💫💘 العار 💘💫

💓الحلقة 61...💓

💫💘💫

☄️ "الحب ♥
هو أن يصيبك نوع من الانفصام ..
أن تكون عاقلاً مع الكل  ومنتهي  الجنون مع أحدهم .. ♥.." ☄️

موش عارف كيفاش عدى النهارين غادي ، هي والفت بامو و ترمات عليها و دخلت في جوها ، كان يخرج و يرجع يلقاهم ڨارنين الرأس على الرأس ! التبسيمة ديما موجودة و ما احلى تبسيمتها !
دخل للبيت يحضر في دبشو من جديد ، موش عارف كيفاش باش يرجع مازالو تقريبا شهر في البر هذاكا ، قبل متونس بيها و بشوفتها و اليوم هي منورة دارو و هو لشكون راجع !
يسمع في حس ساقيها تلفت و قداش شاخ عليها و هي لابسة شلاكتو و تدور بيها في الدار ،
تبسم و تكلم و هي يعشق في عينيها بالسيف عليه !
_صحة الشلاكة !
طبست راسها و تبسمت و قداش شاخ على هاك التبسيمة !
_سامحني لبستلك شلاكتك !
قص عليها و هو باقي يلم في دبشو في الساك !
_صحة ليك ، ألبس الي تحب !
قعدت تغزرلو و تغزر للساك الي في يديه و تكلمت !
_راجع ؟
تلفتلها باعد ما سكر الساك !
_اي راجع غدوة الفجر !
طبست راسها تلعب بايديها و تكلمت !
_نجم نطلب منك حاجة ؟
_اكيد ، احكي نسمع فيك !
_كيف ترجع للبلاد ، تنجم تسأل على امي ، نحب نطمن عليها ، خائفة عليها !
قعد يغزرلها و تكلم ، ما كانش يحب يتدخل في حكايتها و لا يتطفل عليها ، رؤوس الاقلام الي حكاتهالو كانت كافية بالنسبة ليه !
_ياخي امك في بالها بيك باش تهرب ؟
هبطت عينيها و تكلمت !
_فكرة امي ، هي الي قاتلي برا أهرب و لوج خدمة و عيش بعيد على هالبر !
_باهي ، غدوة نحاول نسال عليها و نهنيك !
تبسمت و خرجت خلاتو ، قداش الراجل هذا خيال ، رغم كلامو القليل الا أنو كيف البلسم ، حتى عيلتو كيفو ، امو و اخواتو البنات الزوز ، الي جاوها اليوم بالذمة و فرحو بيها و كانو فكرة أنو خوهم يعاود يعرس كانو مايسين منها ! حتى هي مرتو ضاهرة صعيبة و خايبة !  ضحكت على روحها خاطرها صدقت التمثيلية ! تقولش بلحق هي مرتو و عروسة جديدة و عائلة راجلها فارحين بيها !
رجعت عند دوجة للكوجينة تعاون فيها كيف ما كانت قبل ما يجي ، مخها فيه الف حكاية اولهم امها و اخرهم العائلة الباهية هاذي و جعفر ، لوقتاش باش يقبلوها و لو يفيقو أنو هي موش مرتو اش ممكن يصير فيها !
_طفي عليه بنتي ، اكهو يزيه راو طاب !
طفت الغاز و تلفتت لدوجة تسأل فيها !
_ياخي جعفر علاش طلق مرتو الاولى !
طلعت راسها و غزرتلها و تبسمت !
_مكتوب ، هو وليدي ضلم روحو كيف عرس بيها و هي بالطبيعة هذيكا ! غيرش نقولو مكتوب .
حطت العشاء هي و دوجة و دخلت تناديلو !
_العشاء حاضر ، عمتي دوجة قاتلي ناديلك !
تبسم و هو يسمع فيها و تكلم !
_يعطيك الصحة ، هاني جيت !
وقف معاها ماشي ناحية الصالة وين امو تحط في الطاولة كيف العادة ، بوه الي موش فاهم غضبان عليه و لا اش قصتو ، كيف سمع أنو كتب الصداق فجأة ، بلع السكينة بدمها ، لا حاورو و لا ناقشو و لا غضب عليه ، عيي يلحلح بيه باش يرجع حياة ، أما حياة عندو يموت عازب و لا يرجعها !
_ا بابا وين سارح !! راني مروح الليلة ما نوصيكمش على عبير !
طلع راسو و غزرلو , تكلم و هو يغزرلو في عينيه !
_ياخي مرتك ما عندهاش أهل !
طلع راسو و غزرلها وين شاف وجهها مشى ألوان ألوان ! تكلم و هو يحاول يسيطر على الموضوع باش ما يتماداش فيه بوه !
_علاش الحديث هذا بابا !
_مالا كيفاش اعطوك بنتهم ما غير ما تجيب اهلك و تخطب كيف الناس و كيفاش مشيت تخدم روحت بمراة في يديك ! احكي الصحيح شكون هاذي !
طلع راسو و غزرلها وين لمعت الدموع في عينيها شواتو ، و كانها تستنجد بيه باش يتصرف ما تحبش تخرج من دارو ، ال48 ساعة الي عدتهم في الدار هاذي ذاقت فيهم راحة ما ذاقتهاش حياتها كاملة !