💫💘 العار 💘💫

💓الحلقة 24...💓

💫💘💫

☄️ "اذا اردت شيء  بشدة  فاطرق صراحه فان عاد إليك فهو
ملك لك الي الأبد وان لم يعد
فهو لم يكن لك من البدايه..." ☄️

قعدت تغزرلو ما عرفتش اش تعمل ، قبل طاوعت قلبها و ندمت و توا اش تعمل ، ما تنجمش ما تطاوعش قلبها و ما تقربش ، اذا هو عاشقها هي زادا عاشقة فيه ! حلت باب الكرهبة و ركبت ، يغزرلها و تبسيمة ترسمت على ملامحو ! كلمة يعشقها شوية على الي يحس فيه ! باش يطاوع قلبو و يا عمبو الدنيا و الناس قدام عشقتها !
تكلم و هو يتبسم !
_وين كنت ماشية ياخي !
حطت يدها على قلبها تهدي فيه ، لهجتو حنينة خلات حيرتها تزيد !
تكلمت بصوت واطي كانها توشوش فيه !
_كنت باش نجيب باكو حليب ياخي ..
تلفتلها يتبسم
_الشلاكة عملتها بيك !
طبست راسها و تبسمت !
وين سمعت صوتو من جديد !
_نحب نحكي معاك شوية ؛ أما خلي نبعدو على جوجمة الحومة خير !
يحكي و مركز قدامو ، مهرب عينيه خايف تقولو ما عنا فاش نحكو كيف المرة الاخرى ! لكن جوابها البسيط كان شافي و كافي بالنسبة ليه !
_باش نمشي حفيانة ؟
تلفتلها يتبسم !
_تو ناخولك شلاكة ! و زيد باش نقعدو في الكرهبة ماناش هابطين!
تلفتتلو مستغربة ، و الي زاد استغرابها أنو وقف قدام البوتيك الي كانت تخدم فيها ، هبط و خلاها حالة فمها مستغربة فيه ! و اللي زاد استغرابها انو ما بطاش
و طلع بجنبها و مدلها  شلاكة في النوار كيف ما تحب و زيد تاي 38 بكل بلاهة سالتو !
_منين عرفت التاي !
جاوبها بوجيعة تلمع في عينيه !
_عمري لا نسيت حاجة تخصك ، نعرفك تلبس 38 في ساقيك و 40 في حزامك ، نعرفك تحب في الالوان الاكحل اكثر شيء و بعدو الباج و الڨري ! نعرفك تحب الحلو الصباح و تحب تحريشة مالحة عقاب عشية ، تحب الشتاء و تكره الصيف !
هو سكت و هي طبست راسها ! و باعد كمل كلامو بتبسيمة حزينة !
_فما حاجة أخرى نسيتها   ما حكيتهاش ؟
طلعت راسها و غزرتلو في عينيه !
_فما ! ممكن بارشا حوايج ما تبدلوش فيا ! حاجة وحدة تبدلت !
تلفتلها يتبسم ؛
_شنية ؟
تكلمت بصوت ضعيف بارشا !
_احساسي بيك !
قلبو خض ضلوعو و هو يسمع فيها ! تلفتلها يقرا في تفاصيلها و ملامحها بعينيه ، لكن ما فهم شيء منها !
خرج من الحومة ، و شد ثنية وسط البلاد ، وقف الكرهبة في الشانطي متاعو ، ما فيه كان العساس الي بطبيعتو في الشيرة الآخرى !
تلفتلها بكلو ، يحب يحكي و يفرغ قلبو ، يحب يبرى من مرضها ، اذا ببعدها تليع و زادت وجيعتو ،  يجرب قربها الي عايش يحلم بيه !
جبد يدها و كبس عليها ! وين طلعت راسها و غزرتلو بعينيها ، ذبحاتو من جديد !
_ أه منك يا نورهان ، أه من عينيك ! ذبحتني بيهم ! ما نجمتش نبرا منك ! اش نعمل في روحي و فيك !
تكلمت و عينيها في عينيه ! ترعش من لمسة يديه !
_زياد أنا ..
تبسم و هو يسمع فيها !
_يا روح زياد ! أه منك و مني و من الي صاير فيا جرت محبتي ليك !
رعشت من كلامو ، احساسو وصل ليها ، موش كان هو يحبها هي زادا تحبو ، موش تحبو تموت عليه !
