💫💘 العار 💘💫

💓 الحلقة 4...💓

💫💘💫

☄️"ٱلقسوه‍ ليست دٱئمآ عنوآن ٱلقلوب الميتة ،، فبعض ٱلقلوب ٱلطيبه تقسوآ لإنهآ مجروحه..."☄️

روحت باعد ما عملت دورة كبيرة , تغزر للكميونة كبيرة قدام الدار و جماعة دايرين بيها ! مشات تجري وقفت قدامهم تغزرلهم مستغربة !
_شكونكم انتم ، اش حاشتكم !
تكلم الي في الوسط و الي ضاهر عرفهم زاد!
_بعثنا العرف باش نريڨلو الصبة و نشوفو الدار و ساسها و نسيجو السطح زادا !
قعدت تغزرلهم موش فاهمة شيء !
_شكون عرفكم ، و علاش يبعث فيكم لداري !
_عرفنا زياد !
مازلت باش تحكي و تسمع في نجاة جارتها وراها تحكي !
_جيب فاليزتك و ايجا بحذايا ، حتى يكملولك الدار ! انت موصيين عليك راهو !
تلفتتلها موش فاهمة شيء !
_شكون موصي عليا !
_سي زياد !
عينيها وقفت و هي تسمع فيها ، قلبها دق دقة غريبة ، تلفتت تغزر للراجل الي يحكي معاها و صاحت عليه !
_اطلبهولي و عديهولي توا !
_باهي ! ما تصيحش !
مازال كيف دخل للدار و يسمع في تاليفونو ينوقز ، هز عليه !
_,اهلا جعفر !
_عرفي ، المرأة مولات الدار تحب تكلمك !
قلبو رعش و هو يسمع فيه !
_هاتها !
خذات من عندو التاليفون ! تتكلم و ترعش فرد وقت !
_علاش تتصرف هكا ! اش تحب مني زياد !
كانت تحكي و تصيح ، و الخدامة واقفين مقابلينها يتفرجو فيها !
_ما تصيحش ! نعمل الي نحب عليه !
_قول لرجالك يروحو ، ما نحب شيء منك ! خليه يطيح على راسي السقف !
_لا ما نخاطرش بيك ، مازلت حاشتي بيك لباس !
_الو ، زياد !!
علق عليها التاليفون ، خلاها تغلي ، تلفتت لزميمهم و تكلمت !
_وين نلقاه زياد ! وين ؟
_ما نعرفش ! في دارو !
_وين دارو ؟
مازل ما جاوبش و جاوبت نجاة جارتها قبلو !
_دارو ، الدار الي كنتو باش تعرسو فيها قبل ما تعرس بفراس !
تلفتتلها مصدومة ! موش كان هي مصدومة ، حتى الخدامة متاعو ، يغزرولها حايرين فيها ، يعني هاذي هي المراة الي هربت على عرفهم قبل عرسو ! و خلاتو ما عرسش من بعدها زادا !
يغزرولها كيف قلبت الدورة و مشات تجري ، تجري و موش عارفة اش تعمل ، موش فاهمة اش يحب منها ، كارهها و يحب ينتقم و لا يحبها مازال و خايف عليها !
وصلت قدام الدار ، قلبها يدق ، الدار هاذي و حكايتو معاها ، الدار هاذي و فرحتو وقت كملها خاطر باش يعرسو فيها !
دقت الباب و قلبها يدق ، لا همها الجيران الي قعدو يغزرولها و لا همها هو الي جايتو بساقيها اش ممكن يعمل فيها ، تحبو يبعد عليها و يخليها تقاسي وحدها ، ما تحبش مزيتو الي مغلفة بحكاية أخرى من وراها !
كان يدوش و مازال كيف خرج ، يلبس في شورطوه و يسمع في الباب يدق ، خرج و هو شادد التريكو في يديه باش يلبسو ، اكيد واحد من الخدامة حاشتو بيه !
حل الباب و تسمط و هو يشوف فيها قدامو ، عينيها الحلوين الي كانو يغزرلو لوجههو و باعد تركزو في صدرو العريان ، رعش من غزرتها ، جبد مريولو الي مرمي على كتافو يلبس فيه و دار سابقها للصالة ، ماهوش باش يستدعاها ، الدار هاذي تعرفها اكثر منو و تبنات على ذوقها و كل شيء فيها مختارتو هي للحضة هاذي !
دخلت وراه و عينها تغزر ، ما تبدل شيء في الدار ، كل شيء كيف ما خلاتو ، لون الدهينة الي اخترتها ، الصالة الڨري الي شراتو فيها وقتها بالتقسيط خاطر سومها كان غالي بارشا ، الكواتروات ، حتى من الريدوات هما بايدهم ، المنضر خلى قلبها يعصر عليها ، اش عملت فيه و في روحها ، كيفاش هان عليها وقتها ، أما اش تعمل قدام احكام القلب ، حبت فراس و عشقت فيه ، كيف ما زياد عاشق فيها !
تغزرلو كيف قعد في الصالة ، جبد سيقارو يتكيف فيه و تكلم بصوت رزين نوعا ما ، عكس النار الي شاعلة فيه لحضتها !
_هاك جيت ، مرحبا ! الدار دارك !
قلبها زاد عصر عليها من كلامو !
مشات قعدت مقابلتو و تغزرلو ، تكلمت و باقي عينيها معلقة فيه !
