💫💘 العار 💘💫

💓الحلقة 52...💓

💫💘💫

☄️ "ليس الحب أن تأخذ قلب أحدهم
ولكن الحب أن تخلــقَ مكاناً لا يمكنُ لـِـ أحدٍ أن يأخُــذه......" ☄️

قعد يغزرلو حاير ، فرق كبير بينو و بين زياد ، زياد وقت عرس بنورهان رجع بروح جديدة ، ضحكتو ما تفارقوش و طبيعتو صحيح كانت باهية أما انزادلها وسع البال الي كان مفقود عندو ! طارق العكس وقت خطب تشوف الفرحة في عينيه و تشوفو طاير للسماء ، اليوم بلحق تقولش ربي هز عبد و حط عبد ! عندو جمعتين معرس ، رجع باعد نهارين يخدم ، عندو السرحة و البهتة و الادهى الشرب الي كان قليل وين يشرب ، ولى ضربة اثنين يتعدى للولد الدڨن يضرب كردونتو قبل ما يروح !
قرب منو بالك ينجم يعاونو و يخفف عليه ، تكلم و هو يغزرلو و كانو يحب يقرا عينيه !
_يا الخو وين سارح !
_اهلا محمد امين ! هاك جيت لهنا ! في بالي في الشانطي الاخر أنت اليوم ؟
_كملت و تعديت باش نشوفك و نتفاهمو على الشانطي الجديد ، تعرف أنو موش في البلاد و أنا ما نجمش نبعد على جال الوالدة ، حكيت مع زياد و قالي نسق مع طارق و جعفر كيف العادة و تفاهمو  !
_باهي ، هاني نسمع فيك !
_ماك تعرف أنا ما نجمش نخرج من البلاد  ، نجم نطل و نقسم وقتي أما موش كل يوم ! عاد قلت الشانطي الجديد نهار عليك و نهار عليا و جعفر واقف عليه زادا !
_خلي عليك ، توا أنا نزيد ناقف عليه ، ديجا الشانطي هذا قريب يكمل ، الخدامة يكملو في اللمسات الأخيرة ! و أنا نجم نقعد فيه للي يكمل !
_اما أنت عروس جديد ، عوض راك مع مرتك ، تلوج على الخدمة !
حاول يتبسم باش يبدد نضرات الشك الي شافهم في عينين محمد امين !.
_مرتي موش هاربة ! و هذا قسمي و خدمتي ابجل أكيد ! و أنت ما نويتش ، فماش حويجة وقتاش نفرحو بيك !
طبس راسو و تكلم بتنهيدة !
_انا يا ناخذ الي في بالي يا ما حاشتيش !
تبسم و تكلم ؛
_بنت الشيخ موش هكا ! ربي يعطيك ما تتمنى يا الخو ! ما تسلمش و ان شاء الله تكتب ليك !
_ان شاء الله ! ما حكيتليش باهي العرس و لا ؟
طلع راسو و غزرلو ، قلبو مكوي بالبعد ، راسها صحيح و كل نهار تزيد على النهار الي قبلو ، زاد عليها كيف شكى بيه الي ما يتسمى و نادوه يبحث و لولا زياد الي وقفلو فيها كان توقف و شد الحبس ، لا حنت و لا رافت ، و لا تبدل شيء في معاملتها ليه ،  ساعة ساعة يقول قلبها حديد ! ماهيش مقصرة لا في الدار و لا مع بوه ، كان هو حاسباتو موش موجود ! كل يوم يقول مانيش باش نسكر ، باش نروح نلحلح بمرتي و نرضيها و هي كل يوم تزيد عقيدة معاه ، يخرج و يرضى الشراب و لا يسمع كلمة ما ترقبنيش و لا ما تمسنيش منها ! عملت حدود تقولش ايهودي معاها في البيت موش راجلها ! صحيح غلط أما عقابها ياسر كبير !
تبسم يغطي في غصتو !
_باهي باهي العرس  ، عمل على الله و ربي يسهلك !
_ان شاء الله يا الخو !
قعدو يتسايرو من موضوع للموضوع و تفاهمو في الشانطي الجديد و هز روحو مروح ، تعدى على الخضار في ثنيتو خذى 4 كيلو قارص , باش يعمل بيهم سيتروناد !