💫💘💫
☄️ "شيء إليك يشدني لم أدري ماهو منتهاه..
يوم أراه نهايتي ..
يوم أرى فيه الحياة...." ☄️
ملهوف و موش عارف لهفتو منين جاية ، يقول كرهها ، ناقم عليها ، لو يلقى يحرقها ، أما كل شيء يذوب أول ما تغزرلو بعينيها ، عينيها الي ما نجمش يتجاوزها ، لا نجم يشوف مراة غيرها و لا يحب غيرها ، و هذا الصحيح الي هارب منو ، أنو حياتو وقفت عليها ، عمرو اربعين سنة ، و لليوم هذا موش منجم يقدم خطوة و كانو النهار الي هربت فيه عليه ، وقفت فيه الحياة لحضتها ، يا عمبو قلبو الي يذل فيه ليها ، تنهد و هو يغزرلها ، يثبت فيها من جديد ، موش كان هو كبر هي زادا ، أما باقي بنفس الزين الي شافها بيه أول مرة ! الزين الي خطف قلبو و خلاه أسير محبتها ، قدم الخطوات الي يفصلوهم ، جبدها من حزامها ليه يتكلم و يرص على سنيه !
_جيت بساقيك و عارفة اني مستحيل نخليك تخرج من الدار هاذي الليلة ! و ممكن ما تخرجش على ساقيك زادا !
رعشت من كلامو ، ماهيش خائفة منو ، تعرفو ما يضرهاش ، خائفة من المشاعر الي ضهرت من جديد ! رعشتها و احساسها بيه ، تكلمت و هي تغزرلو لوجهو تتفحص فيه ، لحيتو الطويلة الي مزينة بالشيب ، عينيه الحادة غزرتهم و آخر شيء شعرو الارطب الي يجلب أي حد يغزر ليه ، كل حاجة فيه تجلب فيها ! تكلمت برعشة ما خفاتش عليه !
_انا جيتك نستنجد بيك و أنت اعمل الي يضهرلك ، نعرفك ما تضرنيش !
تبسم تبسيمة خوفتها ، قرب من وجهها اكثر ، يوشوش فيها و يمشي في لحيتو على خدها و يجيب ، خلى لحمها يقشعر لحضتها !
_انت ما تعرفنيش ، عمرك لا عرفتني نورهان ! الليلة هاذي أنت متاعي من جديد ! الليلة هاذي باش تخلص القديم أكيد !
عينيها تحلت من الصدمة ، مازلت باش تتكلم ، وقت حست بشفايفو كيف تحطت على شفايفها ، خاطر بلحق ماعادش فيه ، بوسة غل سنين جات بطبيعتها لحضتها ، كان ناوي يعذبها و يعاقبها على الي صار فيه و أنو موش متراجعة و رجعت لحياتو من جديد ، لقى روحو معذب من جديد بجيتها ، قربها لحضتها خلى نارو الي كانت رماد تڨيد و المحبة الي كان دافنها تحفر ضلوعو و تشق قلبو و تتصدر فيه من جديد !
كابس عليها في حضنو ، يديه في حزامها و شفايفو محضنة شفايفها ، ذاب من جديد ، قلبو كمل على ما بيه ، يدق ليها و بحضورها حفلة فيه ، حس بيها كيف مالت ، زاد كبس عليها ، ما يعرفش انها مالت خاطر ساقيها ماعادش هازتها من الي تحس فيه ، احساس قوي عليها عمرها لا حستو منو و لا معاه قبل ، اصلا قبل عمرو ما تجرا باش يقربها ، مقاومتها ليه معدومة خاطر بلحق احساسها دخلها بعضها ، حالو ما كانش بعيد عليها ، و الي قاهرو أنو مستسلمة ليه و لاحتلالو لشفايفها ، نارو ما عاد فيها ما يزيد ، يلزمو يبعد ماكانش باش ينفجر و يضهر الي مخبيه سنين !
يديه ترخفت عليها وين حلت عينيها تغزرلو من جديد باعد ما كانت معاه في دنيا أخرى ، ثبتت ساقيها على القاعة خاطر حست روحها باش تطيح كيف سيبها ، وخر خطوة لتالي و رجع شيرة الصالة و قعد ! يلوج على باكو الدخان بعصبية كبيرة ! و الي قهرو أنو قدام عينيه و ما شافوش ، هو اصلا بوجودها يعمى ، ما ينجمش يشوف غيرها في الوجود !
قدمت و قعدت مقابلتو ، يلزم تحكي معاه ، يلزم يتحل الماضي من جديد ! يا يكمل الماضي يا يتسكر !
أنت تقرأ
💫💘 العار 💘💫
Roman d'amourبنوتااتي 😍نفتتحواا كرونيك جديدة من اعز ما تقرااو💕 حكاايتها متأكدة بش تعجبكم 😘و بش تعيشوا معها لحظة بلحظة🤍 و بش تغوصواا في احداثها ♥️ومع كل حلقة بش تزيدوا تتعلقوا بيها🥰 و كيما تعرفوني منودكم كان بالحاجة الممو و الباهية🥰 اقراوها و نش بش تندمواا...
