💫💘 العار 💘💫

💓الحلقة 49...💓

💫💘💫

☄️ "لم تكن خيبة فقط ، انما كانت صفعة جعلتني احذر الى الابد.." ☄️

فاق بكري كيف عادتو ، حتى أحد و ما يخدمش و ما نجمش يصبح راقد ، نضف الدار و حضر فطور امو و بدل دبشو خارج للسوق ، يعمل دورة في الفريب يلقاش حاجة ليه. حوايجو الكل تهلكو من الخدمة ، ماعادش لاقي ما يلبس و يزيد يشوف يلقاش حويجات لاميمتو ، الشتاء قريب و لازمها بزايد كسوة !
وقف في باب الصالة يغزرلها و هي تقشر في كعبة العضم المسموطة ! تكلم و هو يتبسملها !
_هاني ماشي للسوق امي ، توصيش حاجة !
_سلامة قلبك وليدي ، برا ربي يفتحها في وجهك و يعطيك ما تتمنى على قريب ! ...
خرج و هو يتبسم اش خير من دعوة خير من اميمتو ! ..

عندها ساعة هي و امها يدورو من نصبة للنصبة ، لا عينها لاحوايج و لا عينها باش تأخذ جملة وحدة !
_امي خلينا نروحو بربي !
_ياخي شبيكي يا طفلة ، مازلنا كيف جينا و زيد مازلنا ما دخلناش  للفريب !
سكتت ، تعرف امها كيف تدخل للفريب ما عادش تخرج جملة وحدة ! قعدت تبع فيها من نصبة لنصبة و هي فادة ، حاسة روحها مخنوقة و حتى و  هي في الشارع !
_يا نوارة ايجا نشوفو النصبة هاذي ، فيها حوايج رجال ، ايجا نشوفو لبوك !
قلبو دق كيف سمع الاسم ، في حومتهم فما نوارة وحدة ، نوارتو ! طلع راسو وين قابلتو واقفة بعيد ما لمحتوش ، حالها ما يبعدش على حالو ، هي زادا ضعفت و التعب باين عليها !
يسمع في نفس الصوت من جديد تلفت !
_يا نوارة ايجا يا بنيتي ، الصبر منك و الله !
تلفت لامها الي واقفة مقابلتو و تختار ، ما شافاتوش و ممكن ما عرفاتوش اصلا ! ممكن الكاسكات الي لابسها ضيعت معرفتها بيه !
قربت من امها ، موش عاجبها الحال ، ناقصها كان الفريب و النصب و دز النساء !
وقفت بجنب امها مطبسة راسها ، ما طلعتوش الا ما سمعت امها تحكي !
_امشي الشيرة الي مقابلتني أختار معايا ، و الله حوايج باهية في النصبة هاذي !
طلعت راسها وين قابلتها عينيه الي تغزرلها ، بلعت ريقها لحضتها ، كلمة توحشتو شوية على الي تحس فيه ، لا هي نجمت تهبط راسها و ما تغزرلوش و لا هو زادا ؛ هو الي أول حاجة جلباتو ليها صوابعها الخاويين ! ما فماش خاتم ، زعمة نسات ما لبساتوش ! زعمة مخبيتو للعرس ، فكرو قعد يمشي و يجي !
فاق على وضعو و طبس راسو ، هز القطعتين الي اختارهم في يديه و مشى ناحية الراجل مولى النصبة خلصو و مشى للنصبة أخرى ! موش عارف هارب منها و لا هارب من روحو ! قلبو الي عصر عليه لحضتها ، خلاه يطلع راسو و يغزرلها من جديد ، وين جات العين في العين مرة أخرى ، ما يحبش يوجع قلبو من جديد ، خليه راضي بمكتوبو و بما اعطاه ربي ، نوارة موش ليه ! نوارة موش ليه أكيد !
مشات هي و امها باعد ما خذات الي حاشتها بيه من النصبة ، تمشي و تتلفت ليه ، بالسيف عليها ما نجمتش ما تاقفش و تغزرلو ! امها سبقتها خطوتين و شوية و تسمع في اللطخة و الصيحة الي رعبتها ! تلفتت تشوف في امها مفروشة في القاعة و مرمية بجنب الموتور الي ضربتها ، مشاتلها تجري تقيم فيها و دموعها هبطت لحضتها !
_ماما ! يا ماما لباس ! يا ماما كلمني !
حلت عينيها و غزرتلها !
_لباس يا بنيتي ، لباس ، رجلي تكسرت ، باش نموت بالوجايع فيها !