_علاش تعاون فيا ! ما نستحقش تعاوني ! اش تحب مني زياد اش تحب !
تبسم و هو يسمع فيها ، حط السيڨارو في الصندريا و تكلم !
_ما نحب شيء ! أنا اصلا كان جيت نحب راك تو تحتي ، موش قاعدة مقابلتني و بعيدة عليا! كان يحكي وقت وقف و قدم ناحيتها ، وقفت مفجوعة و تنطرت شيرة الباب ! أما هو كان اخف منها !
شدها من زنودها يحكي و عينيها في عينيه !
_ما تسالش علاش نعاون فيك ، هذا أنا نعاون الي يستاهل و الي ما يستاهلش زادا ! و توا أخرج لا نبدل رايي و تشوف حديث ما يعجبكش ! و ما عادش تجيني لداري ! المرة هاذي باش نخليك تخرج المرة الجاية لا ! ما تدريش ما تخرجش منها على ساقيك !
غزرتلو و حلت الباب و خرجت تجري ، قلبها يدق بين ضلوعها ، شنية الراجل هذا و شنية القوة الي فيه ، شبيه يتصرف معاها بالطريقة هاذي, شنية القلب الي عندو ، مازال يحبها باعد السنين هاذي ، نفس الغزرة مازلت في عينيه و حتى كان غلفها بغشو الي ضاهر ، نفسو الثاير لحضتها مستحيل يكذب الي حست بيه !
شرد في حياتو و في الي قاعد يصيرلو ، عوض يستكفى بروحو و يبعد عليها بعد السماء على الأرض ، لقى روحو من جديد في دوامتها ، يعمبو قلبو الي باقي يدقلها ، ما نساهاش ، كان يتناسى فيها ، يكرهها و يحنلها ، يحب يبعد و يحب يشوفها كل دقيقة ، موش فاهم روحو ، هي لعنة في حياتو تقريبا ، الابتلاء الوحيد في حياتو هي نورهان ، لا عندو فساد و لا حرام و لا نهار شرب منكر ! ربي بلاه بيها هي من دون النساء الي في الكون ، هو الي الف وحدة تتمناه ، لقى حياتو واقفة عليها لا قدم و لا وخر ، بقى وين خلاتو و حتى رجعت مازال كيف ما كان ، مازال يحبها ، هذا الصحيح الي موش مستعرف بيه !
تلوح في فرشو يلوج في راحة البال ، بالك يلقاها في النوم ، غمض عينيه و سرح في نومة ما احلاها و من نومتو لقى روحو في منامة ، منامة ساسها نورهان ! نورهان ، نورهان ! و اه من نورهان في حياتو !
فاق و هو يستغفر ، كيفاش باش يعمل. يلزمو يبعد عليها و حتى كيف يشوفها ما يقربهاش ، عمل باصلو و تصرفلها في الدار و موش باش يخليها ، باش يتصرفلها في خدمة غدوة و علاش غدوة ،، توا يتصرفلها أكيد !
قام تغسل و شد تاليفونو يطلب في الناجي ، صاحبو و عشيرو و عندو عليه بارشا مزايا !
_اهلا بالمعلم , اهلا ، اهلا !
_اهلا بيك ، وينك ، اش عامل ، الخدمة لباس ،العايلة لباس !
_لباس يا معلم ، الحمد لله !
_طلبتك قاصدك في حاجة و ان شاء الله ما تخيبنيش !
_انت تامر موش تطلب و أنا ننسى مزاياك عليا ، مستحيل ننسى الي عملتو معايا مستحيل !
_صلي على النبي وخيان ! قلي موش مرتك عندها بوتيك في الحومة لهنا !
_اي عندها. لباس ؟
_لباس ، عندي شكون نحبها تخدم معاها و الشهرية باش تكون من عندي أنا كل شهر ، أنا نعطيك و أنت تعطيهالها ما غير ما تسمع المرأة الي باش تخدم أنو الفلوس من عندي انا ! نحب كلمة صحيحة ، الحكاية تموت بيناتنا !
_تهنى يا الخو ! شكوني المراة !
تنهد و هو يحكي ، عارفو باش يلومو ، عارف أنو الناس الكل باش تجي ضدو ، علاش يعاون فيها !
تكلم بصوت نوعا ما ضعيف !
_نورهان !
_شكوت نورهان ! نورهان بنت هارون ؟ لا لا تفذلك !
_اي , هذيكا هي ! و مانيش نفذلك !
_اش مرجعك و أنت اش حكايتك معاها ، ما تقليش ؟
_ لا نقلك لا تقلي ، ما يمشيش مخك لبعيد ، كان باش تعاوني احكي ماكانش اسكت !
_نعاونك مالا ما نعاونكش !
قعد يحكيلو و تفاهمو على كل شيء ، ماهوش باش يخليها ما غير ماوى و للجوع زادا !
الله غالب لا تربيتو و لا اخلاقو تخليه يتناسى أنو هي مراة و ما عندهاش مورد رزق تعيش منو !

✴✴✴✴

شراايكم في زيااد و حنييت قلبواا 🥺و شنو تتوقعووه يزيد يعمل لنورهاان رغم كل شي عملتواا معااه😉

ويينكم فالحلقاات الي فااتواا🥺 يلاا عااد وروني حمااسكم 🙏

رااني نستنى في ارااءكم و جامااتكم رااو الجااي نااااااررررر💥😍