💫💘 العار 💘💫

💓الحلقة 43...💓

💫💘💫

☄️ "‏المسـافات بين البشر ،،،
ليسـت مقتـرنة بـالحدود ...
المسافات الحقيقية بيننـا هي مسـافات الأرواح ...
قد يحتل روحك شخصٌ بعيد ٌجداً وقد يجالسـك أحدهم ولا تشعر بـوجوده ...
دفء القلوب لا يأتي بلمسة يد إنما بلمسة روح ...
والبقـاء في القلب ليس لصاحب الكلام الجميل ...
بل لصاحب الموقف النبيل ...!!" ☄️

قاعد مقابلها  ، موش حاسة بيه ، اصلا موش حاملاتو و لا حاملة روحها انها رضت المهزلة هاذي تصير ، ماهيش باش تنجم تعرس بيه ، كيفاش باش تخليه يقربلها ، كيفاش باش تقربو و كيفاش و كيفاش ، اذا هي دقيقة معاه و قاعدة بعيد عليه و مخنوقة ، قلبها عند غيرو ، علاش تضلم روحها و تضلمو !
خلات امها ما قامت تجيب في القهوة و تكلمت ، باش تقول الصحيح ، و هو و ضميرو ! يا يرحم روحو و يرحمها يا يكمل يخنقها بحكاية عرسو منها ؛
_ضياء ! نحب نحكي معاك !
تبسم و جاوبها ؛
_الحمد الله كيف باش تحكي ! قريب نضن أنو غاصبينك عليا يا بنت الناس ؛
عرفت كيف تبدى الكلمة واقفة على طرف لسانك و يجي حد يسهلك باش تقولها ! تكلمت و هي مطبسة راسها !
_انا وافقت عليك خاطر بابا حب ! أما أنا كان عندي شكون !
حط الفنجان و غزرلها موش مستوعب ، هو خطبها هي بالذات خاطر عارفها صغيرة و بوها امام جامع ،  كان شبه متاكد انو ما عندهاش علاقة قبلو ، لكن توا صدمتو بكلامها ، تكلم و هو يڨحرلها ، عقليتو أنو ياخذ مراة عمرها لا صوحبت ولا عرفت راجل قبلو !
_اش معناها كان عندك شكون ! كنت مصوحبة ؟
طبست راسها و تكلمت !
_حبيت شكون و ...
قص عليها يصيح !
_خلينا من سخط الحب على راسك ، أنت كنت مصوحبة واحد قبلي ، تقابل فيه و تحكي معاه ؛ تخرج معاه ؟
قعدت تغزرلو مصدومة ، تكلمت و هي تحاول تتشجع خاطر رعبها !
_كنت نحبو و يحبني ، و زيد خطبني و بابا ما وافقش !
_تحبو و يحبك ؛ ما تحشمش على روحك توا ؛ أنت بنت شيخ أنت ؛
وقف و هو يهز فيها و يحط و باقي يصيح ، بخلوط امها عليه ؛
_شبيك وليدي ، علاش الصياح !
_جيبلي ذهبي و دبشي الي جبتو في الخطبة ، كل شيء حبس لهنا ، بنتكم ما عادش حاشتي بيها !
قعدت تغزرلو مصدومة ، هذا اللي ينطبق عليه مثل يا مزين من برا ، اش حالك من داخل و هو الكلام الرطب من برا و توا بان صحيحو و تخمامو ؛ ريح السد أكيد !
تكلمت بكل قوة ، موش عارفة منين جابتها !
_لحضة توا نجيبلك وسخك !
دخلت جابتلو ذهبو و خرجت وين خطفو من يديها و خرج ، تسمع في امها تسأل فيها و تعاود شبيه اش قتلو ، ما جاوبتهاش ، الحمد لله أنو هي اكتشفت معدنو من الاول المريض ، الحمد لله أنو ما تغابتش اكثر و كملت في التمثيلية هاذي و عرست بيه !
دخلت لبيتها و خلت امها تأكل في روحها ! اذا ما فماش محمد فما  فماش راجل غيرو و الضاهر أنو ما فماش محمد زادا ، خاطر على ما تشوف محمد امين كرهها و ما عادش عندو ليها حتى احساس !
مرتين يتقابلو في الحومة ، يقلب الدورة أول ما يشوفها ، قلبها دم على روحها و عليه ، ضعف و وجهو دخن و ضاهر تاعب كيف حالتها !
قعدت شادة بيتها لحد ما سمعت صوت بوها يناديلها !
_نعم بابا !
_ينعم عليك ، فهمني توا أنت وين تحب توصل ؛ كان في بالك كيف باش تحكي لضياء و يبطل الخطبة باش نتلز و نعطيك ليه راك تحلم ! الطفل هذاكا مستحيل تعرس بيه ، مستحيل !
طلعت راسها و غزرتلو بكل تحدي تحكي و عينيها في عينيه !
_اذا ما ناخذش محمد امين ، مانيش باش ناخذ غيرو ، مستحيل ، مانيش باش ناخذ حتى راجل آخر !
هزت روحها و دخلت للبيت ، تبكي تفرغ في قلبها ، مقهورة و موجوعة ، قلبها تليع بالوحش و وجيعة البعد ما اخيبها ،
جبدت تاليفونها و حلت تصاورو من جديد ، تصاورو الي هبطتهم من الفايس بوك ، كل وين تتوحشو تتفرج فيهم !
تاعبة من غيرو و تاعبة بلاش بيه ، حياتها ما فيهاش راحة و هي بعيدة عليه ، تعرف أنو هو مضلوم اكثر منها و تعرف أنو وجيعتو اقوى من وجيعتها ، و حاسة بيه ، حتى كيف سمعت بيه رجع يشرب ما نجمتش تلوم عليه ، كان كيف الغارق الي لقى قشة و شد فيها و جات الريح و طيرتها بعيد !