والله إنك عليهم فيك زود وش يجيب الوطى للنايفه

١

—
( الرياض، بيت خليفه ال ضيدان )
كان صباح يجنن بمدينه الرياض في موسم الشتاء، دخلت البيت و وراها اختها حمده اللي قاعده من الصبح تتحلطم على الاختبار اللي بقى لها بكرا
فتحت باب البيت و هي تضحك بشماته لاختها: محد قالك تدخلين طب حبيبتي شوفي اختك الصغيرة الجيده دخلت تخصص ما في تعب ولا هم يحزنون.
حمده: ان ما سكتي قسم بالله برمي مكياجك الجديد من فوق الطابق الثالث يا الورعه.
نايفه قلّبت عيونها و باستهزاء قالت: عجل تبيني اقوم مع الدجاج الفجر حتى الشمس ما طلعت و اذاكر، حشى علي.
شالو شيالهم و نقاباتهم وهم يدخلون الصاله، تخصرت حمده و قالت: الكلام مو الحين يا روحي، الكلام لما نتخرج و نتوظف المعاشات حتحكي.
ناظرتها نايفه بنظره و دخلوا الصاله، ضحكت نايفه و هي تشوف ابوها قاعد يشوف التلفزون: الله يخلي لي بابا بس مو قاصرني شي فديته
ابتسم و هو يشوف بناته داخلين عليه بعد ما خلصوا دوامهم في الجامعه، فتح ذراعيه يستقبل اخر العنقود و مُدللته بين احضانه: يا مرحبا ببناتي ، شلون الجامعه اليوم؟ اشوف الابتسامه من اذن لاذن يا نايفه عساه دوم
ضحكت نايفه و لفت لاختها: انا خلاص اجزت و خلصت امتحاناتي اما حضرة الدكتوره للحين باقي لها اختبار عشان كذا منفسه يا روحي هي
حمده مسكت نايفه من كتفها و دزتها بعيد عشان تحضن ابوها: يبا تكفى سكت ام لسانين لاني بقوم الحين و اخليها هي و الفرشه الجديده اللي شراها ظافر واحد!
نايفه شهقت تحط ايدها على صدرها و تكلمت بالهجه البنانيه: وجع صدق! حمده شو هيدا! لازم تكونين رقيقه عاختك الصغيره!
ضحك ابوهم على هواشهم اللي اربعه و عشرين ساعه ولكن يدري انهم يموتون على بعض: خلاص يا بنات روحو بدلو و ساعدو امكم و شهد بالغدا
قامت حمده و هي تشيل عبايتها و تعطي نايفه نظره: قصدك يا حمده روحي لان حضره سمو الاميره ما تقرب المطبخ اصلاً
نايفه سفهتها و لقت لابوها: بابا بقولك
راحت حمده تبدل و هي تهمس: ايه بدينا
ضحك خليفه على حلطمة حمده من اختها و لف لنايفه بعد ما نادته: عيوني، امري يا بنيتي
ابتسمت نايفه و هي تبوس راس ابوها: فديت عيونك، حجزت على المغرب في الصالون ابي اروح اسوي تريتمنت لشعري و اسوي اظافري، يصير؟
رفع خليفه حاجبه و سأل: ما رحتي الصالون انتي الاسبوع اللي راح؟
ابتسمت وهي متوهقه: ذيك المره كانت عياده سويت لوجهي فيشل
خليفه ناظرها و تنهد لانه يطالع عيونها الوساع و وشلون منتظره موافقته بلهفه: تمام روحي بس بشرط
رفعت حاجيه: وشو؟
قال: حمده تروح معك
هزت راسها بالموافقه: تمام ما عندي مشكله بقولها، اصلاً انا ابيها تجي مع دايماً بس ترى انا و صديقتي هديل متواعدين فالصالون.
خليفه رفع حاجبه و هو يضحك: مشاءالله عليكم صدق
ضحكت و هي تقوم تحب راسه و تروح لغرفتها.
