💫💘💫
☄️ “إن الروح إذا إلتقت بمن يشبهها
ترمّمت ، وتعـافت ، واكتملت".. ☄️
عشقتهم المزيانة قاعدة تكبر كل دقيقة و كل ثانية ! الحلمة المزيانة قاعدة تتحقق ! تلفتت لرانيا باعد ما سمعت كلامها !
_يزي اختي ، علاه تحكي هكا ؟
_ما نعرفش أما نحس قلبي صعيب يتحل من جديد و لا نحب من جديد ، ما عادش عندي ثيقة ههههههه !
ختمت كلامها بضحكة تغطي بيها في وجيعتها ، ما تحبش تنغص على نورهان فرحتها !
_يجيك نهار و يبرى قلبك عزيزتي ، ما فماش مستحيل عزيزتي !
_خليك مني يا عروسة ، ايا حاضرة و لا نقول لزياد يرجع غدوة ههههههه !
تبسمتلها و تكلمت !
_هههه ، أنا هي الي ما نصبرش لغدوة ! أما باش نبقى متحيرة عليك ! رد بالك على روحك عزيزتي !
_ما تتحيرش هههه، عمر الكلاب طويل !
_حاشاك رنوشة ! ربي يفرحني بيك على قريب ؛
هزت على تاليفونها الي ينوقز تتبسم !
_وينك حاضرة ؟
_حاضرة أكيد ، هاو جيتك !
خرجت هي و رانية اليد في اليد ، الروبة البيضاء السامبل الي بعيدة كل البعد على الروب متاع العروسات التقليدية ،مشطتها السامبل بارشا ، زينتها كيف كيف ، حرف الحرقوس اليتيم الي مزين صدرها ، ما عملتش غيرو ! كل حاجة فيها كانت سبيسيال ، خلاتو أول ما راها قلبو غصرو من جديد ، قداش حلم بالمنضر هذا من سنين ، قدملها يتبسم و شدها من يدها ! ما نجمش يقاوم سحرها و يصبر للي يبدو رأس رأس , قرب و باسها من خدها و وشوشها !
_ما احلاك !
تبسمت و طبست راسها ، قلبها يدق باش يخرج ، حتى عرسها الاول ما صارش فيها هكا ، احساسها اليوم بيه قوي بدرجة كبيرة !
حل الباب و ركبها و دار ركب بجنبها ، يتبسم ! موش مصدق أنو أخيرا نورهان ليه ، دقائق و يتكتب صداقهم ، دقائق و تولي مرتو !
قعدت واقفة لا عرفت تركب معاهم و تمسط عليهم جمعتهم و لا عرفت توخر و تشوف تاكسي و تخلط عليهم !
تسمع في التزمير تلفتت وين قابلتها كرهبة بيضاء وراء كرهبة زياد ، قعدت تثبت في الي يسوق فيها تبسمت و قربت ناحيتو تكلم فيه من شباك الكرهبة، تتكلم بتلقائية كيف عادتها !
_جابك ربي ، و لا راني كنت باش نكون عزول بيناتهم !
تبسم و هو يغزرلها ، اليوم مزيانة اكثر من العادة ، عمرو لا شافها شعرها مفرود و لا لابسة روبة كيف توا ! تكلم و عينيه تبع في تفاصيلها !
_انا جيت بالذمة باش نشيعك ، هذا كلام عرفي ، هههه عامل حسابو ما يحبكش عزول بيناتهم !
حلت الباب و طلعت و هي تتبسم !
_بصراحة عندو الحق ، ربي يهنيهم !
تلفتلها و تبسم !
_العقبة ليك !
سكتت و هي تسمع فيه ، عينيها بالسيف غزرتلو ، كان مركز في الثنية باش يخرج وراهم ، ما غزرلهاش أو تعمد ما يغزرلهاش !
تلفتلها يلقاها سارحة تكلم بطريقة خرجها من المود الي هي فيه !
