💫💘💫
☄️ "نحن مدينون بالحب لكل من جعلنا نبصر شيئًا جميلًا في أنفسنا حين أوشكنا على الأنطفاء ..."☄️
قاعدة و هو بجنبها ، شادد يدها و كابس عليها ، ماهيش طايقة تستنى الدور ، قد ما هي تحب تدخل للطبيب و تعدي و ترتاح كيف تسمع أنو هي لباس و تنجم تجيب صغار !
تسمع في الفرملية تنادي عليها ، قامت وهي كابسة على يديه من خوفها ، ما تحبش حاجة تبعدو عليها و لا تخلي محبتو تنقص ، كلام أول ليلة ليهم مع بعضهم على الصغار ما تمحاش من بالها بلعكس زاد ترسخ !
دخلت للطبيب الي باعد ما سالها بارشا اسئلة ، عدى عليها و خلاها تريڨل في دبشها و سبقهم لبيروه!
قاعدة مقابلتو مغصورة , تكلمت و هي مخنوقة و خاصة و هي تشوف فيه كيفاش يكتب في ليستا متاع دواء !
_لباس دكتور ؟
_لباس ! الحكاية و ما فيها مدام الي أنت في عرسك الاول كيف ما حكيت استعملت موانع حمل ما غير وصفة طبيب ، للأسف الموانع اثرت على هرموناتك ، عندك حليب متكون في صدرك و هذا الي مانع الحمل حاليا رغم توفر الضروف الملائمة ليه !
قلبها سقط بين ضلوعها ! تكلمت و عينيها مدمعة ، قسمتلو قلبو لحضتها !
_دكتور اش معناها ، مانجمش نجيب صغار !
_لا مدام ما قلتش هكا ، احنا باش نعالجو الخلل و بالمتابعة أكيد باش نوصلو للنتيجة ! و تجيب صغار أكيد !
طبست راسها مقهورة و تكلمت !
_قداش وقت تأخذ الحكاية ؟
_العلم عند الله ! احنا باش نعالجو و نشوفو ، حالتك ماهيش مستعصية قد ما لازمها صبر و عزيمة !
خرجت و قلبها مكسور ، ما نجمش يعمل شيء ، كان جات حكاية تتشرى بمال قارون كان باش يشريهالها أما هاذي معطى من ربي سبحانو ، ما ينجم كان يدعي باش ربي ينوب عليهم ! و يفرحهم حتى بصغير واحد !
من الطبيب تعدى بيها لوسط البلاد ، قد ما حكى معاها في الكرهبة و فسرلها الا أنو ما نجمش يفك كربها و ينحي عليها الغمة ! حزنها في عينيها قضى عليه !
وقف الكرهبة قدام بوتيك دبش صغار ، جبدها من يدها و دخلو جميع ، تلفتتلو حايرة ، موش فاهمة اش يقصد بانو يجيبها لهنا !
تكلم و هو يتبسم !
_موش أنا قتلك باش تداوي و تصبح لباس و نجيبو خمسة صغار ! باش نبدو نحضرولهم دبشهم من توا !
ما سيبهاش الا ما ضحكت ضحكة رجعتلو روحو بيها ، نورهان هي روحو و كيف تدمع و لا تحزن يحس روحو مخنوق !
فطرو البرا جميع و روح بيها للدار ، ما سيبهاش حتى دقيقة ، ما يحبهاش تخمم من جديد و لا تحزن ، الصغار الي من مراة غير نورهان ما حاشتوش بيهم ، حاشتو بيها هي ، مرتو و بنتو و حياتو بكلها !
هبطت من الكار تكركر في ساقيها بالسيف ، حاسة روحها خذات هواء و هي من ربي مرضها صعيب ، كيف تمرض ترقد بالجمعة و اكثر ما تتحركش من الفراش ! تتفكر و هي صغيرة وقت تمرض و تهزها خالتها للطبيب يقلها مناعتها ضعيفة رد بالك عليها ، هي ما عندهاش مناعة في الحياة ، لا ضد المرض لا ضد الناس ، الي يجي ياخذ فيها باي ، اليوم مثلا طلعتلها حكاية من الحيط ، وحدة من البنات الي يخدمو معاها ، مصوحبة الشاف متاعهم و يمكنش سمعت بالصدفة الي هو مضروب في رانية ، جاتها مشكلة من الحيط و عملتلها فضيحة و تبلات عليها ، هي من صدمتها و من المرض الي تمكن بيها ما نجمتش ترد الفعل ، بقات تأكل في روحها دخلاني ، هذيكا رانيا ما عندهاش زهر مع الناس ، وحدانية و ما لقات حد يحبها و يحن عليها ، فدت من حياتها بالطريقة هاذي ، تحب ترتاح ، تحب ترتاح بلحق ما عادش فيها !
