💫💘 العار 💘💫

💓الحلقة 58...💓

💫💘💘

☄️ "كل السرقات حرام إلا السعادة ،
فأينما وجدتها إسرقها ....
فسرقتها حلال ،
ولا قانون يعاقب عليها ....
ما عليك إلا أن تكون سارقاً ماهراً...
  فهي تُجيد الإختباء..." ☄️

طيبت الفطور بالسيف ، عندهم مدة يأكلو من الشارع ، حست روحها بلحق كثرت على ما وصاوها ، رغم أنو زياد كان البسمة و ما تسمعش منو كلمة دوني !
طفات على الجلبانة و خرجت للصالة تمدت ! خواطرها عاملة فيها و أقل حركة معدتها تتقلب ، الطبيبة قالتها تكمل الشهر هذا و يتنحى عليها الوحم !
تسمع في تاليفونها ينوقز ، مشت هزت تتبسم ، تعرفو هو آلي كل ساعة يتفقدها بالتاليفون !
_زيدون
_روح زيدون ! وينك حبي ، اش حاسة !
_متقلقة ، طيبت جلبانة و خواطري دارت توا منها ، ما ضاهرلي كان باش نأكل منها !
تبسم ، هي من بكري تدلل عليه فما بالك توا حبلة !
_ما غير ما تأكل منها حبي ، احنا ديجا مستدعيين للفطور عند عمي المنجي و مرتو !
تبسمت و تكلمت !
_يا جو ! أكيد تو يفرحو بينا ، و الله شاهية بارشا حوايج ، ان شاء الله يطبولنا طاجين سبناخ ! و معاه كمونية ! أوف ريقتي سالت !
تبسم و تكلم ؛
_شاهية طاجين سبناخ يا حبي ؟
_أي و الله !
_و علاش ما تكلمتش و قلت حتى لرانيا راي طيبتلك !
_لا رانية  ما طيبتوش قبل ، خفت ما تعملهوليش بنين !
تبسم و تكلم
_باهي يا حبي تو نشوفو  ! نخليك ارتاح ، نتعدالك نصف النهار !
علقت التاليفون و دخلت تفرت في دبشها ، تحب تلبس حاجة مزيانة ، ديجا عمو من الي عرست هاذي أول مرة يستدعاهم ! و هذا فال باهي ليها ، تحب النفوس صافية ، كيف ما هو يحب زياد هي زادا تحبو و تموت عليه !.
رجعت تمدت في الصالة و طلبت رانيا الي هزت عليها بالوقت !
_رنوشة وينك اختي !
_الحمد الله عزيزتي ، وينك اش عامل فيك الوحم !
_انا الحمد لله , متفاضية تطل عليا ، قلقت وحدي !
_اللطف عليك اختي ، أما و الله لا نجم توا ، ما نجمش نخلي عمي وحدو ، مريض المدة هاذي و لازمتو لهوة !
_يا لطيف عليه عم عمار ، سلملي عليه و قولو ان شاء الله لباس ! هاي اش احوالك أنت و طروقة ! مازال مهبلك !
تبسمت و جاوبتها !
_اقعد شايخة عليا ، حكيتلك و ندمت ؛
_علاش ندمت ، يا اختي الطبيعي أنو الراجل يبدى ملهوف على مرتو و كان طفاك و كان بارد معاك وقتها مشكلة ، أما طروقة هاو موش مقصر ههه !
_باش تعمل كيف ليليا اختو ، تحسبلنا ! و الله خفت لا تضربنا بعين !
تبسمت و جاوبتها !
_عندك الحق تخاف و ما تعطيهاش الجنب ، يا وخيتي قداشها مسمامة ، ريتها نهارت الي جيت بحذاك قريب نهجم عليها على ما غزلتني غير قدر في طارق !
_ربي يهديها و الله لا فهمت شنية مشكلتها معايا !
_الغيرة اختي تعمل اكثر من هكا !
_صحيح و الله ، ايا نخليك عزيزتي ، نمشي نتفقد عمي ! 
علقت التاليفون و مشات للصالة تتفقد في حموها ؛ البارح طلعلو الدم و سهرو بيه في سبيطار لحد ما عدلوهولو و هو موش مستعرف بحاجة اسمها نضام لا في الدواء و لا في الماكلة ! غطاتو و سكرت باب الصالة و رجعت للكوجينة تتفقد في الصوص و طفات عليها الغاز ، و هزت التاليفون تطلب في طارق !
_رنوشتي !
_حبيبي بربي جيب معاك شوية فزدق ، قسما بالله هف عليا و حاسة طعمتو في فمي !
_هذا الي بيك ، تدلل ، كيف نروح نجيبلك في يدي ؛
علقت التاليفون و هي باقي تستطعم في الفزدق في فمها تقولش عليها كانت تأكل فيه ! تبسمت رغم انها قبل هي و الفواكه الجافة موش أصحاب جملة وحدة !