_بصراحة الكسكسي ما لقيت ما نقول عليه ، اش من بنة و اش من صويبعات ، حتى الشايب قالك يعطيك الصحة و المرة الجاية اعملو ناقص ملح ههههههه !
تبسمتلو و تكلمت !
_صحة و بالشفاء ، علاش ما قتليش راو عندو الدم ، راني ما عملتش الملح جملة !
قعدو يتسايرو ثنية كاملة ، معاها ما يحسش بالوقت ، ما حسش بروحو كيفاش كل شوية يتلفت و يغزرلها و يتبسم ! ...
شادد يدها في يدو و يسوق ، كل شوية يعطيها تبسيمة ! يحسب في الوقت باش يروح بيها ، ما عادش عندو صبر ، غير يكتب الصداق و تصير اللمة و بعدها يروح بيها معاه ، موش مصدق ، رغم كل شيء صار المكتوب غلب و شوية أخرى و تولي حلالو !
دخلو للروستورون ، كيف ما تفاهم مع جعفر ، لمة صغيرة و جو فرح، العدول و معاه جعفر ، عمو قاعد على شيرة و لو موش راضي الا أنو ما ينجمش ما يحضرش لفرحة ولد خوه !
داخلة يدها في يدو و قلبها يدق، فرحتها بيه و بوجودو معاها ، فرحتها أنو بلحق ربي جمعهم في الحلال و تصلح الماضي الي هي فسداتو !
قعدت بجنبو وين قابلها عمو ، عمو الي كان يڨحرلها ، أما ما تنجمش تلومو ،و لا تلوم أي حد يخمم فيها تخمام غالط ، خاطر حد ما يعرف الي حسوه و لا يعرف اش صارلهم الإثنين !
بين لحضة و اختها تكتب الصداق ، بين لحضة و اختها ولات حلالو !
قاعد على اعصابو أما من حبو لزياد ما كانش ينجم ما يحضرش و ما ياقفش معاه ! طلع راسو على غفلة وين قابلتو قاعدة، قلبو غصرو من شوفتها ، نفس الوجه ، نفس الملامح الزعراء ، نفس العينين الي ذبحوه ، هي ما سرقتلوش كان فلوسو ، هي سرقتلو قلبو و مشات ، ماهيش صغيرة و الي عملاتو معاه لا هو متاع عمرها ولا متاع عمرو ، عمرو ما كان صافي مع مراة كيف ما كان صافي مع ريما ، نيتو الخبيثة جات لعندها و تمحات ، كان مستعد لكل طلباتها المهم تبقى معاه !
يغزرلها كيف حطت فلوس فوق الطاولة و قامت ، ما لاحضاتوش و لا لاحضت حد من الي قاعدين ، اصلا كانت قاعدة و سارحة في دنيا أخرى !
طبس على زياد و باركلو بصوت ضعيف و خرج يجري وراها !
مازلت كيف قدمت ناحية الكياس باش تحبس تاكسي و حست بايدين في حزامها و سكينة في جنبها ! تسمع في صوتو ترعبت !
_في بالك مانيش باش نلقاك ! لو في كرش حوتة نخرجك منها !
_المنجي !
_سي المنجي. من سكات تتعدى قدامي للكرهبة عنا حساب مازال ما وفاش !
قدمت معاه ، مرعوبة ، عارفة أنو ما يضرهاش أما كيفاش باش تحكيلو ، كيفاش باش تبررلو الي صار !
باعد ما قامو العرايس ، قعدت مع طارق الي مازال يتعشى ، تدور في عينيها في الروستورون ، ياسر مضخم ما احلاه !
طلعت راسها كيف سمعت صوتو و تبسمتلو!
_تحب نوصلك توا !
_تعشى في عقلك ، توا نستناك ! اصلا أنا و الله لا عيني في مرواح و الدار فارغة !!
تنهدت , وين طلع راسو و تبسملها !