تكلمت و هي تغزرلو في عينيه !
_موش كان انت تحبني ، حتى أنا نحبك ، أنا زادا مرضت بيك ! و وصلت رضيت انك تفرح مع غيري..
قص عليها ملهوف !
_,ما فماش غيرك نورهان ، ما نجمش نحب غيرك و لا نفرح مع غيرك ، ما فماش غيرك في دنيتي  يا روح زياد !
كبس على يديها و كمل  تكلم ، قد ما كانت الجملة صعيبة عليه قد ما هي بلحق الفيصل متاع معاناتو !
_انا خطبتك قبل و ما وصلناش ، ما نحبش نخطبك نورهان من جديد ، نحب نكتبو الصداق ! تعرس بيا نورهان ! معايا طول العمر ؟
قلبها دقاتو يتسمعو عن بعد ، نفسها ضياق عليها لحضتها ، ماهيش مصدقة الي سمعتو ، تكلمت و دموعها ترغرغ في عينيها !
_معاك طول العمر ، معاك للي نموت !
جبدها لحضنو عصرها فيه ، ما عادش طايق البعد من جديد ، يزيه يزيه من الوجيعة يزيه !
قعدت خانسة في حضنو ، السكات عم عليهم الإثنين ، فما لحضات قد ما تكون قوية علينا ما نلقوش كلام يعبر على الي نحسوه ، كابس عليها في حضنو و كانو خايف تضيع من جديد ، أما الي وراه الارياح ، تاليفونها الي كبش ما سيب ، رانية تطلب فيها و تعاود ، استوات قعدتها و هزت عليها ؛
_وي رانية !
_يا بنتي وينك ، مشيت تحلب في بقرة موش تجيب في باكو حليب يضهرلي !
تبسمت و هي تسمع فيها ! تلفتتلو وين قابلها بتبسيمة ، عينيها علقت في عينيه !
_هاني مع زياد !
البهتة الي بهتها و الكلمة الي قالتها خلاتها تتبسم !
_ما نصدقش ! اش تعمل مع زياد !
_تو نجي نحكو !
ضحكت بالصوت !
_يا ذنوبي كان باش تجي ههههه !
_ههههه !
علقت عليها التاليفون تتبسم ، وين عاود حللها ذراعو عاودت خنست عندو ، يديه في شعرها و مخو سارح بعيد ، ياعمبو الدنيا ، كان يلوج على الراحة بعيد عليها و الراحة لهنا و هي بين يديه ، اسمها منقوش في قلبو ، كل حاجة فيه عاشقة فيها !
تنهد تنهيدة كبيرة ، طلعت راسها و غزرتلو بعينيها الحلوين ! تكلمت و هي باقي تغزرلو !
_علاش تتنهد !
حط صبعو على خشمها و باعد هبطو لشفايفها ، رعشت من لمستو ، تكلم و عينيه عالقة في عينيها ، احساس كبير بارشا الي حاس بيه !
_نحبك نورهان ! عمري لا حبيت حد في حياتي بخلافك و لا محبتي ليك نهار نقصت ! موش عارف هذا المكتوب و لا حاجة ما اقوى الي خلاتني السنين هاذي الكل واقف عليك !
تبسمتلو كيف حست آخر كلامو فيه وجيعة ، حطت يدها على قلبو و تكلمت ؛
_ممكن وقتها ما ريتش محبتك ، ممكن وقتها تعميت عليها ، ممكن بارشا حاجات صارت خلاتني نغلط و نبعد عليك ، أما اليوم أنا زادا نحبك زياد ! نحبك فوق ما تتصور ، ريتو قلبك هذا موش يدق ليا ، قلبي زادا يدق ليك ، و ممكن كان عرسنا وقتها ما كنتش باش نحبك بالطريقة هاذي ، ما كنتش باش نحس محبتك و لا نفهمها كيف توا ! ممكن هذا المكتوب الي يحكو عليه !
تبسملها و زاد ضمها ليه اكثر ! حاسس روحو قد ما يقربلها قد ما وحشو ليها يزيد ! طلعت راسها من جديد تغزرلو و تكلمت بكل بساطة ، ما في بالهاش باش تشعل نارو الي قاعد يحاول يخمدها !
