كيف ما هو موش بايدو محبتها ، كيف ما هي توا موش بايدها قلبها الي دق ليه ، في الوقت أنو لازم يكون هو اخر انسان تحلو قلبها و تحبو خاطر كسرتلو قلبو قبل و ماهوش باش يعديلها الي صار و يرجع يحب فيها !
نفنفت خشمها كيف الوليد الصغير و بلعت ريقها ، شيعت راسها لتالي ترجع في دموعها في عينيها ، حاولت تتكلم ، لكن ما نجمتش ! هربت عينيها من عينيه باش ما تبكيش قدامو ! لكن شكون يتحكم في دموع عينيه ، اذا فاضت ما عادش شيء يرجعها للعين ! دموعها الي هبطو يتجارو و ما لقاتش بيها وين غير انها تغطي وجهها بايديها ! ما تحبش تبكي قدامو ، ما تحب تبكي قدام حتى حد ، لكن حصل و بكات و حصل الي مسكرة عليه في قلبها تكشف ، قعدت كابسة على عينيها بايديها و تشهق ! و يا عمبو عمرو  الي جاء يطب فيها عماها ! لقى روحو عوض يتشبث برايو و لا يهز روحو و يمشي ، شاددها من يديها و يحكي,  يحكي بصوت حنين عكس الي كان بكري يحكي بيه ! يحكي و موش عارف اش يحكي !
_يزي من البكاء ، ما تمشيش ! موش لازم ! اووف ! نورهان !
كيف ما سكتتش ، جبدها من يديها قربها ليه ، هبط كفوفها من على وجهها و مسح الدموع الي باقي هابطين ! كان فما حاجة جنات عليه اليوم راهي دموع عينيها ، عينيها الي يعشقهم مزينين بغيمتين و كل مرة تمطر وحدة فيهم ! يديه الي ركحت في خدها و القرب الي هما فيه ! زينها الي مسحور بيه ، مستحيل يحب غيرها مستحيل ! حاجات خلوه يعدل على الي كان يطلب فيه و كلامو يسيح كيف الزبدة في لحضة ! تكلم و هو يغزرلها في عينيها !
_حد ما ينجم يخرجك من الحومة ، حتى أنا ما نجمش ! كلام غش نورهان ! كلام غش ! ممكن نسات انهم في الشارع ، ممكن نسات رانية الي تستنى فيها ! ممكن تناست و حبت تعيش اللحضة !
القرب الي كان بيناتهم كان كفيل أنو دوب تدور راسها يجي على صدرو ، حطت راسها على صدرو و لفت يديها على اجنابو !
خليها تتمتع بالحضن هذا و تحس بيه ، مستحيل تجيها فرصة اخرى ، الحب كيف يتمكن بانسان يخليه بلاش عقل و هذا الي صار ليهم الإثنين ! وقت حطت راسها و لفت يديها على اجنابو ما لقى في روحو ما يلم ، ما ينجمش يبعد و لا يحرم روحو من اللحضة هاذي !أما الي وراه الارياح ما يرتاح ، هبط يدو كيف سمع صوت عمو يحكي معاه !
_هيا نروحو سي الشباب !
تلفتت وقت سمعت الصوت ، قابلتها عينين ما تريحش جملة و غزرتهم كلها شماتة ، عينين راجل كبير شارب من الدنيا و الدنيا شاربة عقلو ، عينين تقلها من اليوم أنا بالمرصاد ليك ، من اليوم باش تلقاني في كل هفوة قدامك !

✴✴✴✴

شرااايكممم فاللقفللة🔥

شكوون قلبوااا وجعواااا كيفي🥺
احييييهه راااني ذببت يااناااس💘

رااي غيير هبطت دميعاات سب روحواا الف سببة😪

وينهم الرجاال الي كيفوااا يقدرواا دمووع المراااا🥰 اااه يااا حلييلي و برر 💗

هااني زدتكمم حلقة اخرى😘
اذا لقييت تفااعل ممكن بعد فالليل نزيدكمم وحدة اخرى💞
كل شي بين يديكمم😉

انشالله تكونواا استمتعتواا بالحلقة😍 و تنساااوش الجااام 🙏و اراااءكمممم حبااايبي 🥺🤍