💫💘 العار 💘💫

💓الحلقة 17...💓

💫💘💫

☄️ "‏لن تستطيع الهروب من شىء تحبه بمجرد بعدك عنه ..
فما تحبه بداخلك ، وليس أمامك ..." ☄️

من الي روحت من سبيطار و هي شادة الدار ، السكر الي فجأة طاح في دقيقة ، حديدها طايح ، بدنها ناقص فيتامينات ،، هذا اش قاللها الطبيب ، عدات ثلاثة ايام في السبيطار و خرجت ، حتى الخدمة ما مشاتش ليها،  اليوم عندها اسبوع في الدار ! لولا رانية معاها و تخدم مسكينة و قائمة بيها و بالدار ! هي الي دوب تاقف الدنيا تدور بيها ، شيء من قلبها و شيء من بدنها الي زاد عمل عليها بلعاني !
دوب وقفت الدنيا دارت بيها من جديد  ، تسندت على الحيط و مشات للبيت البانو و تغسلت ، يلزمها تفطر و تشرب دواها ، يلزمها تاقف لروحها !
لقات رانية محضرة الفطور كيف عادتها ، كلات كعبة بسكوي بالسيف و شربت دواها و قامت !
دخلت لبيتها بدلت دبشها ، ماهيش حاملة روحها و لا حاملة باش تلبس سروال و شميز و لا غيرو ، لبست روبتها الزرقاء و شلاكتها الصبع ، موش عارفة كيفاش لمت شعرها ، وجهها أصفر ليم و رغم ذلك ما زادتش عليه حتى قلم حمير يضويه ، ماعادش معدلة على حتى حاجة !
جبدت الباب و خرجت ، الشمس سخونة و النهار بلحق نار ، شدت الحيط تلوج على الضل حتى توصل للبوتيك ، أكيد مولاتها توا تعمللها حالة ، أما اش تعمل موش بايدها الي صار !
دوب دخلت تكلمت و هي مطبسة راسها !
_صباح الخير !
_نهارك زين مرحبا للا !
طلعت راسها و غزرتلها ، من لهجتها ضاهرة على اخرها !
_نعرف متغششة عليا ، أما كنت مريضة ديجا في بالك ! و أنا...
قصت عليه و هي تڨحرلها ، اصلا كانت بالسيف عليها قابلتها في البوتيك ، حشمة من زياد و مزية لراجلها معاه !
_اسمع يعيش اختي ، أنا هاذي قسمي و رزق اولادي ، ما يساعدنيش تقعد مسكرة ؛ كيف دخلت أنت تخدم خرجت البنية الي قبلك ! و قلت هاي تنجم روحها ، تضرب البوتيك مسكرة بالجمعة ! ما يساعدنيش !
حاولت تتكلم باش تجاوبها لكن ما خلاتهاش !
_انا...
_اسمع ربي يسمعنا على بعضنا علم الخير و يرزقك من غيري ! ..اصلا أنا توا ما عنديش كيفاش باش نخلصك 500 د !
قعدت تغزرلها مستغربة !
_كيفاش !
_ما تستغربش ، أنا دخلتك تخدم عندي مزية في خويا زياد و الشهرية كان يدفع فيها هو و اليوم ماعادش باش يدفع و حتى كان هو حب و دفع كان تسمع بيه خطيبتو نولي أنا في المشاكل ! برا ربي يعطيك قسم بعيد عليا !
قعدت تغزرلها مصدومة ، الصدمة وراء اختها ، الكف وراء خوه ، الدنيا و ما اعطاتها كان التعب و الشقاء في حياتها !
دارت خارجة من سكات ! كيفاش تقلب حالها سبحان الله ! ممكن انانية خاطر رغم الي عملتو الكل حباتو و تمنت أنو يوماً ما يكون من نصيبها و اليوم تسكرت كل امالها ، يعطيه الصحة على وقفتو معاها و ربي يهنيه و هي عندها ربي ما يخيبهاش !
تمشي و الدوخة باقي عاملة فيها ! من الي كانت مروحة للدار ، قلبت الدورة و شدت ثنية الفارماسي تقيس السكر ، يمكن زاد طاحلها من جديد ! ...
وقف الكرهبة قدام الباتيسيري و هبط باش يجيبلها كرواسون كيف ما اشتهات ، توا عندهم جمعة مخطوبين ، نوعا ما بدى يوالف بيها و هي انسانة مريحة زادا ، بشوشة و ما يسمعش منها كلمة لا !
