💫💘 العار 💘💫

💓الحلقة 23...💓

💫💘💫

☄️ "‏ما أردتهُ لنفسي ليس الذي حدث لي بالفعل ،
و لكنَّني غَيَّرت خُططي ألف مرَّة لأفرح ،
و ألف مرَّة لأحتمل ،
و ألف مرَّة لأعيش ..." ☄️

طلع راسو للصوت ، الوجه يعرفو و يشبه عليه ، أما ما يعرفش اسمو ، ديما يشوف فيه في القهوة ! تكلم و هو يباقق فيه في عينيه !
_ و أنت اش مدخل والديك ! اش عندك فينا ، هاذي بنت خالتي !
_يخلخل زروسك يا كلب  ، يا طارق يتهدد عليا !
_نعاودلك ! سيبها ! هبط كسرتك عليها لا نجي نكسرهالك بلحق !
ضحك و باقي كابس عليها !
_صار انتم معرفة ، مالا بربي ايجا اكسرلي ايدي سي رمبو !
_جبتها لروحك !
قدملو و ما غير رحمة ، يديه الي كان كابس بيها على رانيا لولا أنو هي جبداتو كان باش يكسرهالو بلحق ! خرج غل الدنيا  فيه ، غل الدنيا  الي اعطاتو بضهرها ،  غل هداية الي حقراتو وغل عثمان الي استقوى عليه و القوي ربي !
جبدتو كيف حست أنو موش عادي ، أنو ممكن يستجرم عليه و هي ما تحبش مشاكل في جرتها ، رغم علاقتهم الشبه معدومة ، الا انها تجرات و حطت يدها عليه تجبد فيه و هي تسمع في حازم كيفاش يصيح 
_لما نشكي بيك يا كلب توا تشوف ! تو تشوف اش نعملك !
_تعمل يدك في رقبتك!
كان يأكل في المسبط و باقي يتقبح ، موش حامل يتضرب قدام عينيها ، أما طاح مع طارق و شكون ينجم طارق في الحومة !
تكلمت كيف حستو باش يقتلو
_سيبو طارق ، ما يستاهلش !
تجبد فيه ، مشى معاها من سكات !
تكلمت و هي مطبسة راسها
_يعطيك الصحة ، و الله الساقط معيفني في روحي !
تلفتلها حاير فيها !
_ياخي ولد خالتك بلحق ؟
تكلمت و هي باقي مطبسة راسها !
_ولد خالتي و كنا مخطوبين ، لكن وحدو ضهرلو باش يبطل و ياخذ بنت خالتنا الاخرى ، و توا راجع يتيتم باعد ما طلق !
غزرلها على جنب و تكلم ما غير ما يشعر !
_كنت تحبو ؟
طلعت راسها و غزرتلو !
_كنت نحبو و توا ما عادش نحمل نشوف منضرو ! الحمد لله ماضي و مشى على روحو !
_كيفاش فتتها الحكاية ؛ خاطر أنا عندي حكاية ما نجمتش نفوتها !
غزرتلو و تكلمت و هي تتبسم !
_كل شيء يفوت ، ما فما شيء يقعد  سنين ! كل وجيعة تبهت لين تبرا و ترتاح !
_ان شاء الله !
ما حسش بروحو كيفاش وصلها للدار و هما يحكيو !
_يعيشك يا طارق ، يعيش خويا !
_مرحبا ، اولاد حومة رانا !
خلت رانية تحضر في العشاء و خرجت باش تأخذ باكو حليب من حوانتي الحومة الي بزهرها لقاتو مسكر ، كملت ثنيتها للحماص الي في اخر النهج !
كل شوية تطبس تتفقد شلاكتها الي ضاهرة موش باش تكمللها الثنية ، و فعلا عملتها بيها و تقطعت ، حتى هي الشلاكة تحملت ما تحملت و هي ما عندهاش حق شلاكة جديدة ، لولا رانيا ، حتى حق خبزة ما تخلطش عليه ، أما تقول الحمد لله ، ما حاشتها بشيء و ما عاد حليلها شيء ، يا حسرة منين كانت تضرب ساعة تحضر في روحها ، منين كانت القطعة الي تلبسها اليوم مستحيل تعاودها غدوة ، اليوم خارجة بجبة الدار و شلاكة صبع عمرها أطول من العام ،  هذا اذا دل على حاجة فيدل على انها كبرت و كبر بيها العمر ! و روحها ما عادش الخفيفة الي ما تحسبهاش !
وقفت على جنب تحاول في الشلاكة ،  يهديهاش ربي و تشد روحها حتى توصل بيها للحماص و ترجع تقولش عملت بلعاني ، تقطعت و ما عاد فيها ما تصلح ! ...
