جبل نورسين 🇲🇦 (مكتملة )

الجزء 7

كنزة :  اليوم غادي يجي خطيبي و عائلتو يتعشاو معانا خاصنا نوجدو ليهم العشا غادي يجيب معاه صاحبو جاي من امريكا خاصنا نبانو كلاس ونوجدوا بسطيلة ودجاح وشلاضة الكبيرة

فاطمة: اوا ابنيتي ضربي على جيبك ياو الا عندك شي صريف تحت منك  اريه باش نتقداو العشا

كنزة: واش اماما كتحماقي عليا علاه شتيني خدامة ولا ردامة قوليها لديك بنتك اللي حداك هي اللي خدامة

نورسين فاقت من سهوتها و شافت فختها و غمزتها و قالت  باستهزاء 

نورسين:  اش بغيتي بفلوس البايرة ؟؟

فاطمة:  ياو نتوما عيقتوا حيدوا من قدامي دايرين كي شرايكات المزلوط كتدابزو على صباح

بغات تخرج نورسين من الكوزينة و هي تقفز من بلاصتها منين سمعات صوت مجهد ديال التهراس عندهم فالبيت  فالبلاصة شدات فماماها بقوة الخلعة حيت نورسين طبعها خوافة بزاف ..

نورسين:ماااامااا اش هادشي

فاطمة:  اويلي   هاد التهراس عندنا  و لا كدبت ٠؟؟

كنزة : اه عندنا واقيلة صوت جاي من البيت ديالنا انا و نورسين

فاطمة : ها ويلي وحدي شنو هادشي

خرجوا من الكوزينة  كيتجاراو للبيت  بالحلة باش كيحلو الباب كيبان ليهم زاج مشتت فالارض و السرجم مهرس ...

فاطمة: [ضربات على فخاضها ]  ياو  شكون هرس السرجم [ضربات فحنكها ] ياو  اللي هرسو بغيت ليه القطيعة الله يا ربي الله رزوانا فالسرجم و عاوتاني خاصنا نصاوبوه  

نورسين :  غادي يكون شي واحد ضربوا من برا

فاطمة خرجات من البيت فالبلاصة لبسات جلابتها ودارت درتها وخرجات تشوف شكون مول هاد الفعلة تبعتها نورسين وكنزة هبطوا فالدروج كيتجاراو
حتى وصلو لدار ديال جبل اللي كان خارج حتى هو لابس تيشورت بيض لاصق على صحتو مع شورت فالأسود شافتو ماماة نورسين و هي توقف اما كنزة الله يرحمها بقات مسمرة فبلاصتها كتطلع فيه و تهبط عضات على شنايفها  بقوة ما عجبها نسات راسها راها مخطوبة  اما نورسين  جفلات مكانها بحالهم فاش شافتو خارج  و لكن طلعاتو و هبطاتو و حنات راسها ما بغاتش تشوف فيه خدات عليه حكم مسبق مع الأسف 💔 ...

جبل شافهم كلهم واقفين كيشوفو فيه ابتاسم ليهم ...

جبل : صباح الخير

فاطمة : ياو صباح الخير و التيسير  و الرباح نتا هو جارنا جديد

جبل عجباتو ماماة نورسين و كيف ما غاتعجبوش و هي اللي ولدات ليه حب حياتو اللي معدباه و شاوياه فقلبو  حول نظراتو لنورسين لقاها كتشوف فالأرض ما كتشوفش فيه ما عرفش علاش على الاقل تعطيه غير تبسيمة على صباح يبدا بيها نهارو باش يطلع منور  ...