💫💘 العار 💘💫

💓الحلقة 55...💓

💫💘💫

☄️ "تَعثرتُ بِعِينكِ فَسَقطَ قلبيَّ
فهناك نظره تختصر الحياة ..
وشخص يختصر الجميع !.." ☄️

شمس تنقب الرأس و هي واقفة في قلب الكياس ، الكرهبة الي تتعدى تمشي تجريلها تبيع طابونتها و تكملها و ترتاح !..
عندو جمعة في هالبر الخالي ، الشانطي هذا لا يزي الخدمة فيه صعيبة و لا يزي لقى روحو مخنوق  ، المحجوبة ، البلاصة هاذي خلاء و قيفار و زيد بين الدار و الدار تلقى سانية !
يغزرلها كيف كل يوم تجري في الكياس على الكراهب ، باش تبيع الطابونة و ضاهرة تجي مقابل الشانطي متونسة بالخدامة ، طفلة في عمرها و في زينها عوض راي كيف اندادها تقرأ و هي تجري بين الكراهب و الشمس فوق راسها ! ساعات ياخذو من عندها هو و الاولاد و ساعات يكتفو بكسكسي و لا مقرونة جارية !
تلفت و هو يسمع في واحد من الخدامة يحكي معاه ؛
_معلم جعفر , السيماني وفى علينا و محمد امين مازال ما جاش !
_هاو جاي في الثنية ! برا أنت و الاولاد كملو الخلطة الي عندكم ، عدك بيه جاء !
تنهد راصاتلو هو مبلع في البلاصة هاذي بعد الي زعمة ارتاح كيف قال طارق باش يشد الشانطي ، ياخي تراجع آخر لحضة و رصاتلو هو واحل في القفار هذا ! اصلا حياتو كلها قفار ، بخلاف خدمتو الي تمرميد صافي ، أما ديما يحمد ربي على ما اعطاه ، يلقى اللقمة و يأكل ،يتغطى و ما يباتش عريان و عندو سقف فوق راسو ، يعتبر اصلا الحمد لله حالو متيسر مقارنة مع بارشا يخدمو كيفو ! هو ما عندوش الفساد ، لا دخان و لا شراب و لا مبلي بالقهاوي الي يخدم بيه يأكل منو و الباقي يخبيه ، اخر الشهر يعمل حساباتو ، يبعث نفقة ولدو و طليقتو ! و الباقي يخبيه و الحمد لله عندو تفتوفة تسترو نهار آخر ,
تنهد كيف تفكر ولدو ! ما فرحش نهار في حياتو ! خذى بنت عمو رغم الي ما يحبهاش ! أما بوه يرحمو خطبهالو خاطر من الصغرة متسمية عليه ، وراتو الويل النقص الي قارياتو في روحها طلعاتو فيه  ، كانت تفتش على الفخفخة و الهرج الزائد ، و هو ما عندوش ، يخدم باش يستر روحو و عايلتو ! كيف ضاق بيه الحال و لقى انو حياتهم ما عادش تنطاق ، عمل طلاق بالتراضي ، باعد ما تفاهمو خلالها دارو فوق دار بوه و يصبلها في نفقتها و نفقة ولدو كل شهر ، و كيف تواتي مناسبة ما يحسدش ولدو و لا يبخل عليه !
سمع صوت ، طلع راسو وين يشوف فيها تتفارع مع جهامة، صياحها كيف ما وصلو ، وصل للخدامة ،  الكرهبة الي وقفتلها فيها ثلاثة اولاد ، زوز منهم يجبدو فيها بالسيف باش تطلع معاهم منتالي ! موش عارف كيفاش ساقيه هزتو يجري ليها ، اخيب حاجة انك ترى ضعيف مستقويين عليه و ما تنجمش تعاونو ! موش عارف كيفاش وصللها آخر دقيقة هي تتفارع و هما موش مسيبينها !
_سيبو الطفلة ! سيبو يا كلاب  !
كيف سمعو الصوت رماوها لتالي و خدمو الكرهبة و هربو حتى قبل ما يوصل ليهم !
وقف بجنبها يلهث ، يغزرلها و يغزر ليدها الي تزلعت بالرمية الي رماهالها الكلب الي كان يجبد فيها !
طبس عليها و مدلها يدو ، وين أول مرة يتجرا و يغزرلها لوجهها ! يغزر للبحر و موجو كيف سكن في عينيها ، عينيها كبار يلمعو ، يجهرو كل حد ينضر ليهم و زادت عليهم دموعها زين على زين ، عرفت الوردة العربي الي تطلع وحدها ، فاوحة حمراء ترد الروح ، هاذي وردة ، خدودها حمر رباني ، شفايفها تلمع رباني ،  شعرها ازعر ارطب من عند الخالق لا صبيغة لا  سيشوار و لا كيراتين !
وقفت تنفض في دبشها و بعدت عليه ، الدنيا هاذي على صغر سنها علمتها ما تاثقش في حتى راجل و زاد تجاربها كل مرة تزيد تعلمها ، كل مرة ربي يبعثلها من ينجدها ، أما لوقتاش ! لوقتاش باش تبقى تعاني ! بوها راقد في الدار و خوها شادد القهوة و هي و امها الي ماخذين الحمل بكولو ! ساعات يدور بيها ابليس و تقول نعمل حبل في رقبتي و نرتاح !
جبد يدو الي خلاتها معلقة و تكلم !
_انت لباس ؟
تكلمت و هي مطبسة راسها ، من الي صارلها ما عادش تحب حتى حد يقرب منها !
_الحمد لله !
بعدت عليه خطوتين لتالي ، خلاتو حاير في امرها ، رجع شد ثنية الشانطي من سكات ،  اش عندو فيها ، اذا هي شادة الكياس و تعرف اش فيه ، فاكيد راهي عارفة أنو باش تلقى الف ذيب غير الي شافتهم  بكري !
قعد شادد بلاصتو وين قابلتو واقفة من جديد ، واقفة بقفتها في يديها ، ضاهرة ماهيش باش تروح الا ما تبيع الي فيها ، لو كان تموت ، موش باش تروح ما غير فلوس في يديها !
جبد عصاة الزيتون الي عندو و قام ماشي ناحيتها !
تغزرلو جاي من جديد نفخت ، صحيح عاونها أما ولات عندها حساسية من الرجال ، من بوها لخوها لكل كلب يشوفها يطمع فيها خاطرها حليلتها ! 
قدم ناحية القفة الي كان فيها خمسة طابونة هزهم في ساشي و مدلها الفلوس في يديها و تكلم !
_هاني هزيتهم الي بقو ، برا روح أما قبل خلي العصاء هاذي عندك ! عود جيبها معاك ، الدنيا تخوف ! و لو ماهيش حل ، أما ممكن تفيدك !
خذات من عندو العصاء من سكات ، تغزرلو و هو قاعد يبعد ، قعدت تقايس فيه ، عمرو تقريبا اكثر من الخمسة و ثلاثين ، ممكن اقل ما تعرفش ! اسمر و طويل و لا هو صبح اسمر من الشموسات الي يخدم فيها ! هو العرف على الرجال الي تخدم معاه !
تو جمعة من الي شدو الشانطي لهنا و هي متونسة بيهم ، عارفة عالاقل كيف باش تتغصر باش تلقى حد فيهم يغزرلها بعين الرحمة و اليوم هو غزرلها بعين الرحمة ، زعمة غدوة تلقى شكون ! زعمة غدوة تمنع كان تطيح بيها !