💫💘 العار 💘💫

💓الحلقة 2...💓

💫💘💫

☄️"اليوم الذي وجدتك فيه أدركت معنى أن يُصاب الإنسان بإنسان آخر ..."☄️

رعشت و هي تسمع في صوتو ، و كيفاش تنساه , تنسى اكثر انسان حبها و اكثر انسان ضلمتو في الدنيا هاذي !
قدمت ناحية الباب ، حلتو و خرجت ، وقفت قدامو ثابتة ، شعرها المبلول لحضتها تهز فيه النسمة و تجيب ،  تغزرلو  و رغم الخوف الا انها تعرف أنو مستحيل يضرها ! مستحيل !
واقف مقابلها، عينيه تڨدح نار ، رجعت و ماهيش خايفة و الي زاد على ما بيه ، نضرة الثيقة الي تغزر بيها ، تقولش موش نفسها هي الي من ستة  سنين خلاتو فضيحة ، خلاتلو عار ملازمو سنين ، ماهوش مسامحها و لا برد من ناحيتها ، نار مازلت شاعلة فيه ، الي عملتو هي و هي واعية و راشدة بعقلها ما يعملوهش مراهقين , ما كانتش صغيرة باش يسامحها و يقول طيش صغر ،  عام وراء عام و كل وين يتفكرها نارو تڨيد ، خلاتو كيف المهبول !
سنين يستنى فيها و يستنى في النهار  الي يتجمع بيها ، هو يحضر في دارو باش تدخل ليها و فرحتو وقتها ما لهاش حدود و هي اش عملت ، هربت مع غيرو و موش غريب عليه ، مع ولد عمو و عشيرو ، حومة و عرش كامل تشمت فيه ، قد ما نصحوه اصحابو و غيرهم ، قالولو فكك منها ، سيرتها مع غيرك و ما صدقش فيها ، كان كيف يسالها تقولو يكذبو عليا يا ريتها قالت الحقيقة كان تقبل الي صار و حاول يحب من جديد ، كذبت و غدرت  و اليوم بعين صحيحة راجعة للحومة و ساكنة فيها ،  راجعة للحومة الي هو يكسب شطرها و الي كلمتو تمشي على كبيرها قبل صغيرها ! جاية لتمرميدها على يديه !
قدم خطوة ناحيتها وقت الي حبسو صوت المنجي !
_يزي ، اعمل عقلك ، من وقتاش نستقووا على النساء احنا !
_عمي ، خليك بعيد ، الي صارلي من سنين أنا الي تضريت منو ! حد  غيري ما حس بالي حسيت بيه ! خليك بعيد عمي خليك بعيد !
يغزرلها كيف قدمت منو اكثر ، مشات الخطوات الي ما بيناتهم ، و وقفت ند للند ،  تحكي و تغزرلو بعينيها المزيانين !  حتى هي كبرت كيفو و ضربات شيب في شعرها ضاهرين !
_ اش باش تعمل باش تقتلني ، اعز ما تعمل فيا و الله ! ترتحني وقتها !
غزرلها مليح و تكلم ! عينيه مازالو ثايرين
_خاف مني نورهان خاف مني ، ما عدتش زياد الي عرفتو من سنين و الموت الي تحكي عليها باش تكون اهونلك من الي باش نعملو فيك !
دزها و تعدى ، رجع على ثنيتو  ، خلاها باهتة فيه ، وجيعة تزعرت فيها من جديد ، عملتها هاك العام لا يزي ضرتو هو و لا يزي ضرت روحها و كل حد داير بيها ،الوجيعة الي هي حاستها توا من فراس ، هو حسها من سنين ، حتى هي الي ضحات بالدنيا على جالو ضحى بيها و في ليلة و نهار هرب مع صاحبتها ،كانو لا كان و لا صار ! مسحت دمعتها الي سرحت على خدودها ، تستاهل الدموع ، تستاهل اكثر من هكا ، تستاهل كل حاجة ممكن يعملها فيها زياد أكيد ! هذيكا الدنيا كما تدين تدان و هي عندها بارشا دين !
دخلت  و سكرت الباب وراها و قعدت وراه ، ترعش يعني باعد السنين هاذي الكل مازال ما نساش ، مازال بنفس الحرة ،  دمعة جديدة سرحت من عينيها ، مسحتها ! و تبسمت !
