جبل نورسين 🇲🇦 (مكتملة )

الجزء 8

غمزها بغميزة زعزعاتها و هبط فالدروج سبقها و هي مسكينة كيغمق عليها ما كتبقى فاهمة راسها من رجليها كيحشمها بزاااف بتعامل ديالو و عاد زيد عليها حكمها المسبق عليه كلشي كايترون ليها فدماغها فاقت من سهوتها لقاتو سبقها عاد تبعاتو طايرة فالدروج ...

تبعاتو نورسين و اللقطة ديال انه هبط يربط ليها السيور مزال فبالها حتى وصلو لباب ديال العمارة و هي  تعيط بسميتو بطريقة خجولة ..

نورسين : جبل

جبل بمجرد ما سمع سميتو من فمها حس براسو طاير الله على سميتو كيف كاتخرج من فمها كيف العسل على قلبو بسرعة التافت عندها ...

جبل: نعام بغيتي شي حاجة ؟؟

نورسين بقات ساكتة شوية و فالأخير تشجعات و نطقات بطريقة خجولة ...

نورسين : و هو صراحة انا خايفة يمشي يشوفني شي واحد معاك و راك عارف مالين الحسنات كثار

جبل : ما تخافيش  انا اكثر واحد نخاف على سمعة ديالك و ما نبغيهاش توسخ و لا ينعت فيك شي واحد بكلمة خايبة

نورسين بقات ساكتة كتشوف فيه و كلامو كيضور فراسها كيفاش انا اكثر واحد نخاف على سمعتك ما فهمتاش قصدو دخلات ليها إن و اخواتها واش كيحاول بهاد حلاوة اللسان يؤثر عليها و لا شنو ؟؟ ..

جبل غمض عينو و عاود حلهم عرف راسو كبتها ثاني و غاتشك و هو يصلح الجملة ديالو بطريقة هرسات قلبو ..

جبل: زعما بحال ختي ياك نتي كتقولي ليا خويا 

حنحن و كيحس بقلبو كيتعصر كيجرح راسو باش ما تشك فحتى حاجة نورسين تبسمات ليه عجبها الحال كيفاش كيقولها ختي ارتاحت نسبيا انه ما عمرو غايشوف فيها بطريقة خايبة و ما ناويش على شي حاجة ...

نورسين : ربي يخليك أ خويا

جبل كيحس براسو وصل لطوب ديال الاعصاب فهاد اللحظة ما عندو ماعدا من ديك كلمة خويا كأنها كتغرز فيه الخناجر ...

جبل: انا حاط طوموبيل من مور العمارة تماك كتكون طريق خاوية و ما كاينش اللي غايشوفنا

نورسين : [بفرحة ] شكرا بزاااف 

ابتاسم ليها بزز و حل الباب و قال ...

جبل: شفتي ما عندك مناش تخافي مشينا أ البكاية

نورسين ضحكات من الكلمة اللي نعتها بيها "البكاية "؛   حنات راسها و خرجات فحين جبل سد الباب ديال العمارة و كيحس بشياط فقلبو مصبر راسو غير بزز ؛ دار يدو فجيبو و بقا تابعها و هي غادة قبالتو و كيطلع فيه و يهبط كأنه كيحفظ كل انش فيها و فجسدها كيبتاسم بلا ما يشعر واخا كاتعصبو حتى تعيا غير انها حداه و بقربو كتنسيه فكلشي كأنها هي المهدئ ديال قلبو هي دا و دواء هي النار و الما فنفس الوقت كيفما كتشعلو كتطفيه ❤...