💫💘💫
☄️"انها من ذلك النوع الذي لا يمكن ان تحب بعدها ابدا.....
انها الاولى و الأخيرة... "☄️
عندها جمعة من الي رجعت ، الحومة متبدلة بارشا على ما خلاتها ، الناس و الوجوه و حتى الطبايع ، وقفت مع نجاة جارتهم ، تقريبا ساعة في الشارع و هي تحكيلها ، حكاتلها كل شيء صار في الحومة في غيابها ، على الي عرس و الي سافر ، الي شد الحبس و الي توفى ، ما خلات حد ما جبدتوش ، و أهم حد و اكثر حد تشدت لحكايتو و قعدت تسمع فيها هو زياد ، ماهيش مصدقة أنو ما عرسش بعدها و لا خطب ، تحكيلها كيفاش عمرهم ما شافوه واقف مع طفلة ، تحكي و تحكي عليه و ما خلات شيء ما حكاتش عليه ، النقلة الي صارتلو ، و كيفاش صبح يملك شطر الحومة و الناس الكل يا تخدم باسمو يا معاه ! الناس الكل تهابو و تقدرو و تسمع كلامو !
تبسمت و هي تسمع فيها ، حتى هو يستاهل ، قد ما كان باهي معاها ، قد ما كان يجري في حظوظها ، أما هي قبل عمرها لا حبتو و لا عمرها حست باحساس معاه كيف الي حستو لفراس ! خطبتهم التقليدية و عشقتو ليها الي حكالها عليها وقتها ، خلاتها توافق و تجرب تعرس بيه ، لكن في مدة قصيرة وقت دخل لحياتها فراس ، بارشا حاجات تبدلت , كان عكس زياد في كل شيء ، كان النقيض متاعو و فرد وقت أصحاب هو و اياه ، غزرتو ليها كانت تذوبها و قلبها يدق اول ما يراه ، و قداش فرحت كيف قاللها أنو تعجبو غير زياد بيناتهم ، ما كانتش من العاكسين و سلمت فيه ، ما كانتش تنجم تجازف و تكتم مشاعرها و تعرس بزياد ، كانت ديما تقول العمر واحد يا نعيشو مع حد نحبو يا ما نعيشوش !
شدت الثنية ماشية للخضار ، مازلت موش عارفة اش باش تعمل و كيفاش باش تعيش و هي خدمة ما تكسبهاش !
تمشي و تشوف في بلاص كبير و جديد ، قاعد يتبنى ، عمارة تقريبا فيها سبعة ايتاجات ! سبحان الله ، الأرض هاذي كيفاش كانت و كيفاش ولات !
وقفت تتفرج فيها ، لو عندها فلوس تو تكري دار فيها اول ما تحضر و ما تعيشش في الدار الي عايشة فيها توا ، الدار الي ساسها موش راكح و ممكن تطيح عليها لقشة ليلة من الليالي !
طلعت راسها على حس الكرهبة الي وقفت قدامها ، قلبها تقبض و النفس تقريبا ضاع ، هو من جديد ، عينيه حادين و غزرتو نار !
حل الباب و هبط و قدم ناحيتها ، باقي عينيه راكزة في عينيها !
رغم سخانة الطقس و الشمس الي تنقب الرأس ، حست روحها بردت لحضتها ، من الخوف الي سيطر عليها !
تلفتت باش تدور ، ما تحبش مواجهة من جديد معاه ! لكن صوتو وقفها , كيف ذكر اسمها
_نورهان !
كبست بيدها على طرف روبتها و تلفتت ، موش عارفة كيفاش باش تتعامل معاه ، هو ضاهر موش باش يسيبها ، لا باش ينسى و لا يسامح على الي صارلو منها ! موش باش يرحم ضعفها و أنو ربي خذالو حقو كيف عيشها الي عيشتهولو و اكثر زادا !
تلفتت تغزرلو ، عينيها بلحق اكثر حاجة تهبلو في الدنيا هاذي ، و هي ركزت عينيها فيه لحضتها ، مهمشتو ، من الي كان موقفها باش يسمعها كلام يوجع يبرد وجيعو ، لقى وجيعتو زادت بقربها ! تكلمت هي وقت قعد ساكت !
_انا ما رجعتش نلوج على المشاكل و لا رجعت عندي نية معاك و لا ليك ، رجعت خاطر الدنيا غدرتني كيف ما غدرتك ، رجعت خاطر نحب نعيش مستورة ! ما نعرفش كان كلمة سامحني تبرد القلب و لا ترد الروح الي ضاعت ، أما بلحق نقلك سامحني !
دارت باش تكمل ثنيتها وقت تنطر وقف قدامها ، يديه كابسة على معصمها ، يحكي و النار شاعلة في عينيه !
_على شنية نسامحك ، أه فهمني ! على شنية ! و شنية صار باش نسامحك عليه من اصلو ! كسرتلي قلبي ! كرهتني في النساء ! شنية الي صار ! خليتلي عار جرت عملتك ! أه شنية الي صار ! لعبت بيا كيف اللوڨو ركبتني كيف ما حبيت أنت و باعد فركتني و مشيت ! على شنية تحب نسامحك ! مانيش باش نسامحك !