بدلت و حطت لوشن بجسمها و لبست بنطلون اسود و تي شرت ابيض و سلبر صوف و تعطرت و نزلت المطبخ.
فتحت الباب و انصعقت من ريحه البصل و على طول طلعت.
رهف (امها) ضحكت عليها بحكم انها تعرف طبايع بنتها، شهد و حمده اللي كانوا يقطعون الطماط طالعوها و هزو روسهم بيأس.
تنهدت شهد: مدري متى بتصير سنعه هالبنت
ضحكت حمده: اسم نايفه و كلمة سنعه ما يجتمعون في جمله حبيبتي لا تسمعك بس
ضحكت ام ظافر على حمده: شوي شوي عليها توها صغيره و بعدين ترى جانب زين انها مهتمه بنفسها قبل ما تدخل كورسات الكرف معكم
ضحكوا البنات و فجأة سمعوا صوت نايفه تنادي حمده
حمده: بروح اشوف الشيخه شتبي
طلعت من المطبخ و راحت لغرفة اختها و فتحت الباب: خير، شتبين يا فيفي عبده؟
شهقت نايفه اللي كانت تسوي لها ماتشا و لفت لحمده: اوف حمدوه! للحين ماسكتها علي! بعير ما تنسين؟!
ضحكت حمده و هي تقلد رقص و هز نايفه اللي كان قبل اسبوع، كانت ناسيه تقفل باب غرفتها و دخلت حمده و شافتها مندمجه بالاغنيه المصريه و مسكت رقصها عليها
هزت حمده كتفها و تمايلت: وش كان يقول؟... ايييي الا ولعبت يا زهرررررررر
حذفت نايفه المخده على حمده و الابتسامه انرسمت على وجها بسبب تقليد اختها لها و تعالت اصوات ضحكاتهم.
نايفه: اسمعي
حمده: وش عندك غردي؟
نايفه: اتجين معي الصالون؟ انا و هديل متواعدين هناك بنسوي تريتمنت لشعرنا
حمده قعدت تفكر: مدري يمكن اجلس اذاكر لامتحان بكرا
عبست نايفه وجها و راحت لاختها و حاوطتها: بليز حمدوه! تعالي ابيك معي تكفين!
طالعتها حمده بنظرة تفكير، هي موافقه لكن تحب تشوف اختها تترجاها.
نايفه: بليز عشاني، حرام عليك ارحمي نفسك قاعده تدرسين ليل نهار، باست نايفه خدها و ضحكت حمده.
حمده: تمام بروح بس عشان البليز الكيوت ذي
نايفه: ثنكيووو!، رجعت تسوي الماتشا مالتها
سألت حمده اختها اول ما تذكرت قطوتها اللي راحت العياده قبل يومين: صدق لونا للحين بالعياده؟
نايفه: اي للحين، بتطلع اليوم بليل وحشتنيييييي
حمده: وااييي يا زينها صدق
تنهدت نايفه وقالت: اخخ حبيبة امها هي
حمده راحت غرفتها و غسلت يدها و خذت شاور سريع و بدلت و رجعت لعند اختها.
لقتها قاعده على الكنبه و قدامها صحن فواكه و الماتشا مالتها و تشوف ايبادها.
حمده: ما راح تتغدين معنا؟
نايفه: نو، مسويه دايت
حمده: وش دايته يا بنت! جسمك و وزنك موووت ما له داعي تن...قاطعتها نايفه
نايفه: مو دايت تنزيل وزن يا حظي انتي، دايت صحي بس، تعرفين العيد قرب و ابي اسكر ملفك انتي و شهد و دانه دخلت شهد الغرفه على اخر كلام نايفه.
شهد: انتي عارفه انك صاكه ملفاتنا حتى لو لبستي خيشه يا كلبه يعني لا تسوين نفسك يعنني.
حمده: وهي صادقه، وجع صدق شافطه جينات العايله الحلوه كلها.
