💫💘 العار 💘💫

💓الحلقة 59...💓

💫💘💫

☄️ "إنها من ذلك النوع الذي لا يمكن أن تُحب بعدها أبدًا ،
إنها تأتي لـتكون  الأخيرة..." ☄️

قاعدين في الطاولة مقابلها عمو و مرتو ريم ، ريم الي فرحت بيها بلحق , كانت كل شوية تذوق من حاجة و موش مصدقة بنة الفطور  ، تكلمت و هي تتبسم !
_بصراحة يعطيك الصحة ، ياسر بنين تطييبك !
_صحة لاختي ، بالشفاء !
طلع راسو و تبسم و تكلم !
_ريم تعرف تطيب طاجين سبناخ ؟
تلفتتلو و تكلمت و تبسيمة في فمها !
_وفما ما أسهل منو هو ؟
غزرتلو و عينيها تلمع ، يعني ما نساش شهوتها. قعدت تبع فيه بعينيها و هو يحكي !
_مالا تعمل مزية على خوك ، غدوة طيب لنورهان ، شاهيتو و ماك تعرف الوحم !
تبسمت و جاوبتو
_هذا الي بيك ، نطيب لاختي ، قلي نورهان شاهياشي حاجة أخرى و كل وين تشتهى قلي نطيبلك ، ديجا خذيت نومرويا و باش نولو أصحاب أكيد !
تبسمت و جاوبتها !
_يفرحك يا ريم ، مزيتك ما ننساهاش ، الحق شاهية طاجين السبناخ بالكبدة ! بزايد ڨوتا ! أش نقلك و اش نحكيلك !
قعد يتبسم على هبلتها ، الصغير الي جاي عابث بيها و قداش متمني تكون بنوتة مزيانة كيف امها ! طلع راسو كيف سمع عمو يتكلم !
_ياخي جنان الروابي اش عملت فيه ؟
وجهو مشى ألوان ألوان ! ما كانش باش يحكي فيه الموضوع !
_عمي موش وقتو ،!
_مالا وقتاش وقتو ؟ جنان يعمل نصف مليار ، في ليلة و نهار تكتبو لمرتك ؟ في بالك مانيش باش نسمع ؟
تلفتتلو مفجوعة ، فاش يحكي عمو و شبيها ما فيبالهاش !
كبس على يديها يتبسم ! كيف شاف غصرتها ما يحبهاش تتقلق !
_عمي جينا باش نفطرو بحذاك موش باش نحكو في الخدمة !
ڨحرلو و جاوبو بالوقت !
_مانيش نحكي في الخدمة ؛ أما الجنان هذاكا باش تنجم تقيمو مرتك ! و كيفاش رزقك تكتبو لمرتك ، مالا أنا تو نكتب الدار هاذي لريم كيفك !
_عمي ! أنا حر و زيد أنا قائم بيه و حاطط عليه خدامة ! و كل حد كيفاش يشوف الحكاية ، حكاية عادية انك تود مرتك ، اش فيها !
قعدت كيف البهلولة بيناتهم ! ترجع في دموعها الي تلمو من قهرتها من عمو !
_ما فيباليش بيك ساهل للدرجة هاذي ! جابتك تحت ساقيها كيف العادة !
قعدت ريم تنخز فيه و تعاود كيف شافت وجه نورهان كيفاش تقلب ، نورهان الي حطت المغرفة و قامت !
_سامحوني !!
هي قامت و هو تلفت لعمو !
_هذا علاش استدعيتنا ، في بالي قبلت حكاية عرسي أنا و نورهان و تجاوزناه الخلاف ! جبتني باش تذل مرتي !
_قبلت صحيح أما ما فيباليش باش تبدى تسرسبلها رزقك بالطرف بالطرف ! راهي غدرتك قبل تنجم تعاودها و عينيك تغزر !
حط المغرفة من يديه و قام وين قابلتو واقفة تبكي وراء الباب ، سمعت عمو و سمعت كلامو الكل ! هي و لا نهار قالتلو اكتبلي حتى بيسكلات باسمي ، هي فرحانة معاه و الحاجات الأخرى الكل ثانوية !
قدم ناحيتها و كبس على يديها و دار خارج ، قد ما نادتلو ريم ما وقفش ، الي يهين مرتو هانو و عمو المرة هاذي حط حد كبير بيناتهم ؛!
رجعتلو للكوجينة تغزل ، وقفت قدامو و تكلمت !
_ياخي هبلت ، علاش عملت هكاكا ضياف و خرجتهم تقول مطردين !
_اش عندي عملت ، تحبني نشوفها تسللو في تعبو و شقاه و نقعد نتفرج ، ذيبة عليه و هو طايح فيها للعنكوش !
_ربي يهديك يا المنجي ، شبيك تتصرف هكا !
صاح عليها وين سكتت
_شنية باش تحاسبني أنت زادا ! ريم ! اعرف قدرك خيرلك !
ڨحرتلو و خرجت ، ماهيش عارفة تامنلو و لا ! في نهار يطلعها لسابع سماء و في نهار يرميها لسابع وطاء  و الي عملو اليوم مع ولد خوه كفى و وفى ، اش فيها كان الراجل كتب لمرتو جنان ، ينجم يكون حب يودها و يفرحها بيه موش اكثر !