_هذا الي بيك ، نكملو نتعشو و نهزك تعمل قهوة اش رايك !
غزرتلو و سكتت ، الوقت تقريبا الحداش متاع الليل و رغم الدنيا صيف ، ما يجيش تروح موخر مع راجل غريب عليها !
_لا موش لازم. ما عادش وقت اصلا ؛ ما نجمش نوخر باعد الوقت هذا ، اش باش يقولو عليا في الحومة !
تبسم و تكلم و هو يغزرلها !
_اش عندك في الناس ، أنت تعرف روحك شنية و الناس عمرها لا تزيد و لا تنقص من قيمتك و لا باش تفيدك في حياتك ! اكبر دليل عندك زياد و نورهان ! لو تبع كلام الناس عمرو ما كان باش يرتاح و باش يقعد بعيد على المرأة الي يحبها عمرو كامل !
تبسمت و جاوبتو !
_قلت الحق و الله ! مالا نمشو نعملو قهوة ! مولاها ربي ، موش ديما نخرج أنا ، الحق أنا ما نخرجش اصلا هههه!
تبسم و هو يسمع فيها ، لا يزي مزيانة و لا يزي بسيطة و زينها هادئ ، هداية زادة كانت مزيانة و كانت طريقتها في التعامل معاه في البداية ما احلاها ، خلاتو يتعلق بيها ! و باعد اعطاتو كف لا يقرا لا يكتب خلاتو يعاني من بعدها !
ملامحو تحجرت ، حط المغرفة و قام يغسل في يديه ، قعدت تبع فيه بعينيه ، موش فاهمة شنية الحزن الي غيم عليه فجأة ، ضاهر بحبوح و ما احلاه و فجأة تقلب !
جبدت ساكها و خرجت قلم الحمير ، هزت السكينة الي قدامها و شدتها بيدها تعاود في الحمير عليها ، موش ديما تتزين أما كيف تتزين تحب زينتها على قاعدة ! ما حست كان بايديه كيف جبدت السكينة من يديها. تكلم و هو يتبسملها!
_مزيانة ما غير حمير !
تبسمت و طبست راسها ، قداش حشمت مشى في بالها مازال في WC,!
_نمشو ؟
اوماتلو براسها من سكات ؛ الفازة خلاتها تتمنى الأرض تتشق و تبلعها ، اش باش يقول عليها توا ، تتزين لشكون و هي معاه ، ليه ؟ زادت حشمتها و هي تغزرلو ماشي قدامها ، يدز باكتافو الاعراض ، مشيتو كيف كانت تشوفو قبل تضحكها ، أما اليوم حستها حاجة أخرى ، حست كل حاجة فيه تنادي رجولية ، هذا راجل بلحق موش حازم و لا فراس و لا غيرهم من الرجال الي ما تسواش !
حل الكرهبة و طلع ، هي قديمة صحيح ، سيري 148 أما منضرها نضيف ، مازلت جديدة بالنسبة ليه ، الفلوس الي كان يكلت عليهم ليل نهار باش يعرس بيهم لو رضات هداية و اهلها ، خذى بيهم الكرهبة هاذي ، عالاقل قد امكانياتو و ينجم يدور بيها الدولاب خاطي وقت الخدمة ؛
طلعت بجنبو و ركبت ، الروبة النوار الي لابستها تسكر عليها الباب و من زهرها هي ، قد ما حاولت باش تعاود تحلو و تخرج طرف الروبة الي تشد ما نجمتش !
تلفتتلو تحكي بنبرة استحباب !
_طارق سامحني الباب تسكر على روبتي و ما حبش يتحل ، يضهرلي تكونسى !
