💫💘 العار 💘💫

💓الحلقة 38...💓

💫💘💫

☄️ "‏ثم إني أحبك بشڪلٍ آخر
أحبك هڪذا دون أسباب
دون وعي أو تفڪير مسبق
دون مقدمات أو تلميحات
دون لقاءات أو صدف مفتعلة
دون موعد ورسالة طويلة
دون أي نظرات متبادلة
أو أبتسامة هڪذا ببساطة
أحبك فقط....." ☄️

دخلو للطبيبة ، الطبيبة الي تبسيمتها ترد الروح و زادت تبسيمتها كيف شافت التحليل ، قلبها قريب يطير من الفجعة و هي تغزرلها ، تكلمت بلهفة حرقت قلبو من الخوف عليها !
_دكتورا طمني بربي لباس ؟
تبسمتلها اكثر و تكلمت
_لباس أكيد ، عندك جرثومة في فم الرحم هي الي معطلة الحبالة ، تراتمون بسيط و نعطيك معاه منشط للبويضة و بقدرة ربي فترة بسيطة و تحبل ، فقط تبع تعليماتي و من ضمن تعليماتي ، باش تقعد مدة 15 يوم متاع العلاج ما غير علاقة حميمة ، كيف نتهنو أنو الرحم نضيف وقتها تنجم ترجع لحياتكم الطبيعية و وقتها زادا عندنا تعليمات !
دموع عينيها الي رغرغت بالفرحة سرقت قلبو ، تكلمت بحماس كبير !
_يعيشك دكتورا ، يعيشك ، ربي يفرحك كيف ما فرحتني ، يعيشك ..
قعدت تعاود في كلمة يعيشك من فرحتها ، فرحتها الي مست قلبو و خلاتو يتبسم !
كتبتلهم الدواء و خرجو جميع يديه في يديها كيف العادة كابس عليها ، تلفتلها يتبسم !
_توا لازم منها 15 يوم راحة ، ياسر عليا بصراحة !
تبسمتلو و تكلمت بصوت حنين !
_حتى أنا ياسر عليا ، أما حاجة لازم منها ، نحب نبرا و نفرح و نفرحك بصغير !
_ان شاء الله حبي ، نصبر و بالسيف عليا ، المهم أنت تفرح !
شد الثنية و قلبو فرحان ، ضحتكها في حد ذاتها مضاد للاكتئاب ، فما بالك بيها ژاهية و تغنيلو. ! الثنية الكل تدندنلو مع أم كلثوم الي حطتها بالذمة !
وصلو حكاية الاربعة متاع العشية ، وصلها للدار و حل تاليفونو الي تقريبا لقى فيه اكثر من عشرين ابال ، معضمهم من محمد امين ، طلبو و شد الثنية للشانطي و هو مفجوع لا تكون صارت حكاية كبيرة في الخدمة و هو ما علابالوش !
_الو !
_الو عرفي !
_لباس محمد ، نلقى بارشا ابالات ، الخدامة الكل لباس ، اش صار في الشانطي ؟
تنهد و جاوبو و الغصة ماكناتو !
_سامحني عرفي ، الشانطي و الخدامة لباس ، أنا موش لباس ، حاشتي بيك عرفي !
_هاني جايك للشانطي محمد ، ربع ساعة و نكون بحذاك !
علق و مخو هزو يمين و يسار ، الكسرة الي في صوت محمد وجعتلو قلبو ، ان شاء الله ينجم يعاونو ! ان شاء الله !