تكلم الراجل الي ضربها و هو يوقف في موتورو
_مانيش بلعاني اختي ، أنت الي طلعتلي ما غير ما نفيق بيك !
الناس تلمت بيهم و هو الأول قدم ناحيتهم ، القفة الي تفرتت ، طبس يلم فيها ! الناس تتفرج و لا من طلب الحماية لحضتها ! جبد تاليفونو و طلب الحماية
قرب منها و تكلم و هو مهرب عينيه من نوارة الي غزرتلو لحضتها !
_رجلك لباس ؟ تنجم تحركها ؟
طلعت راسها للصوت ، موش غريب عليها ، و كانت صدمتها كيف لقاتو ولد نزيهة ! تلفتت لبنتها الي هبطت راسها لحضتها ، جاوبتو و هي شوية تغزر ليه و شوية  تغزر لبنتها !
_مانجمتش نحركها ! يضهرلي تكسرت !
_لباس ! هاني طلبت الحماية ! شوية و يجو !
_يعيشك !
قالتها و تلفتت لبنتها تحكي معاها
_اطلبلي بوك يجيني ؟
_ما جبتش تاليفوني ماما ، خليتو في الدار !
مدلها التاليفون و هو يغزر لامها !
_خوذ كلمو من تاليفوني !
غزرت لامها الي جاوبتها براسها و طلبت بوها باش يجيهم ، بوها الي خرج من الجامع ساقيه أعلى من راسو أما ما خلطش عليهم ، قالولي الحماية جات هزتها للسبيطار ! حبس تاكسي و خلط وراهم !
واقف في الكولوار بعيد عليها ، موش عارف شنية الي يعمل فيه و لا اش مجيبو معاهم ! أما ما نجمش يخليها وحدها ، عينيها وقت غزرتلو قالت بارشا كلام ، حاسس أنو مازلت تحبو كيف ما مازال يحبها ، أما المكتوب قال كلمتو ، تفكر انو هي مخطوبة و انو خطيبها ممكن يجي في أي لحضة ! حاير موش عارف يخرج و يخليها و لا يستنى معاها و اللي يصير يصير ، شوية و يشوف في بوها جاي يجري ناحيتها ، بوها الي من فجعتو على مرتو ما لمحوش لحضتها !
_نوارة ، امك لباس بنيتي !
_لباس بابا ، دخلوها عملولها تصاور و توا يعملولها في جبيرة في ساقها !
تحكي و مرعوبة اذا شافو بوها اش باش يحكي و اش باش يصير ! بوها الي تلفت على غفلة و دار مقدم ناحيتو ! وقت وقفتو يديها !
_بابا ! محمد امين كان في السوق وقت الاكسيدون و هو الي كلم الحماية و زاد جاء معانا للسبيطار !
حط يديه على يديها يهدي فيها كيف شافها كيفاش تحكي مرعوبة ،  ماهوش باش يعارك و لا باش يعمل مشكلة ، بلعكس ساعات ربي ينورلك بصيرتك بحاجات بسيطة ! قرب منو و مد يدو بطريقة خلات محمد امين مصدوم ،  محمد امين الي ما مد يدو  و سلم الا ما سمع صوتو و هو يحكي معاه !
_عسلامة،  باش تخلي يدي ممدودة ، هذا ما قالش بيه ديننا !
_يسلمك ، سامحني  و على سلامة خالتي !
متغصور موش عارف اش يقول و لا اش يعمل و لا اش يقصد الشيخ حمد بجيتو ليه ! يسمع فيه كيف تكلم من جديد ، طلع راسو و ركز معاه !
_يعطيك الصحة على وقفتك مع الحاجة ! ربي يبارك فيك !
تبسمتلو و تكلم بصوت ضعيف !
_اجمعين يا شيخ !

✴✴✴✴

حليلي على محمد اميين رااو يهبل يا وخيااتي😍 كان انا يعجبني ولا فماا بناات مغرومين بيه زادا قولولي❤️
زعماا تكون هاذي اللقطة الي تخلي الشيخ يوافق اخيرا على محمد 💘
ولا بااقي مش بش يعطيه نواارة شنو تتوقعواا🥺
نعررف الحلقة قصيرة اما كيف التفاعل مش ياسر😐 وديما نفس العباد الي تعطي فياا في رايهاا😒 قلت هكا يزيههمم😪
الحااصل انشالله عجبتكمم و اذا لقيت اكثر جاامات نزيدكم حلقة اخررى🥰
انشالله نهااررركممم زيين حباااايببب قلللبييي 💗