—
« الـمَـالديــف »
كانوا يتعشون بصمت، رفع عيونه لها يشوفها و حصلها رافعه جوالها تصور منظر الغروب، ابتسم بخفه يشوف أنوثة طلتها قدامه و مدى نعومتها.
كانت مسرحّه شعرها في كعكة على تحت مع حلق ذهب بشكل نصف دائرة، و زيّن عُنقها سلاسل الذهب البسيطه و كذالك أصابعها بخواتم ناعمه بسيطه.
لفت عليه تنزل جوالها و نزل عيونه على الفستان الأبيض بالحمالات الدانتيل البيضاء اللي كشف جُزء من ظهرها و نحرها.
تنحنح يرجع أنظاره لـ صحن الستيك اللي قدامه و توردت ملامح جود من قفطت عيونه تشوفها، شدت على شوكتها و أخذت لها لقمة من باستا اللوبستر تأكلها.
رفعت عيونها المُزينة بالمسكارا و الكحل البُني له من نطق عساف: بكرا بناخذ جتسكي ندور فيه صوب البحر، بيكون خاص فـ بتاخذين راحتك.
ابتسمت على الفعاليه و قالت بهدوء: حلو.
بعد ثواني صمت، نزلت جود عيونها على الصحن و لقت نفسها شبعانه بعد ما أكلت نصفه، أخذت جوالها و وقفت تقول: الحمدلله، شبعت.
رفع عيونه لها ولا تكلم لأنها اصلاً مشت تدخل داخل الفله، تنهد يرجع ظهره على الكرسي يتأمل الغروب على البحر، مو عاجبه وضعهم و نفورها منه لكن يتحمل و يذكر نفسه انها صغيره و ماره بأشياء كثير.
وقف و طّلع الترولي خارج الفله و رجع داخل، اخذ الزقارة من مخباه و ولعّها يقربها لـ شفايفه، نفث الدخان و ابتسم على طيف ولده ثنيان اللي راوده و همس: والله مدري وش سوى ولدي معك يا هزاع.« قسم هزاع و نايفه »
صرخ هزاع: ثنيان قسم بالله ان ما نزلت ان أسطرك يا تيس !
توسعت عيون ثنيان يصرخ: انت ليش كذا تصارخ ! نايفه شوفيه !!
رفعت نايفه أكتافها وهي تلبس عبايتها تقول: مالي دخل.
تخصر هزاع يرفع عيونه لـ ثنيان الراكب فوق دواليب المطبخ ينطق: ثنيانوه ! ان وصلت لك والله محد يفزع لك يا ورع !
ضحكت نايفه على شكل ثنيان وهو يغيض هزاع بحركات وجهه، اخذت شنطتها وقالت جُمله وحده خلت ثنيان ينزل على طول و يلحقها: أنا بروح بيتنا أشوف قمر !!
توسعت عيون هزاع من شاف ثنيان ينط و ينزل و يلحق نايفه للباب وهمس بصدمه: أيا القرد !
زفر يعّدل ياقة ثوبه و مشى خلف نايفه اللي ضحكت و شبكت يدها بيدين ثنيان.
نايفه لـ هزاع: شوي شوي على الولد ترى الصوت ما راح يجيب فايده.
هزاع: نسيت اجيب طاري قمراه عشان يغدي مصطلب.
ضحكت تهز راسها و نزلت عيونها على ثنيان من نطق: الحين قمر موجوده مع شاهين ولا شاهين راح ؟
نايفه: لا موجود شاهين، كلهم ينتظرونك.
ميّل ثنيان شفته بعدم إعجاب: اوف.
رفع هزاع حاجبه يفتح سيارته: شعندك تتأفف ؟؟
ثنيان: مالك دخل أكلم نايفه أنا.
طارت عيون هزاع يقول: ورع ! قسم بالله أتلك معي المجلس و حريمتك تشوف قمرا ها !
حاوط ثنيان رجول نايفه يقول: اصلاً نايفه ما راح تخليك تسويها.
طلع ثنيان لسانه و صغّر هزاع عيونه يركب السياره، ضحكت تشّيله و تهمس وهي متوجها لـ مقعد السياره الامامي: ثنيان عيب تكلم عمك هزاع كذا، ترى بزعل.
بوز ثنيان وقال: هو دايماً يصارخ.
نايفه: اكيد بيصارخ لما تركب فوق المطبخ يا ولدي !!
زفر ثنيان يصّد و يتكتف، ركبت السياره و ثنيان في حضنها و همست في أذنه: يلا قول أسف، عشان ما أعلم قمر انك راعي مشاكل.
ميّل شفته و رفع عيونه لـ هزاع، وهمس: بس عشان قمر.
ونطق ثنيان: أنا أسف !
لف عليه هزاع وهو يسوق السياره وقال: وش قلت ؟
ثنيان رفع صوته: أسف !!
عقد هزاع حواجبه يقول: وش قلت ؟ ما سمعت.
رفعت حاجبها على حركات هزاع و قرصت كتفه بتحذير، رفع هزاع عيونه و غمز لها قبل يقول لـ ثنيان: اها تعتذر ؟ عيدها.
زفر بغضب ثنيان وقال: أسف خلاص !
ضحك هزاع يشيله من حضنها و يحطه في حضنه يقّبل خده ويقول: بعدي هذا خويي !
ضحك ثنيان يحضن هزاع ويقول: أنت أطلق خويي ! بس صراخك ذا مشكله.
رفع هزاع حاجبه يركز على السواقه ويقول: انت اللي تحدني.
أنت تقرأ
والله إنك عليهم فيك زود...وش يجيب الوطى للنايفه
Romance~~ من غدت همي وانا مالي ديار الا ديرها جالها بين الظلوع الظامية روحة وجية جادل كل الدروب المعشبة تنبت بثرها جت تبي جرح وقصيد وخلت الثنتن لية من يحدثني حديث الثلج للجمر بثغرها والله اني كنت ناوي لي بهاك الجمر نية من نشدهاك الوساع الخرس عن دنيا حورها...