💫💘 العار 💘💫

💓 الحلقة 5...💓

💫💘💫

☄️"العشق حين يأتي يسرق الروح  وتسقط الإعمار دون مناقشه..."☄️

قاعدة بجنب نجاة الي كسرتلها راسها بحكاياتها ، عندها ثلاثة الايام ساكنة عندها روحها طلعت ، ما تخلي حد رايض ، اخبار الحومة الكل عندها ، من كبيرها لصغيرها !
طلعت راسها على صوتها !
_موش أنت تلوج في خدمة نورهان ! و الله باب الجنة محلول في وجهك يا مراة !
طلعت راسها غزرتلها !
_صحيح ، تعرف شكون حاشتو ؟
_اي نعرف ، عبلة مرت الناجي ، اللي عندها البوتيك الكبيرة في اول النهج ، عرفتها ؟
قعدت تغزرلها حايرة !!
_ما عرفتهاش !
_لا تعرفها ، و لا السنين نساتك في الناس ، البوتيك الكبيرة الي فيها ايتاج للنساء و البيبيات و ايتاج للرجال ! هاك البوتيك الي بابها بولار ...
_اه عرفتها ! شبيها !
_حاشتها بصانعة ، تشدلها الحانوت و تعاونها، عندها بنية وحدة و تحب معاها وحدة أخرى !
_بلحق ! اش خص كان تخدمني ! أما زعمة شهرية vendeuse ، باش تكفيني !
_تكفيك ، باش تعطيك 500 دينار ! انا قاتلي لوجلي على مراة تعاوني ، جيت في بالي أنت ! اش قلت !
تبسمتلها و تكلمت !
_ اش عندي نقول ، و الله تعمل مزية على اختك ، اش خص كان نبدى نخدم !
_مالا من غدوة الصباح ، نمشي أنا و اياك ليها !  ايا شد شد كاس التاي ، خليني نكمل نحكيلك على حميدة مرت النجار ، موش راجلها اعطاها طريحة ، قالو لقاها تحكي مع صاحبها القديم في الفايس بوك و واصلين للطلاق !
قعدت تغزرلها ، قداش تفد من طبيعتها ، ما تحبش تحكي على الناس و لا يهمها فيهم ، تتفكر كلام جدتها قبل ، كيف تقولها لا تعضم لا تتبلى !  أما ما عندهاش خيار ، هي حلتلها دارها و زيد فرحت بيها ، طيب و تحط و قائمة بيها !
ما تعرفش أنو نجاة ما حلت دارها و ما فرحت بيها الا ما تفاهمت مع زياد ، الي باش قبلتها في دارها الايام هاذي ، خذات من عندو خمسمائة دينار !
قامت خرجت تطل على الخدامة ، تشوف فيهم وين وصلو في الدار ، صحيح في الأول تغششت أنو تحكم فيها و خمم يصلح دارها ما غير ما تطلب منو ، أما توا ولات تدعيلو بالخير  ، كيف شافت الشيء الي في الدار ، شافت بارات الحديد الخايخة الي طيحوها من السقف و عوضوها بالجديد  ! شافت العرص الجديدة اللي انزادت للبيوت الزوز و توا لاهيين في السطح يسيجو فيه !
وقفت بجنب جعفر الي طلع راسو و غزرلها كيف تكلمت  !
_الله يعينكم !
_الله يخليك !
_مازال بارشا خدمة ؟
_لا ما عاد ما مازال ، نهارين ، غدوة الاولاد ينضفو الدار و باعد غدوة يعملولها تجييرة !
حلت عينيها تغزر ليه !
_علاه الجير !
_المعلم امرنا و أحنا نفذو !
تبسمت و طبست راسها ، قد ما عملت فيه قد ما كان هو راجل معاها !
دارت باش تدور وقت تسمع في شاف الشانطي جعفر يتكلم في التاليفون و ذكر اسمو !
_اهلا عرفي....لا كملنا توا ......جاي توا....باهي نستناك ...!
قعدت واقفة تسمع فيه ، فضولها غلبها ، ما تعرفش علاش حبت تشوفو لحضتها !
دخلت للنجاة تتبسم !
_اش قولك نهزو زوز تابوريات و نقعدو قدام الدار ، الطقس سخون و زيد قدام الدار نسيمة ترد الروح ! و نتفرجو في الماشي و الجاي !
_اي قلت الحق ، خلينا نخرجو نتنسمو !
خرجت هي و نجاة و هزت دبوزة ماء في يدها ، عينيها ماحت للجعفر الي مازال واقف على الحافة ، ضاهر يستنى فيه !
تلفتت دوب سمعت صوت الفران ! الكرهبة الكحلة و مولاها قدام عينيها..