_تعرف ليلة الي جيتك للدار ، الليلة هذيكا وقت بستني ، أول ليلة نحس روحي عندي احساس ليك ؛ قلبي ليلتها حس بيك ! أما أنت ..
سكتت كيف تفكرت كيفاش صار آخر الليلة هذيكا ، ما تحبش تنغص فرحتهم ، طلعت راسها كيف سمعت صوتو من جديد !
_انا مهبول بيك ، نعشقك نورهان ، ليلتها مشى في بالي نعاقب فيك لقيت قلبي يعاقب فيا من جديد ، كل وين يدق ليك و توجعني روحي ، بستك في بالي نطفي في ناري ياخي زدت هبلت عليك !
يحكي و يغزرلها لشفايفها ، عينيها الي ذبلت لحضتها كانت كانها تشجيع ليه , طبس راسو و حط شفايفو على شفايفها ، احساس قربها نار و بكلها نار ، ما نجمش يزيد يصبر ، يزيه ما صبر يزيه ، لقى روحو غاطس فيها و الي كمل عليه انها متفاعلة معاه ، يديها الي على صدرو و شفايفها الي يا دوب تتحرك مع شفايفو ، المرأة هاذي عشقتو و قداش حلم بيها ، ما نجمش يبعد كل وين عقلو  يقلو  يزي ، موش وقتو ، أصبر اش مزال ، يلقى روحو يحب يزيد يغطس من جديد ، يخليها لحضة تتنفس و يعاود يرجع لشهدها من جديد ! ما بعد الا ما سمع صوت العساس ايوب الي جاي من بعيد !
_شكون غادي ! شكون !!
استوات روحها و قعدت في كرسيها ، وجهها احمار ، و عينيها تلمع من عشقتها ليه !
هبط البلار و تلفت للعساس !
_انا ايوب ! زياد ! ارجع لبلاصتك !
_حاضر عرفي !
يغزر للعساس  كيف دار و رجع ما غير ما يقرب ، ما حبوش يشوفها معاه و لا يضن فيها سوء ، نورهان النفس ، نورهان ضوء عينيه ! نورهان المرأة الي حبها و باش يكمل حياتو معاها أكيد !
قلب الدورة راجع بيها للحومة !
تلفتلها يتبسم !
_شنية كنت باش تأخذ ياخي ؟
تلفتتلو و رجعتلو التبسيمة !
_باكو حليب ههههههه !
وقف بيها قدام الحماص و هبط ، قعدت تبع فيه بعينيها ، ما اعزو و ما أعز دنيتها و هو فيها !
تغزرلو كيف خذى استيكا حليب و زاد  عبالها ساشي منوع كايك و شكاليط !
طلع بجنبها و تبسم !
_باش نروح بيك للدار ، أما غدوة الصباح نشوفك أكيد !
_ان شاء الله !
قالتها بتبسيمة صغيرة ! الدنيا زهاتلها برجوعو  من جديد !
وصلها قدام الدار ، هبطت باعد ما باستو من خدو ، الروح رجعت فيها برجوعو من جديد !

✴✴✴✴

اااااا دخوووووول راااااااييييق مسسسبببب للحراااااايييييقققق😂💥🔥

بعدد الحلقة هاااذي نتصوور كلكمم ذبتواا و تضحكوااا وحدكمممم 😂😍

شراااايكممم فيي قمممة الروومنسيية 🥺
كنتواا تتوقعواا الي زياااد فالاخيير بش يتبع قلبواا و يرجع لنورهااان😉

فرحتواا بالحدث ولا العكس حبيتووه يعييش حيااتوا مع مراا اخررى🙂

البنااات نجمم نقللكمم تو الي الاحدااث الي جاايين الكل خاطفيين للانفااس😘
و برشااا ثناائيااات بش يتوحدوااا 🤍
اربطواا الاحززمة و شدوولي روااحكمم للي جااااي🥰

انشالله عجبتكمم الحلقة و استمتعتواا بيهااا😘
و بردت لكم على قلوبكمم😍
نحبب نقرااا اراااءكممم 💕 و نشوووف جاماااتكمم و توقعاااتكممم 🥺🙏

نحببببببكمم و نبوووسكممم وحدة وحدة ❤️🤍