الي هي فيه الكل خاطرها غدرت و خانت اكثر انسان حبها ، موش عارفة شنية احساسها توا ، موش فاهمة تسخف عليه و على روحها ! أما هو تبدل ، تبدل بارشا  و تبدلت معاه الدنيا ، بخلاف أنو كبر كيفها ، الكرهبة الي طلع فيها ، الي تسوى أقل شيء 80 مليون ! ما فهمت شيء و ما تحبش تفهم ، كل الي تعرفو أنو يلزم تتجنبو و تتجنب الناس الكل ، كل  الي تعرفو أنو الايام الجاية باش تكون صعيبة ! و صعيبة بارشا !
قامت من وراء الباب و دخلت لبيتها سكرت الباب  بالمفتاح ،  كيف سمعت حثلة و حس ! و صوت اولاد ضاهرين مربخينها زطلة و شراب ! الحومة ولات تخوف فعلا ، الحومة الي كانت امان ليها قبل بزياد ، ولات تخوف و الي يوجع اكثر أنو هي بدأت تخاف من زياد !
رجع للدار ، حاسس روحو مخنوق ، اش مرجعها ! خاطرها طلقت و ما لقاتش وين تمشي ، تمشي لجهنم أما الحومة لا !
يغزرلو و يغزر لحالتو ، الغش الي ضاهر من عينيه ، شيء كبير ، حتى في اكبر الصفقات و كيف يخسرها ما يتغشش بالطريقة هاذي ، ضاهر قلبو مازال مليع بيها ، الناس الكل عارفينو قاطع العرس بعدها ، علاقتو معدومة مع النساء رغم كثرة العروض ، شكون ما تتمناش واحد كيفو !
تكلم و هو يثبت فيه ! يثبت في ملامحو و وجهو !
_نحيها من بالك يعيش ولدي ، ربي معاها ، غدرتك و  اختارت ثنية غير ثنيتك و ربي طاح فيها !
طلع راسو و غزرلو ، ما ينجمش يفسر و لا يحكي ، المحبة الي حبهالها هو ، ما عندهاش حدود ، من الي يقرا للي كبر و تخرج ، للي خدم ، اربعطاش سنة و هو عاشق فيها و زيدهم الستة سنين الي خلاتو مليع مكوي من بعدها  و كان هي في بالو،  وقت خطبها و ما حبش يعرس الا ما يوفرلها دار ملك و عيشة هانية ، ياخي هي اختارت عيشة أخرى مع  حد غيرو و يا ريتو كان خير منو ، فراس ولد عمو ، الزاني ، الساقط ، قال شنية حبها و حبتو ، مستحيل يكون حبها كيف ما هو حبها ! نارو ما طفاتش السنين الي فاتت و برجوعها  زادت  لهبت من جديد !
تكلم باعد ما جبد نفس من الشيشة !
_رجعت لقضاها ، مانيش مسيبها ، لما تخلص الجديد و القديم !
جاوبو و هو يحاول يوزن كلامو قبل ما يتكلم ! يعرف الموضوع هذا حساس بارشا عندو !
_كيفاش باش تخلص ، ما عندها شيء ، هاك ترى كيفاش رجعت للحومة و سكنت في هاك الخربة ، اش باش تخلص ، نعرفك ما تتعداش على الولايا و لا تبع الحرام ولد خويا !
سكت و هو يسمع فيه ! موش عارف اش باش يعمل معاها أما عارف أنو النار الي في قلبو ما تطفى الا ما يشوفها متعذبة ، ما تطفى الا ما يشوف دموع عينيها ليل نهار ! و هذا موش صعيب عليه !

✴✴✴✴

شنو تتوقعوااه يعملل😉
و تتصورواا قلبواا يعطيه و ينتقم 🥺

حكاايتناا ميزالت فالبدااية 😍
و الي جااي نااار و شرااار 💥

بش تأدمنواا عليهاا و قولواا سوزاان قاتلكمم😂😉
الحااصل قولولي شنو ارااءكممم لحد الان🥰

نتلقااو غدوة في حلقاات جدد حماسيين💓

نحبببكممم و نبوووسكممم وحدة وحدة ❤️🤍

تنسااااوش الجاام و خلوولي ارااءكمممم🥺🙏