جبل نورسين 🇲🇦 (مكتملة )

الجزء 11

🌕الفصل 1: جبل نورسين ⛰️⛰️

الجزء 51:

فاقت من سهوتها فاش سمعات الصداع برا عرفات الضياف جاو ؛ تحل الباب ودخلات عندها كنزة ؛ نورسين فالبلاصة سدات الكتاب و شافت فختها اللي كانت لابسة فراشة فالاخضر و دايرة كحل خفيف مع كلوز ....

كنزة: [ هزات المراية كتشوف فراسها ] جيت زوينة مشاء الله خمسة فعينين البايرات

نورسين : لا الزين زينة خاصك غير العقل

كنزة : [طلعاتها و هبطاتها ] وانتي بعقلك خاصك غير الزين المهم هانا غادة لبسي بيجامتي الكرونة و نتي لابسة هاد الهداارس ما عمرك ياختي تفرحيني و تقادي حالتك شوية ديما مشوهة

نورسين : ياك نتي أ لالا مقادة اوا ما شي شغلك فيا

كنزة : اوا مع الاسف نتي ختي و غاتشوهيني مع عائلة راجلي الا شافوك فهاد الحالة زعما ما تكونيش كاديريها بالعاني

نورسين : كيفاش كنديرها بالعاني

كنزة : اوا راه قالو البنت فاش ما كتزوجش كتولي تحسد اللي مزوجات الله يستر بحال والو تكوني ناوية تكحلي ليا صورتي مع ناسي

نورسين : انا ما بانتلي حتى وحدة مزوجة هنا

قربات نورسين لختها كطلع فيها و تهبط

نورسين : راك غير مخطوبة أ زين بلا ما تبقاي تبني و تعلي غير نتي و عظامك و ما تنسايش الا ما تزوجتش انا غير بلا ما تحلمي تزوجي هاد العام ديريها حلقة فودنيك

كنزة خنزرات فنورسين تخنزيرة ديال الغدايد و ضربات رجليها مع الارض كتعبير على الفقصة ديالها

كنزة : كنكرهك نتي سبابي الله ياخد فيك الحق كن غير نعلو شيطان ديك ليلة و طفاو ضو و نعسو نتي غير خراتك فاطمة من اللخر لا زين لامجي بكري غير مثقلة على الكرة الارضية سيري شوفي لالياتك كيف دايرين بزين و نتي سعاية احسن منك حتى شعرك ما كتمشطيه كيف ناس فصالتك كي ستيلو تفووو بسبابك كرهت الحياة الله يعطيك شي هزة تهزك عليا من هنا و تهنيني منك كيفما كتفقصيني فصحتي بغيت ليك الفقايص

خرجات كنزة من البيت وخلات من موراها انسانة مجروحة و دموع محجرين ليها فعويناتها شهود على هاد العداب اللي كتعيش فيه ؛ جلسات من فوق السداري و حطات يديها بجوج على راسها و حنات راسها لارض و كتفكر فكلام ختها اللي ديما كتجرحها بيه نفس الهدرة كتسمع من عند ختها يومياااا تكرهات من حياتها كتبان ليه كحلة كرهات راسها كرهات ختها كرهات عائلتها كرهات علاش تحطات فهاد الدنيا أصلن ديما كدعي ربي يرزقها بشي زوج كيفما بغا يكون المهم غير تدرق زلافتها من هاد تريكة و تهني بالها من هاد الكلام المسموم اللي كينهش بداخلها... باغا غير ترتاح من هضرة المجتمع اللي ماكترحمش نعلات شيطان وناضت مسحات دموعها و شافت فنافدة اللي فالبيت ديالها و قالت بحرقة خارجة من قلبها ...