ضحكت نايفه و بانت غمازاتها، شهد: حتى غمازات جدتكم وصلت لها.
حمده: الشكوى لله يختي.
قامت نايفه لهم و حضنتهم: حبايبي انتو والله كل وحده فينا تقول الزود عندي شفيكم كذا تحطمون نفسكم.
حمده: اي اي صح
سمعوا صوت الباب ينفتح و عرفوا انه ظافر جاب عياله من المدرسه بحكم صوت ضحك قمر و شاهين. راحت شهد تلبس جلالها لان اكيد صقر و عبدالله بيجون بعد شوي عشان يتغدون مع بعض.
حمده و نايفه نزلوا يرحبون باخوهم الكبير و عيال اخوهم.
حمده فتحت يدينها: يا مرحبا و مسهلا تعالو عند عمتكم المفضله يا حبايبي!
نايفه فتحت يدينها بعد و قالت: تخسين، انا عمتكم المفضله صح؟
شاهين و قمر سيده ركضوا لحمده و نايفه تأففت و تخصرت: مالت عليكم صدق، مب من زينكم همي اخوي حبيبي مب انتوا اصلاً
راحت نايفه تركض لظافر اخوها و نقزت تحضنه بحكم انه طويل.
ظافر: شلون امتحانك اليوم يا قلب اخوك؟
نايفه و هي تضحك: انا اموري تمام التمام اسأل الصايبه اللي وراي باقي لها امتحان بكرا
ضربها بخفه على راسها و همس: مب قدام عيالي ذا الالفاظ يا بزر.
نايفه ضربت يده: طيب مب تمد يدك علي لو مب هيبتك قدام عيالك كان تفاهمت معك
ضحك ظافر: اي اكيد صح
لفت نايفه اول ما حست بشخص صغير يحضن رجولها من تحت، قمر: اسفه عمه نايفه بس ماما علمتنا ان نسلم على الكبير اول بعدين الصغير
نزلت نايفه و شالتها و باست خدودها: يا قلبي انتي مستحيل ازعل منك انتي بالذات
جا شاهين و مسك طوف تيشيرتها: انا بعد صح؟
نزلت لمستواه و باست خده: اكيد انت قلبي و قمر روحي مستحيل ازعل منكم
نزلت شهد و نزلت جلالها لما شافت ان صقر و عبدالله لسى ما جاو: مشاءالله على عيالي امكم نسيتوها؟
صرخوا شاهين و قمر و ركضوا لامهم و ضموها و قعدو يقولون لها وش صار معهم في يومهم بالمدرسه.
ظافر: و مشاءالله على امهم ناسيه ترحب في ابوهم
ناظرته شهد و ابتسمت و قرب منها ظافر و هو يحاوط كتوفها بذراعه و يقبّل راسها.
نايفه دزت حمده لصاله و تقول بقرف: مب متعوده لا لا لا مستحيل اتعود
لفت عليها حمده و هي تضحك: انا تعودت و انتي للحين ما تعودتي، شدعوه بديت احس ان فيك فوبيا من المتزوجين مدري بكرا لتزوجتي شبتسوين.
نايفه: وجع! الله لا يقوله ذا اللي ناقص بعد، توني نونو بدري مره، اصلاً بحلل شبابي بعدين بفكر بالزواج، والله ما القى احد يدلعني مثل بابا.
حمده: قولي من رح يستحمل طلباتك
نايفه: انا بروح اكمل اكلي تلاقين ثلج الماتشا ذاب و صارت تلوع الكبد، سي يو بيبي!
حمده قلبت عيونها و ضحكت: قالت ايش قالت بيبي، حيوانه عليها حركات بس اتجنن.
سمعت حمده صوت امها تدعيهم ان الغدا خلص و ان صقر و عبدالله في الطريق جايين.
تنهدت بعمق و راحت لطاولة الطعام عشان تاكل معهم.