تكلمت و هي تغزرلو و لمعة الدموع في عينيها !
_ما تسامحنيش ، أنا اصلا مانيش ملوجة على سماحك ! أنا نلوج نعيش ما غير مشاكل ! مانيش قدك ! ما نجمش نواجهك ، خليني رايضة ، خاطر ربي سبحانو خذالك بثارك فيا و الي حسيتو أنت قبل ، انا توا نحس فيه !
مازال واقف قدامها ، يديه كابسة على معصمها ، كلامها ما بردوش زاد شعلو ، يعني هي موجوعة خاطر الكلب هذاكا خلاها و هرب عليها !
_انت ما حسيت شيء لتوا ! انت رجعت لقبرك في الحومة ، كان فيك طرف عقل تخرج منها اليوم قبل غدوة !
تكلمت و الدموع الي كانت تلمع في عينيها هبطت تتجارى وراء بعضها ، مسحتهم بخفة يد و حاولت تتبسم و هي تحكي تحب تغطي ضعفها و قلة حيلتها !
_ما نجمش نخرج من الحومة ، ما نجمش ! ما عنديش وين نسكن و لا عندي كيفاش نعيش ! اذا أنت تحب تننقم مني ، فاخر همي انتقامك زياد ، آخر همي ! كل همي توا ، كيفاش نأكل و كيفاش نرقد تحت سقف ممكن في كل لحضة يطيح عليا ! كيفاش نحمي روحي في الدار هذيكا و أنا براسي نعيش !
قالت كلامها و عاودت مسحت دموعها الي عملو بلعاني و زادو هبطو قدامو ، ماهيش تسخف فيه ، أما هذاكا الواقع. المشاعر ثنوية مع ضروف الحياة ، ما تنجمش تخمم في الحب و لا الكره و لا أي احساس و أنت جيعان ، ما تنجم تخمم في شيء و أنت بردان ، و أنت خايف. هذوما احاسيس يلغو أي احساس بعدهم من قوتهم !
فكت روحها منو و مشات خطوات رزان لحضتها برزن زهرها في الحياة ، هي غلطت و الناس الكل تغلط و كل حد غلطتو كيفاش ، صحيح غلطتها كبيرة ، صحيح انانية كانت و شكون فينا ما يحبش روحو و شكون فينا ما يباجلش روحو على الناس الكل ، كلنا عندنا الانا , أما تختلف من مكان للمكان و من زمان للزمان ! و منك أنت و فيك زادا !
قعد واقف على بلاصتو يغزرلها و هي تبعد ، احساسو مخلوض ، موش عارف ينقم عليها و لا على قلبو الي قاعد يحنلها ! موش فاهم علاش كيف حبها الدنيا علاش ما اعطاتوش محبتها !
رجع للكرهبة و هز التاليفون
_الو جعفر وين أنت ؟
_اهلا معلم ، هاني جاي للشانطي توا !
_لا ما تجيش للشانطي ، هز الرجال و أمشي للادراس الي باش نعطيهالك في الحومة ، اعملو طلة على الدار و اعملو اللازم الكل !
_حاضر عرفي تهنى !
_شوف السطح زادا ، طلع حيوطو كاملين !
_حاضر عرفي
اعطاه الادراس و علق التاليفون ! مهما يعمل ، قلبو الذليل ليها يغلبو ، ما ينجمش يجيه نوم و هو يتخيل فيها راقدة و سقف خايخ فوق منها ! و لا ينجم يرتاح و سطحها مكشوف ، موش عارف هي بلوة و لا دعوة شر طاحت فيه ، أما قد غلو عليها و قد غشو منها ، قد ما هو حانن عليها ، قد كرهو ليها قد ما قلبو قاعد يدقلها !
✴✴✴✴
بونجوراات علييكم حباايبي❤️
كيف حاالكم انشالله تكونواا بخير🤍
يلاا نبدااو بحلقاات اليوم😘
ليوم بش تتعرفوا اكثر عالشخصياات فالحلقاات الجااين⚠️
و نتصور الحكاية بديتوا تفهمواا فيهاا💓
شراايكم في نورهاان 😉
و شنو تتصوروهاا عملت باش وصلت الاوضاع للمرحلة هااذي💞
انشالله تكون عجبتكم الحلقة🥺
و استنوني بعد نزيد نهبطلكممم😍
جااااااااام و تنسووش ارااءكمممم🥺🙏
أنت تقرأ
💫💘 العار 💘💫
Romanceبنوتااتي 😍نفتتحواا كرونيك جديدة من اعز ما تقرااو💕 حكاايتها متأكدة بش تعجبكم 😘و بش تعيشوا معها لحظة بلحظة🤍 و بش تغوصواا في احداثها ♥️ومع كل حلقة بش تزيدوا تتعلقوا بيها🥰 و كيما تعرفوني منودكم كان بالحاجة الممو و الباهية🥰 اقراوها و نش بش تندمواا...
