💫💘 العار 💘💫

💓الحلقة 25...💓

💫💘💫

☄️ "يشيب الرأس ولا يشيب القلب
ياترى ماذا فعلتي لتأسري  قلبه طوال العمر.." ☄️

حومة كاملة قعدت ما قامت ، اسمع يالي ما سمعتش ، الناس ثايرين و حايرين ، كيفاش من دون البنات الي في الحومة الكل ، يرجعلها هي و ياخذها هي ، شيء من الغيرة و شيء من قلة المعروف ، ما خلو ما قالو في ساحراتو ، في موكلاتو ، في بطل عرسو و رجعلها ، في بيه في عليه كيفاش يرجعلها باعد الي عملاتو ، أما حد ما تجرا و واجههو و هو فما شكون يقول للصيد فمك ابخر ، أكيد لا  ، الكلام كلو في التراكن ، و الغمز و الهمز في الضهر أما في الوجه الناس الكل فرحانتلهم !
قامت الصباح على صوت تاليفونها ينوقز ، هزت و هي تتبسم ، توا جمعة من الي رجعو و هي طائرة في السماء ، ماهيش حكاية ماديات خاطر بلحق آخر حاجة تخمم فيها معاه ، حكاية اهتمام و محبة صادقة !
_صباح النور !
_صباح الورد حبي  ! راقدة؟
_فقت ، فقت ! تخدم ؟
_لا  ما نخدمش ، باش نشوفك اليوم ، نصيف ساعة و نجيك قدام الدار ! ما تفطرش باش نفطرو مع بعضنا !
_باهي ! نستناك !
علقت التاليفون و قامت تجري ! موش عارفة اش تلبس ، رجع بيها العمر للعشرينات ، وقت تبدأ حايرة اش تلبس و كيفاش تلم شعرها ، حايرة ما بين القلم الاحمر و الروز للشفايف ، حايرة بين السبادري و السندال !
لبست شيميز بيضاء متاع رانية و معاها سروال نوار  لارج و سندالها النوار ، بحكم الطقس و سخانتو ، لمت شعرها الفوق ، غسلت وجهها بالماء و الصابون و عملت قلم حمير ، و كانو متعمدة تهبلو ، زادت بانسو في عينيها ، عينيها الي تسحر أي حد يغزرلهم موش كان زياد !
عملت رشة برفان و طلة اخيرة على هندامها ، راضية عليه نوعا ما و لو بايدها تلبسلو ما خير و تكون في عينيه ما خير ، أما هاذي امكانياتها و هي ما حاشتهاش بشيء منو حاليا غير محبتو ، قد ما لحلح بيها باش تأخذ من عندو فلوس و تأخذ ما ناقصها ، ما حبتش ، قاتلو كيف تفضى نخرجو جميع ناخذو الي حاشتنا بيه الكل !
تسمع في تاليفونها ينوقز ، هزتو و حلت الباب و خرجت ، تغزرلو قاعد في الكرهبة و لينات الشمس كيف العادة في عينيه ، تلفتلها يتبسم دوب طلعت !
_ما احلاك !
تبسمت و تكلمت بصوت ضعيف
_يعيشك !
قصت عليها نجاة البرابول حوارهم وقت مدت راسها و قربت لشباكو تتكلم و هي تهز و تحط في نورهان ! تتكلم تحب تثبت بالرسمي باش يعرس بيها و لا جيست كلام !
_صباح الخير سي زياد ، صباح الخير نورهان ! حبيت نباركلم على العرس ! وقتاش ان شاء الله !
تلفت لنورهان و غمزها و رجع تلفت لنجاة !
_احنا نورمالون الجمعة الجاية و كنت باش نعمل استدعوات ، أما أنت تكفي و توفي يا نجاة ، انشرها عاد في الحومة كاملة !
قال كلامو و خدم كرهبتو و تعدى خلاها وجهها ملخلخ من النبزة الي كلاتها ! ...
تلفتتلو تتبسم !
_ياح غاضتني نجاة ههههههه ! ساعة كانت ديما تجيبلي في اخبارك !..
تلفتلها ردلها التبسيمة !
_انا زادا ديما تجيبلي في اخبارك ههههههه أما موش بلاش !
حلت عينيها مستغربة !
_ووه كيفاش !
_ههههه لا علينا !
_امان قلي زياد !
_كل وين تحكيلي أي حاجة تخصك تمشي لجعفر  تأخذ مصروفها ! برابول بلحق ههههههه !
قعدت تغزرلو حايرة !
_مالا قلي كيف ضيفتني عندها وقت رجالك يصلحو في الدار بالفلوس !
تبسم و جبد يدها كبس عليها !
_ما يغلى عليك شيء نورهان !
تكلمت و هي تتبسم !
_حتى أنا قداش بوهالية اذا أنت الي كنت عاملي شهرية البوتيك ، ماكش باش تعطي نجاة فلوس باش تضيفني ، أه منك زياد !
تلفتلها حاير !
_منين عرفت بحكاية الشهرية ؟ نجاة حكاتلك !
_لا ماي كيف جات باش تطردني من الخدمة للا مولات البوتيك ، قاتلي زياد هو الي كان عاملك شهرية و توا خطب و ما نتصورش مزال باش يخلص عليك !
تبسملها و تكلم
_و حتى كان عرست اصل ، اش دخل هذا في هذا ! الساقطة قاتلي مرضت و بطلت وحدها !
ڨحرتلو و تكلمت !
_بشكون تعرس !
تبسم و جاوبها
_بيك يا روح زياد ، بيك أنت !
راكى الكرهبة و هبط هو و اياها ، مدلها يديه و دخلو جميع !
قعدو في طاولة على جنب ، وين مقابلينهم كليك متاع بنات ، ضاهرين يا يقرو في الفاك ، يا يخدمو جميع !
نادى للسارفور و وصاه على بيتي داج ليهم الإثنين !  باعد تلفتلها و جبد يدها من جديد عندو و تكلم !
_نكملو فطورنا و نهبطو نعملو دورة مع بعضنا ، ناخذو ما لازمك الكل اليوم ، اليوم بكلي ليك !
تبسمت و جاوبتو !
_باهي زيدون !
تبسم و جاوبها !
_يهديك كبرت على زيدون هاذي ! راني اربعين سنة !
تبسمت و هي تغزرلو !
_ربي يخليك ليا زياد ! و الله مانيش مصدقة أنو احنا مع بعضنا توا !
تبسم و كبسلها على يدها !
_صدق نورهان ، صدق ! باش نكتبو الصداق الجمعة الجاية !  ماكش متغششة خاطر ماناش باش نعملو زازا ، صداق في البلدية و سهرية احنا و الاحباب ، الناس الي تحبنا بلحق و اكهو !
تبسمت !
_انا ما حاشتي بشيء بخلاف اني نكون معاك زياد !
تلفتت على غفلة وين لقات وحدة من هاك البنات ، شاهلة فيه ، حاطة يدها على خدها و تتامل فيه ، كلي ناقصة هي شكون يزيد يحسدهم !
تكلمت و هي تڨحرلها !
_قوم نبدلو البلايص ، ايجا أنت في بلاصتي و أنا في بلاصتك !
غزرلها مستغرب !
_علاش ؟
_امان زياد ، هكا حبيت !
طلع راسو وين قابلو كليك البنات ، فهم مخها وين مشى ، مهبولة هو طايح فيها و وقف للدنيا الكل على خاطرها و هي غايرة من فروخ صغار !