دخل و خذى و راجع بيهم للكرهبة و لمحها ، يغزرلها كيفاش تمشي تحت الحيط و كانها موش منجمة تمشي و شادة الحيط باش ما تطيحش ، ما نجمش ما يغزرلهاش ، قلبو ديما غالبو ، لكن وجود هداية الي قعدت تغزرلو و هو يغزر ليها خلاه يفيق على وضعو و يطلع للكرهبة و يمدلها الساشي، تكلم و هو يهرب في عينيه منها !
_ما شاء الله باتيسيري حومتنا تخدم بالڨدى ، الناس بالصف عليها !
يحكي و دور الكرهبة باش يكمل ثنيتو ، ما كانش ينجم يرجع بالتوالي خاطر هداية باش تفهم أنو هارب من نورهان ، نورهان الي دوب تعدى من جنبها لمحاتو و جات العين في العين ! غزرتها ليه شواتو ! اما هي تشوات اكثر منو ، تشوف فيه راكب هو و اياها ، أكيد هاذي خطيبتو رغم ما تعرفهاش أما أكيد هي ! أكيد !
طبست راسها مل تحبش تذل روحها اكثر ربي يهنيه !
دخلت للفارماسي و قعدت ترتاح باش تقيس السكر ، دموع عينيها تجمعو و تمردو عليها ، قد ما حاولت ترجعهم ما نجمتش ، حطت يديها على وجهها و سيبتهم ، تبكي بالصوت ،  الفارمسيان الي قعدت تغزر ليها ، الزوز كليونات الي قبلها تلفتولها ! أما بلحق ما عادش فيها ، يلزمها تبكي باش تموت بالي تحس فيه !
قربت منها الفارمسيان تجري !
_لباس اختي ، اش يوجع فيك !
طلعت راسها و تكلمت !
_قلبي ، قلبي يوجع فيا !
و هي فعلا قلبها يوجع ، يعصر عليها و ضلوعها ضاقت عليه !
_اذا قلبك يوجع مدام ،فيسع أمشي للايرجونس ، لهنا ما نجم نعملك شيء مدام !
تكلمت و هي تمسح في دموعها !
_خليني نرتاح و قيسلي السكر ! السكر عندي طايح و كنت راقدة في سبيطار !
قعدت ارتاحت و قاستلها السكر الي فعلا مازال طايح ، موش عارفة منين باش تلقف روحها ، من بدنها الي رخ بيها و لا قلبها الي جنى عليها مرتين ، المرة الاولى كيف كانت معاه و خلاتو و غدراتو  خاطر دق لغيرو و المرة الثانية خاطر دق ليه و هو خلاها و شاف حياتو ! و لا باش تلقاها من الخدمة الي ضاعت و لا منين !
روحت و هي تكر في ساقيها بالسيف ، انك توصل تتمنى الموت خاطر بلحق ما عاد فيك ما تزيد تتحمل ، جيتها الدنيا كانت غلطة ، تيمت و هي صغيرة ، ما عاشتش كيف الصغار و حتى كيف كبرت كيف كيف ، تمرمدت لين قالت يزي ، زاد عليها قلبها كيف أختار الشخص الغالط و غدر و ضلم اكثر انسان حبها في الدنيا هاذي و اليوم قلبها زاد جنى عليها كيف دقلو هو ، هو الي لو تنطبق السماء على الأرض مستحيل يرجعلها مستحيل !

✴✴✴✴

لحقيقة نورهااان مسخفتني🥺
اماا لاازم يصير هكاا 🥺
هي ظلمت زيااد معاهاا 😐
وهو جاا الوقت انواا يعيش حيااتواا 😘
و كان ففاا مكتوب بينااتهم اكيد تيصيير😐

شنوو تتوقعواا نتم 😐
تتصورواا زيااد يرجع لنورهاان 😘
ولا تبداا حكايتواا مع هدااية 🥰

رااااو الاحداااث ميزاالت غيير لي بداايااتهاا😍 الحمااس جااي فالثنية🥰
و انا كيف نوعد نووفي😉
قتلكمم راااي كرووو نااار و شرااار🔥💓

انشالله عجبتكم الحلقة💘 و استمتعتواا بيهاا برشااا💓

انشالله كاان لقيت وعد نبخلش عليكم و نزيدكمم حلقة اخررى💞

جااااااااام و تنسووش ارااءكمممم حباااايبي 😘🤍