💫💘 العار 💘💫

💓الحلقة 64...💓

💫💘💫

☄️ "مهمَا تَقدم بِي العُمر؛ سَتبقى رؤيتك من  الأشيَاء التي تأسُر قلبي.." ☄️

غفات على بلاصتها ، تسمع في صوتو مشى في بالها تحلم ، كبست على عينيها تحب ترجع لحلمتها من جديد ، راحتها ولات كيف تغفى و يجيها في المنام !
_نورهان , نورهان !
حلت عينيها و تنطرت بجنبو ، هو فاق ! أنو ينادي عليها أول ما يحل عينيه ، حاجة فطرت قلبها لحضتها ، قربت و جبدت يدو كبست عليها ، و تكلمت !
_روح نورهان ، زيدوني أنا لهنا بجنبك !
يحل في عينيه بالسيف ، حاسس راسو رزين و بدنو بكلو مخدر ، حاسس تقولش تعدى عليه تران ،
نضرو مضبضب لكن ما ينجمش ما يشوفهاش و هي شوفتها تحفرت في روحو من داخل !
يخرج في صوتو بالسيف وقت اوضاحت الرؤية ليه و لمح عينيها !
_ما تبكيش نورهان !..
مسحت دمعتها و تبسمت !
_نبكي من الفرحة ، خليني نمشي ناديلك للطبيب !
خرجت تجري تنادي للطبيب الي جاها بالوقت ! يتفقد فيه من كل شيرة !
_الحمد الله على سلامتك سي زياد ، غصرة و تعدات ، لباس باذن الله ! نزيدو نعملو تصاور على راسك نطمنو بيهم !
خرجوها البر وين جابو فرامل باش يهزوه بفرشو للتصوير بالاشعة ! واقفة قدام باب البيت و تستنى يرجعلها من جديد ، الحمد لله ربي غزرلها بعين الرحمة و رجعلها راجلها من جديد ، كبست على كرشها كيف حست ببنتها تتحرك ، تتحرك بصفة غريبة كانها فرحانة أنو بوها صبح بخير !
تغزرلهم مرجعينو و الطبيب بجنببو يتبسم !
_لباس دكتور !
_لباس مدام ، الحمد لله على سلامتو ، فقط باش نكملو نخلوه مدة مراقبة ، لين تتحسن حالتو و ينجم يرجع من جديد لحياتو ! ديجا أول حاجة توا باش نحولو السيروم و باش نجيبو فطور الصباح يفطر !
_الحمد الله دكتور ! الحمد لله !
دخلت معاه للبيت ، وين عينيه تبع فيها ، هو اصلا موش متفكر شيء و لا في مخو حاجة غيرها ، نورهان و قداش فرح كيف لقاها بجنبو اول ما قام !
رجعت بجنبو و شدت يديه , باعد ما الفرملية استواتلو راسو و عدتلو الفرش و خرجت ، عينيها معلقة في عينيه و الدموع تلمع فيها ، تتبسم و تعاود ! قربت منو و باستو من جبينو و تكلمت بصوت حنين !
_ربي يخليك ليا زياد ، ربي لا يوريني فيك وجيعة من جديد ، نموت من غيرك و الله نموت !
كبس على يديها ، مازال ضعيف و يتحرك بالسيف ! تكلم و باقي صوتو يخرج فيه بالسيف !
_اللطف عليك ، ما نجمش نخليك نورهان ، ما نتهناش عليك أنت و بنتي!
تبسمت و جبدت يدو حطتها على كرشها الي بالزهر تحركت لحضتها كانها تسلم على بوها اللحضة هذيكا !
فطرتو و قعدت تحكيلو على الي صار الكل ، عليها و على الخدامة و الخدمة و حتى على عمو ، الناس الي تحبو و تفجعو عليه الكل ذكرتهم واحد واحد ! ما نسات حد ! اصلا الناس الكل كانت تدعيلو بالشفاء و يستنو في رجوعو ليهم !

الاحباب و الأصحاب تلمت و الناس الكل جات تزور ، كل من يسمع أنو لباس و انو فاق بخير ، يجيه يجري !
كمل جمعتين في الكلينيك و خرج ، الفاتورة بلحق كانت نار ، فيها 214 مليون ! موش فاهمة كيفاش حسبوها الليلة الوحدة موش عارفة كيفاش حسبوها ،  أما المهم تو و راحتو و رجوعو ليهم ! 
خلاتو يتفرج في التلفزة في الصالة و دخلت للكوجينة ، الكبد الي ما تحملش ريحتها حملتها في خاطرو ، زادتو سلاطة خس و طماطم و كعبات فريت معاهم ! حطتلو الطبق قدامو و قربت منو توكل فيه !
_ما تعبش روحك حبي ، تو نأكل وحدي ، ديجا الحمد لله اليوم هاك تشوف !
تبسمت و قربتلو لڨشة كبدة و حطتها في فمو و تكلمت !
_انا نحب نوكلك ، و الله نفرح كيف نتلهى بيك !
تبسمتلها و تكلم !
_ان شاء الله ديما فرحانة نورهان ، ان شاء الله ديما الضحكة مالية وجهك المزيان !
طلعت راسها و غزرتلو ، ضحكتها مربوطة بيه و حياتها بين يديه ، ما تتصورش تنجم تفرح و هو موش موجود و لا تنجم تعيش اصلا ! هو الاكسيجان الي تتنفسو كل لحضة كل دقيقة ! مستحيل تنجم تبعد عليه أو ترضى يالبعد  مستحيل !