💫💘 العار 💘💫

💓الحلقة 73...💓

💫💘💫

☄️ "انت ضلي.... وخلي.... ورفيقي.... و حبيبي.... وروحي..
انت الامان الذي احارب به الدنيا...." ☄️

اليوم التصريح بالحكم ، ماهوش على الدار و لا على الملك ، الي غايضو في الحكاية الكل بوه ، و اش حاسس ، الهموم الي انزادت و ركبتلو قضات على صحتو ، ماعادش يتحرك كان للتوالات و بالسيف كان ما يعاونوه و يوصلوه !
يطلب في المحامي و يعاود يستنى في الحكم ، موش صابر ، لحد ما كلمو و قالو انهم ربحو القضية ، المحكمة رفضتلها قضية التحجير  ! و رغم هذا ماهوش فرحان أنو توصل تعمل هذا الكل خاطر الحيوط و لو كان جات نهار آخر باش تهزها معاها أما الدنيا هاذي ما دائم فيها كان وجه العالي !
حل الباب و دخل يلوج في مرتو بعينيه ، مرتو الي حد غيرها ما ينجم يحس بيه !
_رانيا يا رانيا وينك !
خرجتلو من الصالة تطل براسها و تشاورلو باش ينقص في صوتو !
و خرجت قدمت ناحيتو ، ما غابش عليها أنو هو زادا تاعب المدة هاذي !
_مرحبا ، توا وين رقد عمي ، متقلق و عندو وجايع في راسو !.
_انا نعرف وجايعو من وين و من شكون ! مانيش عارف اش نعمل باش نشوفو يضحك ، تعرف اني خايف يموت بغصتو و هو غاضب عليها !
طلعت راسها و تبسمتلو !
_اللطف عليه ، ربي يطول في عمرو ! و زيد يجيها نهار و تفيق بغلطتها و ترجع لثنية ربي و اتوب !
_ماهيش باش ترجع و الله ! ديجا ربحنا القضية اليوم و رغم هذا مانيش مرتاح ، خايف على بابا و الله !
كبست على يديه و تكلمت ؛
_ما تخافش لباس ! ايجا نفطرو ، الفطور حاضر !
فطرو جميع ، مخو يهز و يجيب ، ساعات يقول يمشي يعطيها فلوس باش تجي و تطل على بوها و تستسمحو يعرفها كلبة فلوس و ما يهمهاش أكيد !
وقف وين غزرتلو مستغربة !
_ووه ، شبيك ، كمل فطورك !
_ما عينيش ، يلزمني نمشي نحكي معاها تجي تستسمح بوها باش يتجلط جرتها !
تبسمتلو و كبست على يديه !
_ربي يهديها ، برا حاول بالك الخير يجي على يديك !
خرج و هو يتبسملها ، وحدة أخرى راهي قاتلو علاش ترجعلي في اللفعة باعد ما ارتحت منها !
يدق في الباب و يعاود وين حلتلو ، مصدومة جيتو و ڨحرتو ليها خلاتها تهز حاجبها و تتمعجن عليه !
_مرحبا ، تفضل ، مازلت داري باش تفكهالي زادا !
ڨحرلها و دزها و دخل !
_يلزمنا نحكو و تعمل عقلك و تخاف ربي في بوك !
_علاش هو خاف ربي فيا ! علاش عاطيك الدار و عاطيني أنا الهواء ! اش نعمل بيه ، كيفاش باش نبنيه و نسكن فيه !
دلوح راسو و تكلم و بكلو غيض
_اعطاك الهواء و الوسعية الي وراء الدار ، كان جيت قنوعة راك رضيت بيهم و مرة أخرى كيف تحب تبني تبيع الوسعية و تبني فوق السطح ! أما أنت هزك الطمع و أنت تعرف أنو الدار هاذي قامت على اكتافي ، من الي صغير نخدم في المرمة و كل مرة تزيد حاجة فيها ، أول ما كبرت و عرفت أنو البيوت صخر ، شكون زادهم الساس و شكون الي صلح فيهم ! السطح شكون حوطو بالسيماني ! الكوجينة شكون عاودها ! بيت البانو كيف كيف ! هذا علاش بابا كتبهالي و باش ما يضلمكش كتبتلك الهواء و أنت ما حسيتوش و ما حاسيتش كبرو و لا تعبو علينا و أحنا صغار ! خاف ربي خيرلك !
مصمصت فمها و تكلمت !
_جاي تنظر عليا ، اش تحب مني توا ! حتى القضية و خسرتها اش مازلت تحب ! تحب حتى الهواء نعطيهولك ؟
_نحبك تطلب السماح من بوك ليل نهار لا يموت و هو موش راضي عليك !
_خليه راضي عليك أنت يزي ! اش نعمل بيها رضايتو !
كان باش يمد يدو عليها من جديد ، لكن تفكر بوه و ما صاير فيه ، لين لهجتو معاها ، ما عندوش حل غير :
_ برا استسمح بوك و أنا نعطيك فلوس ، كل وين تجي تطل عليه نعطيك زادا ! أنا هذا الكل باش ما نشوف الوجيعة في عينيه !
_هكا نتفاهمو ! هات 500 دينار باش نكمل نخلص بيها المحامي و تو العشية نجي و نستسمحو و نجيه مرة في الجمعة ب40 د , اش قلت ؟
قعد يغزرلها موش حابب يصدق الي يسمع فيه ، أما ما عندوش خيار :
_قلت كلبة فلوس ، غيرش بابا جاء في العراضة ! ايجا العشية و تو نعطيك !
خرج و هو يغلي موش عارف الي عملو صحيح و لا غالط ، أما يحب باباه يرجع يشد روحو و يبرا من وجيعتو ! وجيعتو الي سببها بنتو لحمو و دمو الي تبيع و تشري فيه !