تلفتلها يغزر لطرف الروبة الي شد في جنب الباب ! قدم منها و قرب بطريقة أنو نفسها في خدو اليمين ، كتفو وقت لامس كتفها بطريقة موش مبرمجة و لا كان ناوي القرب هذا ؛ الي كمل عليه ريحة البرفان متاعها ، ياسمين و هادية كيفها ، ما تنجمش تكون ريحتها غير الريحة هاذي ، هي بكلها كيف الياسمينة ! حس النفس صعب عليه و احساسو خضو لحضتها ، قد ما حاول الباب ما نجمش يحلو من جديد و ما ينجمش يقعد بالقرب هذا خاطر باش يغلط أكيد ! خاصة كيف لفت وجهو ليها و قابلو الروج الي بكري تعاود فيه ، رعشة سرات فيه ، و مخو هزو لبعيد لو بايدو كان فسدهولها لحضتها بشفايفو ، باش تعرف أنو الروج الي عملتو هذا قضى عليه !
بعد مفجوع من الفكرة في حد ذاتها ! تكلم و هو يهرب في عينيه منها !
_نمشي نحلو من برا ، الكرهبة مازلت كيف خذيتها مستعملة و ضاهرة فيه مشكلة الباب !
سكتت و هي تسمع فيه ، ماهيش منجمة تجاوبو ،، موش مستوعبة الاحساس الي حستو في اللحضة هذيكا ، قلبها دق من جديد ، شنية الغصرة الي حستها !
هو حل بابو و هبط و هي جبدت النفس مليح ، النفس الي دقيقة لتالي شعرة و لا تقطع عليها !
حل الباب من برا و جبدلها طرف الروبة ، رجعو في وسط الكرهبة ، طلع راسو و غزر لوجهها وين جات العين في العين ، أول مرة يركز في تفاصيلها ، وجهها بريئ بطريقة غريبة ! ملامحها بسيطة ببساطة حياتها و طبيعتها !
سكر الباب و رجع ركب في بلاصتو ، رجع يسوق و هو سارح ! حكايتو مع هداية بدأت بالاحساس هذا و الرعشة هاذي و وفات بوجيعة كبيرة ، ما لازموش يبني احلام جديدة و يعيش في الخيال ، البنات الكل تحب الماديات و تحب تعيش مرتاحة ، يعني حتى رانية الباهية الطيبة ، كيف باش تحب تعرس باش تعرس بحد يريحها و يعيشها في العز ، موش حد كيفو أكيد !
✴✴✴✴
وهااذي حللقة اخررى كيمااا وعدتكمم😘
خااطر نلقى في تفاااعل😍
يلااا البناات سمعووني زغرووووطة قويييية😂
واخيراا زياااد و نورهاان عرسواا و وصلوااا لبعضهم 😍
زعماا تو كيفااش بش تتعداا ايامااتهم و حيااتهممم مع بعضهممممم💕🤍
و سي العم هي هي و طللهااا فيين و شدهاا بالكمشة 🔥
شنو تتصورواا يعمللها و كيفااش بش ينتقم منهااا😉
و كيفااش تتصورواا حكااية طاارق و راانية💗 متحمسين ليهاااا 🥰
انشالله حلقتين ليووم عجبوكم😘
واذاا لقيت تفااعل غدوة نزيدكم زوز اخرين و كان لزم اكثر🔥
انتم و شطاارتكمم😉
لييلتكمم زينة😘
و تنسااوش اراااءكم و الجااام🥺🙏
نحببببببكمم و نبوووسكممم وحدة وحدة ♥️❤️
أنت تقرأ
💫💘 العار 💘💫
Storie d'amoreبنوتااتي 😍نفتتحواا كرونيك جديدة من اعز ما تقرااو💕 حكاايتها متأكدة بش تعجبكم 😘و بش تعيشوا معها لحظة بلحظة🤍 و بش تغوصواا في احداثها ♥️ومع كل حلقة بش تزيدوا تتعلقوا بيها🥰 و كيما تعرفوني منودكم كان بالحاجة الممو و الباهية🥰 اقراوها و نش بش تندمواا...