كان مروح من دار عمو باعد ما حكالو اش عملت فيه الموجيرة الجديدة ، و قداش شاخ عليه ، قالو دفعة بلاء على صحتك ، شنية هي الخمسة و ثلاثين مليون ، حتى شيء ؛ يشوف فيها قدامو  تمشي و كل شوية تميل تتفقد شلاكتها ، نقص في الفيتاس و قعد يتبع فيها بعينيه  ، توا من نهارت المطعم تقريبا عشرين يوم ما شافهاش ، كل وين يفقدها ، نجاة البرابول تعطيه اخبارها ! أما موش كيف الحديث كيف ما يشوفها بعينيه !
يغزرلها كيف طبست و نحت شلاكتها من ساقها ، ضاهرة تقطعتلها تبسم عليها ، حتى الجبة الزرقاء الي لابستها زايدة في زينها الشطر ، قد ما يعمل يبقى عاشق فيها و ما براش و لا باش يبرا ، هي كانت عند كلمتها و خلاتو يشوف حياتو ، أما هو ما كانش عند كلمتو موش منجم يبعد و لا يمحيها من بالو يا عمبو حبها الي سلو عروق قلبو بالعرق بالعرق !
وقف بجنبها و زمرلها وين طلعت راسها مفجوعة ، شوفتها في حد ذاتها اختبار صعيب لقدرتها على الصبر ، عمرها ما كانت صبورة و معاه تعملت الصبر ، انها تصبر و هي تحبو و عارفتو يحبها لكن كل حد في شيرة ، انها تصبر و عارفتو باش ياخذ غيرها و باش يعمل حياة مستقلة و ممكن ينساها ؛ طلعت راسها و غزرتلو بعينيها الي يذبحو ! عينيها الي ذبحوه توا سنين !
قلبها يدق باش يخرج من بلاصتو ، كل وين تقول برات و ما عادش باش تتأثر و ترضى باللي قسمو ربي ، يعاود يطلعلها من جديد ، حبتو و ما فيبالهاش محبتو صعيبة بالطريقة هاذي ! ما في بالهاش كيف ما محبتها دمرتو سنين لتالي محبتو باش تدمرها اليوم !
تكلمت بصوت واطي و تبسيمة خافتة ، ما تحبش تدخل بعضها و لا تبينلو ضعفو أو تحسسو بالذنب من ناحيتها ، خليه ينساها و يعيش ، ان شاء الله المرأة الي خطبها تنسيه فيها و تخليه يحب من جديد !
_عسلامة !
_يسلمك !
قالها و عينيه تحفظ في تفاصيل وجهها الي ما تتنساش ! كمل تكلم و هو يعشق في عينيها ، عينيها نقطة ضعفو توا سنين و ما براش منها !
_تقطعتلك شلاكتك ؟
جاوبتو بتبسيمة صغيرة
_صحيح ، تقطعتلي توا
_اطلع نوصلك ، وين ماشية ؟
تكلمت و قلبها يدق من جديد ، نبرة الحنية منو قد ما تفرحها تخوفها خاطر يتقلب بعدها في دقيقة !
_لا يعيشك ، باش نروح ! اصلا تو تتغشش عليك خطيبتك كان تسمع بيك مركب الاكس بحذاك !
تكلم و هو يغزرلها ، تبسيمة صغيرة ترسمت على شفايفو و هو باقي يعشق فيها بعينيه !
_اطلع نورهان ، اطلع ما عندي حتى مراة غيرك في حياتي ، ما عندك وين تهرب مني نورهان !
كلامو و التبسيمة قهروها ، قلبها يقلها اطلع و شوفو اش باش يحكي و عقلها يقلها فكك ، ما تترباش منو ، توا يقربلك و غدوة يعاود يبعد عليك !

✴✴✴✴

هاااي هااني خذيتلكمم بخااطركمم و هبطبكمم حلقة فيهااا نورهاان🥰

اماا نحب نعممل روماارك صغييرر في خصوص طووول الحلقة 😐
رااو نجممش نزيد نطول اكثر من هكاا 🙂
اذا انتم تقروهاا في دقيقتين الحلقة😪
الكاتبة بش تكتبهاا تنجمم تقعد فيهاا حتى النهاار😉 فمن فضللكم احترمواا الشي هذاا🙏
وانا طلبت منكم رأيكمم مش تذمر على طول الحلقة😒
و نجم زاداا نقول الي طول الحلقة مربوط بتفاعلكم😉
يعني من فضلكمم حاولواا هزواا المورال مش العكس🥺
و مرسي عالتفهم🙏😘

نرجعواا تو لاحدااثنااا 🤍

شراايكمم في طاارق و المسكينة راانية😍
و زياااد و كلامواا لنورهاان 💓
زعماا شنو يستنى فيهمم فالاحدااث الجااية😉

اذا تفااضيت و لقيت تفااعل ممكن نزيد نهبطلكمم حلقة اخررى🥰

انشالله عجبتتكممم الحللقة و استمتعتوااا بيهاا❤️♥️