💫💘 العار 💘💫

💓الحلقة 69...💓

💫💘💫

☄️ "نحن لا نقترب حين نحب ...
بل نقترب حين نثق بأن أيدينا التي مددناها لن تعود خاوية ...
وان الاحتواء هو أول ما نريده ...
قبل أن تحبني اتركني احس بالاحتواء بـ انني انتمي لروحك قبل قلبك ...
فقط حينها اطمئن .." ☄️

روح للدار و هو يخمم ، ناقص بارشا حاجات مقارنة بما عملت الرجال ، يحب ياخذلها كيف البنات صياغة كاملة ، يحب يعمللها عرس ، يتحدثو بيه ، يحب و يحب ، رغم أنو هي ما تحب شيء من الحكايات هاذي قد ما تستنى في النهار الي يتجمعو فيه !
شد فرشو و طلبها ، باعد ما تهنى أنو امو شربت دواها و رقدت ؛
هزت عليه تتبسم !
_محمد ! بطيت عليا !
_سامحني يا روح محمد ، اكهو ما تعشيت أنا و نزيهة و غسلت الماعون ، شربتها دواها ورقدت كان لقيتها العشرة متاع الليل ! شنية غلبك النوم ؟
_لا ، تعرفني ما نرقد الا ما نحكي معاك ، ديجا عملت قهوة و صحصحت بالذمة !
تبسم و هو يسمع فيها :
_نحب نحكي معاك في حكاية ! نعرف راك تقول ما جبدليش على الذهب و لا خذالي حاجة بخلاف الخاتم و البراسلي ! أما و الله دوب يتحسن الوضع ..
قصت عليه !
_اش نعمل بيه الذهب ، امي خذات بابا بخاتم فضة ، و توا ما شاء الله عندها صندوق ذهب ماهيش تلبس فيه ، أنا أنت تكفيني ، أنت الذهب الخالص الي مانيش باش نلقى كيفو أكيد !
تبسم و هو يسمع فيها !
_اما هذا ما يمنعش اني بعد العرس ، كل وين تواتي ناخولك قطعة ! وعد مني نوارتي !
_و أنا ما حاشتيش بغيرك و الله ، الباقي الكل ما عندو ما يبدل في حياتي !
علق التاليفون باعد ما سهرو تقرييا ساعة على التاليفون ، لا نهارو يتعدى من غيرها و لا النوم يجيه قبل ما يسمع صوتها و يفرغلها قلبو ، و هي كيف كيف دنيتها و فرحتها معاه و بغزرة من عينيه تستغنى على الدنيا و ما فيها !
فاق الصباح كيف عادتو ، شد ثنية الخدمة باعد ما تهنى على امو ، ناوي اليوم يحكي مع زياد ، يحب يطلب منو  يسلفو ، باش يلقى باش يقيم مصروف العرس !
تهنى على الخدامة ، كل حد شد بلاصتو و مشى طلبو ، توا العشرة ! أكيد فايق !
_صباح النور ا معلم !
_نهارك زين يا محمد امين ، وينك يا خويا !
_الحمد لله معلم ، حبيت نعرف أنت وين ! حاشتي بيك في قضية !
_تو نصيف ساعة و نتعدالك !
_يعيشو معلم !
علق التاليفون و مخو يهز يمين و يسار ، ما يحبش يحشم روحو غيرش تلز و الفلوس الي تحتو ما تكفيشو !
_اهلا معلم !
_اطلع اطلع ، نمشو نعملو قهيوة و باعد تو نرجعك للشانطي !
طلع بجنبو و هو يفرك في يديه من التوتر موش عارف اش يحكي و كيفاش يبدا الموضوع ! هبطو في قهوة الحومة ، من كلمة لكلمة تجبد الموضوع ؛
_معلم باش نحكي معاك و حاشم ، في بالك العرس مزال عليه جمعتين !
_ربي يوصل بالسالم يا محمد ، فرحت لخويا بارشا !
_يعيشو معلم ، عاد تعرف الوضع ، قلت تسلفنيش ثلاثة و لا اربعة ملاين نكمل بيهم حوصة العرس و باعد نرجعهملك بالطرف !
تبسملو و تكلم !
_تاخو يا الخو ، أما موش سلف كيفك كيف رجالي الكل ، ما فماش واحد عرس و ما خذاش المبروك  من عند زياد ! غدوة الصباح نجيب لخويا أربع ملاين !
_لا يا الخو ، سلف و لا مانيش باش ناخذهم !
_و رأس عشق بنتي الي مازلت ما جاتش للدنيا. لا يرجعلي منهم فرنك ، راك خويا قبل ما تكون تخدم معايا !
_يفرحك يا معلم ، يعيشو !
كملو القهيوة و رجعو للشانطي ، فرحلو بارشا  ، ما احلاها كيف يصبر الواحد و ربي يعوض عليه !