شدت في الحيط و وقفت ترد في النفس كيف حست الدنيا دارت بيها ، الدار مازلت بعيدة تقريبا ربع ساعة أخرى على ساقيها باش توصل و هي موش منجمة تتحرك خطوة للقدام حتى السخانة بدأت تعطي مفعولها فيها ، بقات ساندة راسها على الحيط تدعي ربي يبعثلها بنت و لا ولد حلال يعاونها !...
خرج يلوج على الغاز ، حومة كاملة ما فيهاش ، رصاتلو جاي دبوزة من برا الحومة ، مازال كيف دار الدورة و قابلتو هي بايدها ؤ تو مدة كبيرة من عرس زياد و هو وين يشوفها يتفاداها !
واقفة شادة الحيط ما فهمش شبيها ، قلبو غمو من جديد ، خاطرو تفجع عليها !
حبس الكرهبة و هبط يجري سندها على كتفو ، يحكي و متحير عليها !
_رانيا شبيك لباس !
طلعت راسها وين قابلتها عينيه ، وجهو اعطاها الامان لحضتها ، تكات راسها على كتفو خافت لا تطيح كيف تبعد على الحيط ! تكلمت بصوت ضعيف ، وصلو الحالة الي هي فيها !
_مريضة طارق ، راسي ، السخانة !
تحكي و ترعش و هذا ما غابش عليه ، مد يديه و شدها من حزامها ماشي بيها ناحية الكرهبة ، حل الباب و ركبها و طلع بجنبها يسوق و يحكي !
_ما تخافش رانيا ، باش نهزك توا للسبيطار !
مفعول السخانة على مفعول احساسها بيه المدة الآخرة ، تكلمت و هي موش واعية اش تقول !
_ما تخلينيش طارق ! طارق !
قعدت تعاود فيها و هو يغزرلها قلبو خضو لحضتها ، رغم محاولاتو الكل المدة الآخرة باش ما عادش يشوفها و لا يكونتاكتيها الا أنو ما نجمش يخرجها من مخو ، ساعة ساعة كيف يشوفها يسرح فيها بعيد !
تلفت يغزرلها كيفاش ترعش ، مد يدو و جبد الفاست متاعو و غطاها بيها !
يسوق و طائر ، خايف عليها ، طفلة يتيمة و المكتوب خلاها وحدانية لا والي و لا تالي ياقفلها و ياقف عليها !
وصل للسبيطار ، ،هبط يجري و خرجها من الكرهبة ، ساندها على يديه ، كابس عليها في حضنو ، احساسو بيها اليوم غير ، كملت عليه هي كيف تكلمت بصوت ذابل و ضعيف !
_بردانة !
لزها ليه و دوب دخلو ، قعدها على الفوتاي و مشى يجري يقص ليها في توصيل باش تعدى بيه !
رجع بجنبها باعد ما خلص يستنى في دورها عند الطبيب !
تكلمت و هي تغزرلو ، تتبسم ضاهرة تهتري من جديد !
_ما تخلينيش وحدي !
قهرتو اليوم، مرضتها قسمتلو قلبو و كسرت ضلوعو !
جبدها لحضنو من جديد ، لا همو الفرامل الي يغزرولهم و لاهمو انو هي لو تفيق و تهبط سخانتها باش تكش عليه و ممكن حتى ما تخلي ما تسمعو !
✴✴✴✴
و هااذي الحلقة الي وعدتكمم بيهااا 😘♥️
و هااي نوورهاان مشاات للطبيب😉
كيفاش جااكم حديثواا ريحكم انتم والا العكس زااد فجعكم😐
و زعماا تتعاافى و تجيب الصغاار😉
و زيااد محلاااه وااقف معاهاا و مش مخليهاا وحدهاا🥰
كيفوا كيف طاارق الي ولا الاماان بالنسبة لراانية😍 الي مسكينة بلحق عندهااش زهر 🥺
و ممكن زهرهاا جاا في قالب شخص والي هو طاارق🥰
انشالله عجبتكمم الحلقة🤍
و ملتقااناا بعد في بارت اخر نهبطهاالكممم😘
انشالله نهااركمم زيين حباااايببب قلللبييي💗💓
أنت تقرأ
💫💘 العار 💘💫
Romanceبنوتااتي 😍نفتتحواا كرونيك جديدة من اعز ما تقرااو💕 حكاايتها متأكدة بش تعجبكم 😘و بش تعيشوا معها لحظة بلحظة🤍 و بش تغوصواا في احداثها ♥️ومع كل حلقة بش تزيدوا تتعلقوا بيها🥰 و كيما تعرفوني منودكم كان بالحاجة الممو و الباهية🥰 اقراوها و نش بش تندمواا...
