💫💘 العار 💘💫

💓 الحلقة 11...💓

💫💘💫

☄️ "نَحنُ لا نبحث في القُلوب عن مِساحة فارغة بل عن مِساحة صادقة لا أكثر❤..." ☄️

تسمع في حثلة قريبة من البيت الي هي فيها و كلام راجل ! صوت الفرملية متاع بكري زادا ! شوية و تشوف في خيال راجل يعمل في الستين سنة تقريبا !
_صباح الخير ، لباس اليوم ؟
قعدت تغزرلو حايرة ، تكلمت بصوت ضعيف !
_الحمد لله !
_انا المنجي ، أنا اللي ضربتك بالكرهبة البارح ، سامحني ! أما أنت طلعت في وجهي فجأة !
قعدت تغزرلو و حاولت تقوم ! وقت قدم منها و عاونها باش استوات قعدتها !
_علاش جبتني للسبيطار ، كان خليتني نموت البارح راني ارتحت !
قعد يغزرلها مصدوم ، و زادت صدمتو كيف سمع صوت الفرملية الي تمصمص في فمها و قالت كلمة " مالا خنار ".. تبسم و جاوبها
_و أنت علاش تحب تموت ، مازلت صغيرة ! على كل السبيطار خالص و انا مشيت ديكلاريت على الاكسيدون ، أمشي أبحث و باعد شوف محامي ياقفلك على قضية التعويضات من الassurance !
دار باش يخرج ، وقفو صوتها !
_تنجم تعاوني ؟
تلفت يتفحص فيها بعينيه ، من ليلة البارح حاسس أنو حكايتها حكاية ! مراة فوق الاربعين ممكن بعامين و لا ثلاثة ، اربعة موش اكثر ، شعرها ماش ، عينها خضراء و وجهها مزيان رغم الكبر ! تكلم و هو يتفحص في بدنها ، مازل عندها ما تقول في روحها !
رجع و قرب ناحيتها يتبسم !
_نعاونك ! أما شنية المقابل !
غزرتلو ، يعني كيفو كيف خوها ، أما هذا ارحم ، خوها الي على خاطر الشراب كان باش يبيعها البارح للواحد ما جاء شيء ، بكردونة شراب كان باش يسلم في اختو ! يا عمبو الوقت الي خلاها تحت ساقيه !...
_ما عندي ما نعطيك ! اصلا كان عندي ما نقصدكش !
غزرلها مليح و رجع قعد في الكرسي الي مقابلها !
_شنية حكايتك بربي ! ....
عندو شهر من اللي خرج ، حد ما قبل يخدمو و حد ما حن عليه ،  لولا شهرية العجز متاع امو ، ما يلقاش باش ياخذ خبزة !
نصحوه و قالولو برا للزياد ، احكيلو و هو موش باش يردك. ، أما خايف اذا القريب و الي يعرفو ردو ! باش يجي الي ما يعرفوش و يقبلو !
روح على بكري للدار ، زايد يقعد يتهومل في الشوارع في السخانة هاذي !
حل الباب و دخل ينادي على امو من الباب ، المريول الي لابسو ولى يقطر بالعرق ، نحاه و ماشي للدوش و اوب يسطع فيها ! كانت خارجة و في يديها الخيشة والسطل !
هبطت راسها من الحشمة و هو كان اكثر منها خاطر ما في بالوش بيها موجودة ، خاطرو يعرف أنو هي ما تجي الا ما يخرج هو !
يسمع فيها تمتم !
_سامحني !
_انت سامحني !
طلعت راسها و غزرتلو ، عينيه الذويقين و مبسمو المزيان حاجة تهز العقل ! قعدت تغزرلو و نسات أنو هو زادا يغزرلها ! شردتها فيه فيقتو على وضعو و على المريول الي نحاه ، بخروج امو !
_جيت يا بابا ! اش عملت !
_ما عملت شيء أما ربي كريم امي ، تو تفرج !
كمل ثنيتو للبيت البانو و هي تلفتت لنزيهة !
_خالتي يلزمني نروح !
_علاش بنيتي مازال بكري !
_لا وقيت خالتي ، نخليك !
سبقت للباب هاربة منو و من روحها ! هي وين و هو وين ، عندو شهر من الي روح و كل يوم تشوفو و هو موش ملاحضها جملة ! ممكن خاطرها موش مزيانة ، ممكن خاطر ما تعرفش تلبس كيف البنات ، ديما جلباب و خمار ! و واحد كيفو اش يعمل بوحدة كيفها بربي ! هذا مخها اش قاللها، تعذب في روحها كل يوم ، ما تعرفش أنو موش في بالو النساء جملة و أنو محمد امين توا ما يخمم كان يلقى خدمة !