💫💘 العار 💘💫

💓الحلقة 76...💓

💫💘💫

☄️ "أجمل حب ...هو الّذي نعثر عليه ...
أثناء بحثنا عن شيء آخر ..." ☄️

واقفة و موش مصدقة الي تشوف فيه ، يعني هو وين كان غاطس و مخها البسيط وين مشى ، ترمات على امها و قداش ما احلاها كلمة امي ، قلبها باش يطير بالفرحة ، تبوس و تعنق و تشم في ريحة امها ، تلفتت لخوها الي هو زادا رغم كل شيء يعتبر قطعة من روحها و ما تنجمش تعيب فيه و لا عليه ! تلفتتلو و تكلمت و الدموع هابطة من عينيها ، دموع الفرحة مع تبسيمة كبيرة مزينة وجهها !
_علاش ما قلتليش ، كنت باش نعاونك حتى في تنضيف الدار ! علاش خليتني نلبز البارح !
_حبيتها مفاجاة و لا ما كنتش باش نشوف الضحكة الحلوة الهاذي ! علي خوك زادا باش يخدم معايا ، حكيت مع زياد و قالي مرحبا بيه ، الدار كريتها و خلاصها عليا أنا كل شهر ، ما تحطش حتى حاجة في بالك ! و كيف ما وعدتك امك هاي بجنبك !
قدمت من ناحيتو و جبدت يديه باش تبوسها وين جبد يدو و جبدها ضمها ليه ، لا همو خوها و لا امها، مرتو و ما يحملش كسرتها !
_ما عادش تعاودها ، وعيت عليك راسك عالي ما تطاطيشو حتى ليا ! ايا برا عاون امك في الكسكسي ، القضية حاضرة و نحب فطور قمقوم كيف نرجع ، باش نخرج أنا و نسيبي نعملو قهوة في الحومة و نحكو شوية !
_باهي ! كسكسي كيف ما تحبو أكيد !
تبسمتلو و في قلبها بارشا كلام ليه ، عمرها ما كانت تضن أنو وقفتها في الكياس و جريانها بين الكراهب باش يبدل حياتها في ليلة و نهار و تصبح بدارها و راجلها ، راجلها الي يحبها و يموت عليها ! و عامل المستحيل غير ترضى عليه ! شيء ما شافتوش في دوارهم و لا شافت بوها نهار حس امها و لا حس تعبها معاه !
تلفت لامها كيف تفكرت بوها :
_ اياما بابا وين ؟ و كيفاش خلاك تجي وحدك ؟ عملك مشكلة ؟
_ابيك هاربة بيه فرس ، خليه يجرب الشر و الجوع و يعرف أنو ربي حق ، ما ينجمش يبعد على صحبة السوء متاعو و أنا حبيت نمنع بخوك لا يشد ثنيتو !
خوك هداه ربي ، و قالي ماعادش نطيب الطابونة و هو الي باش يخدم علينا ، الحمد لله الي جاء النهار الي باش يتحمل فيه المسؤولية و يفيق !
تلفتت تحل في باكو الكسكسي و تحكي مع امها ، تبسيمتها ترد الروح !
_طول ما هو مع جعفر ما تخافش عليه ا ياما ! و الله جعفر ملايكة و ربي بعثو ليا باش ينجيني ! كل وين نشوفو نتفكر دعوتك ليا كيف قتلي بري و تو ربي يسخرلك اولاد الحلال و يخافو ربي فيك ، جعفر مدللني و موش مخليني ناقصة شيء ا ياما ! بلعكس عايشة مع امو و بوه مرتاحة !
_ربي يجازيه خير على الي عاملو معاك ، هاني شفت بعيني بنتي ، ربي يهنيكم و يبعد اولاد و بنات الحرام عليكم !
_امين ا ياما ، ما احلاها دعيوة !
_امين ! و حماتك باهية معاك ؟
تبسمت و هي تحكي
_حماتي عسل الدنيا ، حمويا صعيب شوية أما بالقدر أنا و اياه ا ياما !
قعدت تحكي لامها ، فرغت قلبها ، فرحتها موش سايعتها موش عارفة باش تكافيه ، ما تعرفش أنو هي أكبر مكافاة اعطهالو ربي على صبرو و قلبو الكبير !...و أنو كيف ما هي ربي عوضها بيه ، هو زادا ربي عوضو بيها على الي عاناه قبلها سنين !