كان عندو نسبة واحد بالمائة أنو يشوفها ،و شافها ، العين جات في العين و أه من عينيها ، أه منها نورهان ، سرقت قلبو و خلاتو عايش ميت بالحياة ، موش حاسس الدنيا ما غير محبتها ، غزرلها و تفحصها بعينيه ، ما ينجمش ما يغزرلهاش و الادهى أنو هي زادا غزرتلو ! رغم تعاهد مع روحو يبعد عليها بعد السماء على الوطاء و يحاول يتجاوزها من حياتو و كانها مازلت مسافرة  و موش موجودة بالنسبة ليه ! لكن كل شيء كان مبرمجو طاح في الماء و زادت عليه اللصقة نجاة الي نڨزت تجري ليه كيف وقف ، حجبت عليه طلتها !
_مرحبا سي زياد ، مرحبا ، الحومة نورت بيك !
_يعيش اختي يا نجاة , لباس !
_الحمد لله ، يكثر خيرك ، ! كان موش التفتوفة الي اعطتهالي أنت ما نلقاش باش نطيب طنجرة أنا و نورهان !
غزرلها و تكلم !
_توا غدوة يجيبلك  جعفر تفتوفة أخرى !
_تهنى على نورهان في عينيا !!
ڨحرلها و تلفت لجعفر ، فادد من احساسو المكشوف و الي الناس الكل قاريينو في عينيه !
يغزر لجعفر كيف حل الباب و طلع بجنبو ! غزر من الروتروفيزار بالسيف عليه ، حب يشوفها آخر مرة قبل ما يشد ثنيتو ، يعمبو قلبو و رخصو الي باقي يدقلها ! 
عينيه تشابكت في عينيها ، اليوم متعمدة تذوب قلبو بسحر عينيها ، عينيها الي ما شافلهمش مثيل !
شد ثنيتو و هو يحكي مع جعفر !
_اش عملتو !
_تقريبا كملنا ! مازال شوية تقرقيش و الدهينة !
_باهي ، ربي يعينكم و غدوة اعطي لنجاة خمسمائة أخرى !
_باهي عرفي !
_نسيت الشانطي الآخر مالا غدوة خلي زوز خدامة باركا و الباقي هزهم للبلاص بكملو الي مازال  ناقص فيه ، نحبو آخر الشهر حاضر !
_تهنى عرفي. نخلطو  بقدرة ربي !
رجع ركز في الثنية و مخو سارح ، ما يلزموش يقرب منها من جديد ، يلزمو يقعد بعيد ، يلزمو يستقوى على روحو ، لا عاد يغزرلها و لا يعبرها ، ماهوش شوية الي عملتو فيه ، الي لازمو يصير أنو يكون يكرهها و يبخر بريحتها ، أما هو قلبو عفس عليه ، يحكم في الناس الكل كان في قلبو ما عندوش عليه سلطان !

✴✴✴✴

بونجوراات علييكممم حباايبي😘
كيف رااكم انشالله تكونواا بخير😘

كيف جااتكم الكرووو لحدد الان🥺
مع العلم انو الي جاااي نااار اكثر💥
و بش تزيدواا تغوصواا في احدااثهاا🔮

شرااايكم في زيااد و حنييت قلبواا 🥺
هو حاالياا عاايش بين تضاارب قلبواا💫
و مخواا الي يقلوااا ينتقم و من جهة حاانن عليهاا و يحبهااا🥰

نورهاان زاداا قلبهاا بداا يميح ليه بسبب حنيتواا عليهاا💗
اما زعماا تستااهل فرصة اخرى او لا💘

يلاا خذاا رايي نحب نقراا ارااءكم توااا🥺
و شنو تتوقعواا ينجم يصير فالحلقاات الجاايين❤️

انشالله نهااركمم زيييين😘 و نبوووسكممم و نحببببببكمم وحدة وحدة♥️❤️🤍

جااااااااام🥺🙏