💫💘 العار 💘💫

💓الحلقة 75...💓

💫💘💫

☄️ "يعانقني ...طيفك ....كل صباح.....
ليعبث بي عشقا .. فاعشقك اكثر مما كان..." ☄️

فاقت على بلل تحتها ، ماهيش فاهمة شيء ، الاغلبية باش تولد !
تلفتتلو تفيق فيه ، مفجوعة ، صحيح الطبيب متاع القيروان قاللها من أول ما دخلت للتاسع تنجم تولد في أي وقت و كانت متوقعة و محضرة فاليزتها  الا أنو كيف جاء الوقت دخلت بعضها !
_زياد يا زياد ! امان فيق !
تلفتلها حاير ، موش موالفة تعيطلو باسمو ، ديما زيدون و لا حبي !
_لباس حبي ، شبيك !
_فيق باش نولد توا ! اغزر الماء ،  قوم هزني للكلينيك !
نڨز من الفرش يلبس في دبشو و تلفتلها !
_دبشك  حاضر حبي !
_حاضر حاضر ! أما يلزمني نعمل دوش سخون قبل ما نمشي كيف ما قالي الطبيب  !
_باهي حبي ، ايجا ندوشلك !
مد يدو و شدها ، يسايس فيها و يعاود خايف يقوى بيها الحس قبل ما تكمل تحضر روحها ، دوشلها بالماء الدافئ كيف ما قاللها الطبيب و عاونها باش تلبس دبشها الي محضرتو لللحضة هاذي !
شد الثنية باعد ما طلب طبيبها الي في القيروان  قالو يهزها للكلينيك توا يخلط عليهم !
تفكر أنو ما فطرتش و حتى البارح ما كلات شيء خاطرها متقلقة  ! وقف قدام للباتيسيري و خطف روحو شرالها قهوة و كرواسون ، كلاتو في الثنية !
وصلو ، و من الباب الفرامل قامو باللازم خذوها من عندو و عدوها للاختصاصي الي عندهم باش عمللها ايكو و اللازم الكل !
قلبو مغصور ، قد ما هو فرحان ببنتو الي باش تجي الدنيا قد ما خايف على حب حياتو ! قعد يمشي و يجي حتى بلاصة ما سايعاتو ! سال في الريسابسيون وين قالولو يعملولها في التحاليل اللازمة قبل الولادة   ، قد ما حاول معاها باش تولد بالعملية و ما قبلتش ! طول ما هي تنجم تولد طبيعي ما فماش علاش العملية !
تعدى عليه صباح كامل و هو يستنى ، من الثمانية جابها لحد 13 و مازلت ما ولدتش ! الناس الكل علمهم و الي يكلمو يقولو يدعيلها تقوم لباس , خاطر كان يحب بنتو تجي للدنيا مائة بالمائة ، الا أنو يحب الف بالمائة مرتو تقوم لباس !
مازال شارد و يسمع في البنية متاع الريسابسيون تعيطلو !
_ماسيو ! يا ماسيو ، مبروك المدام ولدت و شوية و يهبطوها لبيتها تنجم تمشيلها وقتها !
تبسم للمراة بخلاف النذر الي عاملو أنو يحجج ثلاثة من الحومة ، فهو حالف أنو البشارة الاولى تكون مليون !
جبد الكارني دي شاك متاعو من جيبو و كتب شاك و صحح فيه و مدهولها !
_ماسيو الخلاص يكون في البيرو هذاكا الي مكتوب عليه محاسبة ، موش عندي !
تبسم و جاوبها !
_هذا مبروك بنتي الي جات بخير و مرتي الي قامت لباس ، عامل نذر الي يعطيني البشارة نعطيه مليون و كتب ليك !
خذات من يدو الشيك تتبسم و تكلمت :
_ يعيشك خويا ، تتربى في عزك و يفضلك المدام يا ربي !
تبسملها و تكلم !
_ يعيشك ، البيت وين ؟
_امشي في الطويل ، البيت نومرو 7 ، غادي تو تلقى المدام !
قريب يجري في هاك الكلوار غيرش حشم من الناس ؛
دق الباب و دخل و هو يتبسم ، و قداش مس قلبو منضرها ،
_الحمد لله على سلامتك حبي
_يسلمك زيدون
ضاهرة تعبت و صار فيها  يغزر لبنتو الي في يديها ، بنتو قد الطرف ، عينيها مغمضة و يدياتها  الي تحرك فيهم يزوغبو على ما كانو صغار ،  قرب منها  باس بنتو و خذاها في يدو كبر في وذنها ، كيف ما يعرف و يوعى و قراى الفاتحة و رجعها لحضنها ، تلفت لنورهان و قعد  بجانبها شد يديها و كبس عليها و هو يتبسم :
_الحمد لله على سلامتك مرة أخرى  نورهاني ! تتربى في عزنا ، في حنيتك و قلبك الكبير ، في المحبة الصافية الي ما بيناتنا ! ما شاء الله تشبهلك بارشا !
تكلمت و هي تتبسم ، تعرفو قداش يعشقها و يعشق عينيها !
_تشبهلي ، نسخة مني ! خذات حتى عينيا ! يعني قد ما تمنيت تكون تشبهلك ما جاء فيها شيء ليك !
تبسم و كبس على يديها !
_بلعكس احسن حاجة انها تشبهلك ، تكون مزيانة كيفك ، تكون عندها نفس عينيك و تكبر و يعشق فيها ولد حومتها و يخش الخلاء عليها و يجيني يخطبني فيها و ما نعطيشي نقولو أتعب عليها كيف ما تعبت أنا على امها !
تبسمت وتكلمت و يديها في يديه
_ربي يخليك ليا زيدون ، ربي يخليكم ليا أنت و عشق بنتنا ، يا ربي يدوم فرحتنا على طول !