والله إنك عليهم فيك زود وش يجيب الوطى للنايفه

٥٩

—
انتهى و فتح كبت ملابسه عشان يلبس ثوبه، انحنى يدور بين ملابسه لكن عقد حواجبه من امس ورقة بين ملابسه.
طلعها و تنهد يمسح على وجهه و انرسمت ابتسامه صغيره على شفايفه من عرف انها رسالته لـ غزاله.
فتحها و قرأ أبياته فيها و بعدها قّلب الورقه و ارتخت ملامحه يقرأ أبياتها هي، عض شفتها يكرر قرأة الأبيات اللي اكتبتها وقت عتابها له، قبل تعرف السبب و هز راسه يهمس: يا جعلني فدا الأيادي اللي أكتبت ذي الحروف.
لبس ثوب رمادي و غترة بيضاء و نسّفها و دخل الورقه في جّيبه و طلع من البيت و ركب سيارته.
شغل السياره و طلع خارج البوابات و بدء يسوق على نفس اللوكيشن اللي طرشه له تيمور، رفع راسه يشوق بيت ال براق و مّر على مجلسهم و عقد حواجبه باستغراب من شافه فاضي.
زفر و مّر في طريقه على بيت مشعل و مجلسه و اشتدّت قبضته على الدركسون يشوف عدد السيارات المهول الموجود امام مجلس مشعل.
خفف سرعته و نزل شُباك السياره يرفع نفسه و يشوف اللي داخل المجلس، طاحت أنظاره على شيخ و تذكره، نفس الشيخ اللي عقّد قران خواته مع عيال مسفر.
اول شيء طرى عليه ولد مشعل، عامر، او ولد عمهم رائد اللي حكّت له عنه العنود، و اللي تذكر ان اسمه سالم.
من غير التفكير مره ثانيه، داس على الدواسات و توجه لـ مجلس مشعل، صّف السياره و نزل بسرعه و هو باليالله يتحكم بسرعة خطواته و كذالك سرعة نبضات قلبه.
اخذ نفس عميق قبل يدخل عشان ما يبين و يفضح نفسه، و بعدها فتح الباب و دخل و هو يلقي السلام بعّلو صوته الجهوري: السلام عليكم !
وقف كل من في المجلس له و بدء يسلم عليهم، و اخفى علامات استغرابه من عدم تواجد اهله و من جاء دور سلامه على سعود سأله: ملكة من ذي ؟
رفع سعود حاجبه و قال: بخير وحشتنا يا اخوي شلونك انت ؟
زفر عبدالله بمسح على شنبه و قال: اخلص علي سعود ! ملكة من ذي ؟!
رفع سعود حواجبه باستنكار لحدة نبرة عبدالله و قال: صل على النبي يا رجال، ملكة بنت عمي مشعل على عرب من حايل اسمهم ال جملان.
أطلق نفس براحة و نطق: الخبيثة ذيك أعرست ؟!
ضحك سعود بخفه و قال: لا هذي الثانيه الهاديه اللي مالها حس، الخبيثة ابشرك زوجها هناك جنب عمي صالح، و إياك تلف يا دلخ.
كان عبدالله على وشك انه يلف و يشوف خّلف لكن رّص سعود على كفّ عبدالله و قال: يا حمار لا تلف ! لكن أتوقع تعرفه اسمه خّلف بن فايز الـ^^^^^.
توسعت عيون عبدالله و همس: هو خداها ؟!
هز سعود راسه و قال: كمل سلم على الرجاجيل اخلص و بعدين تعال اجلس جنبي لازم أفضفض جاي مغصوب.
زفر عبدالله و كمل سلامه على الرجال و سّلم كذالك على خّلف و لا تكلم و قال له شي.
راح و جلس جنب سعود و همس و انظاره على خّلف: يا عزتي لك يا خّلف.
التفت عبدالله على سعود و قال: الحين يا ولد ابتلشت، ابي اطلع أنا جيت احسب به عّلم، و محد من اهلي بيحضر عشان السالفه و أنا مرتكز اهنا.
قال سعود: سوو نفسك عندك اتصال و جاك شي و سو انسحاب تكتيكي، و خذني معك اللي من اهلي اهنا كلهم الشيب ماكل راسهم، بتروح لأهلك انت صح ؟
هز عبدالله راسه بالإيجاب و قال سعود: اجل اسمع، نزلني بيتنا عشان اخذ سيارتي لاني جاي مع ابوي اهنا، و بعدها توكل انت و أنا بروح اخذ اهلي لان ادري انهم مبتلشين داخل.
فهم عبدالله من كلام سعود ان العنود داخل حاظره الملكه، و شكلها مغصوبه مثل اخوها.
وقف عبدالله و طبّق كلام سعود و خذى سعود معه بحجة انه يحتاج مُساعدته في شغلة و طلعوا كلهم من مجلس مشعل بسيارة عبدالله.