يسمع فيه ، قداش غاضو ، يعرف ليعة العشقة و يعرف اش معناها يبعد عليك الي تحبو أو يبعدوه عليك نفس الشيء ، الي غايضو أنو هو يحبها و هي تحبو ، يعني الزوز متفاهمين لكن بوها و على ما يعرفو أنو متزمت و مستحيل يوافق ، اذا هو واخذ فكرة غالطة على محمد امين فصعيب تتبدل في ليلة و نهار !
تكلم و هو يغزرلو ،
_مستعد للاحتمالات الكل أنت و لا !
غزرلو مستغرب !
_شنية الاحتمالات الكل ؟
_انا باش نمشيلو توا ، و باش نحكي معاه و نحاول ، أما في صورة ما رفض اش باش تعمل !
بحر عينيه فيه موش عارف اش يحكي ؟
_مانيش عارف ! قلي ! دلني ! و الله كان يعرسلها بغيري نموت !!
قعد يغزرلو و ربت على كتفو يحكي !
_خليني نحاول معاه. ماكانش اذا الطفلة حاشتها بيك ، تفاهم معاها كيفاش تعقد عليها ، ماكش الاوب الي ياخذ وحدة اهلها موش موافقين عليه ، أكبر من 20 سنة هي ، موش هكا ! حطو بوها قدام الأمر الواقع ! أنا معاك و باش نعاونك أكيد !
خرجو جميع و شدو ثنية دار نوراة ! يدق في الباب و قلبو باش يطير من الفجعة ، خايف ما يحترموش و يزيد يهينو بحضور عرفو زياد !
تسمع في الباب يدق، حلت باب بيتها شوية و خرجت راسها تطل ، بوها الي خرج يحل في الباب و هو يتمتم و زاد رجع و هو يتمتم و معاه راجل اسمر و طويل مضخم ، و وراهم محمد ، محمد الي دوب شافتو قلبها تخلع بين ضلوعها ، خرجت من البيت و عينيها ركحت في عينيه ، عينيها تستجدى فيه ، لكن صوت امها الي كشت عليها ، خلتها ترجع تجري للبيت !
يغزرلو و يتفحص فيه ، حومة كاملة تقدرو و مستعرفين بجميلو عليهم ، هو الأول كل ثلاثة اربعة اشهر يبعثلو تفتوفة باهية باش يشوف اش ناقص في الجامع ، ما نجمش يسكر في وجهو الباب و لا يردو و لو أنو محمد الي معاه لو يلقى الموت يبعثهالو موش يعاود يقبلو من جديد في دارو !
_شيخ حمد سامحني جيناك ما غير موعد !
غزرلو و تكلم ، ما يحبش يفسدها مع زياد ، أما الي جاي عليه مستحيل ؛
_مرحبا بولدي ، أما الي جيت عليه نقلك راو مستحيل !
طلع راسو و غزر لمحمد الي وجهو مشى ألوان ألوان !
_يا شيخ ، صلي على النبي ، الاولاد رايدين بعضهم و محمد أنا نضمنهولك راجل و يهنيك عليها !
_بنتي اعيطتها و وفى ، نهار السبت خطبتها ؛ يعيش ولدي ، أنا نقدرك و نعزك أما مصلحة بنتي أنا نعرفها ! نوارة اعطيت فيها الكلمة لولد عمها ، ياخي باش نخير البراني على ولد العم !
قعد يغزرلو ، ضاهر متمسك برايو ، تكلم كمحاولة اخيرة ليه !
_باش تضلم بنتك ، البنية تحبو و حاشتها بيه !
_الحب الحلال الي يجي باعد العرس ، الي صار باش نعتبرو غلطة صغر من بنتي و أنو صاحبك هذا غر بيها ، و ولد عمها تو يربيها من جديد ! شرفتني زياد ولدي !
وقف و جبد محمد معاه ، محمد الي تحجر من الصدمة ، موش فاهم الراجل هذا عندو قلب و لا عندو حجرة بين ضلوعو !
يجبد فيه و تكلم !
_هيا نروحو محمد ، هيا !
تلفت للشيخ ، يحكي و عينيه مرغرغة !
_نوارة ليا و الله لا تكتب لغيري !
جبدو و طلعو في الكرهبة ، تلفتتلو يحكي معاه !
_تفاهم معاها و اخرجو اكتبو الصداق ، أنا نعطيك دار في البالاص الجديد و نعاونك في كل شيء ! ما تضيعش الطفلة من يديك و لا يهمك في الناس اش تحكي و اش تقول ؛ المهم أنت وين ترتاح ، أنا عن تجربة نحكي ، لو تبعت الناس راني لتوا مقهور ، أما تبعت قلبي و هاني مرتاح ! شوف كيفاش تحكي معاها و تفاهمو و كلمني باش نركحلك الامور !
طلع راسو و غزرلو ، قلبو ملخلخ و موش عارف كيفاش باش يتحصل عليها و هي لا تاليفون و لا باش تنجم تخرج من الدار !
_كيفاش باش نتحصل عليها ! فكولها التاليفون ! و ما يخلوش فيها تخرج !
_تو نلقالك حل ما تخافش، تو نلقالك حل !
شد ثنية دارو و هو معاه ، ماهوش باش يخليها بيه ، احساس حسو قبل و لو موش نفس الحكاية أما ما يود بيه حد و لا يحب يشوف حد محروق على حبيبو !

✴✴✴✴

صباااح النوووور حباايبي😘
شنحوااالكممم و شعااملييين💓

هاااي حلقة اخررى مش طوييلة اماا بعد نزيدكمم وحدة اخرى انشالله🥺

هااي هاناا رتحناا على زياد و نورهاان 🙏
اما مسيكن زيااد زعماا ينجم يصبر 15 يووم 😂
و محمد و نواارة مسيكناات والله قلبي وجعني عليهمم 🥺
حتى زيااد مافلش في بوهاا 😐
اما شنو تتصورواا نوارة تعمل 😉
تهرب مع محمد ولا العكس🤫
انشالله عجبتكمم الحلقة 😘
واستنااو الاحدااث الجاايين نااار و شرااار🔥💥
انشالله نهااااركممم زييين😍