جبل نورسين 🇲🇦 (مكتملة )

النهاية

جبل شد فيديها و جرها و طلعوا لطوموبيل ديمارا و زاد و هو يصوني ليها تيليفون ابيل فيديو من عند ربيع دوزات الخط وهو يبانلها جالس فالبرزة بنفس جلابة و كيضحك
نورسين : افين أمولاي سلطان
ربيع : واش ما عوالاش تجي ناس كلهم جاو هانتي شوفي ها رجاء حتى هي وصلات و نتي مازال عيقتي
دور ليها الكاميرا لرجاء بانتلها جالسة كتدير ليها باي باي
نورسين : رجاء مبرووك عليكم
رجاء: الله يبارك فيك أختي لهلا يخطيك
ربيع دور لكاميرا لراسو
ربيع : مامشيت حتى تزوجت هه
نورسين : تستاهل غير عنداك تنساني و ما تبقاش تسول فيا أجدر
ربيع : الالا وابعدي مني مالي ولدتك و نسيتك باركة عليك غير برج ايفل لصقي فيه
نورسين دورات تيليفون لجيهة جبل
نورسين : هاهو برج ايفل معاك شخصيا ههه
ربيع بدا يصرط فريقو
ربيع : ج...ج...جبل
جبل دور وجهو و ابتاسم و عاود دار كيشوف فطريق
جبل : ربيع مبروك عليك
ربيع : الله يبارك فيك أسي جبل لهلا يخطيك
دورات تيليفون نورسين لجيهتها
نورسين : يخليلي الادب و صواب
ربيع عاد انتابه لنورسين دايرة الحجاب بدا كيفرنس كي الهبيل
نورسين : مالك كضحك غير نتا و عضامك كيهروك ملائكتك
ربيع : مرحبا بيك معانا فالاسلام أجا معاك الحجاب واخا تعديتي عليه
نورسين : جاني زوين ياك أربيع
ربيع : اختي خفت نقولك جاك زوين و يخرجلي راجلك من تيليفون
نورسين : أ لا جبيلو ضريف
ربيع : اودي جبيلو ضريف معاك غير نتي زهري بحال زهر واحد القرد ههه
نورسين : اينا قرد ؟
ربيع : قالك هادو واحد جوج قرودة واحد عندو زهر وواحد ما عندوش الزهر ديما تيمشيوا لواحد جنان ديال البنان ياكلو منو او فاش تايجي مول الجنان تايزعزع بيهم شجرة ديما تايطيح اللي ما عندوش الزهر تايشدو و تايسلخوا بالعصا اوا يالالا واحد نهار داز القرد اللي عندو زهر عند هاداك القرد اللي ما عندوش قالو يالاه ناكلو البنان قالو انا ما نمشيش معاك انا ما عندي زهر ديما تاناكول العصا قالو هداك اللي عندو زهر غير يالاه انا نطيح فبلاصتك و ناكول العصا فعوطك مشاو فاش جا مول داك جنان وزعزع بيهم شجرة طاح هداك اللي عندو زهر او عطاه بنانة قالو نتا سير ديما كطيح و كانسلخك اليوم غانعطي العصا لهداك اللي ما عمرو طاح 😂😂
نورسين دارت كرااااخ بضحك و جبل حداه غير كيشوف فيها
نورسين : نااااري طرت اجي بعدا كاينة سلمى و يعقوب و ماما
ربيع: واكلشي كاين بقيتي غير نتي يالاه تلاحي هاهي جات العمارية غانطلع فيها و انا و فردتي رجاء
قطع عليها و حطات تيليفون حبس جبل اللوطو حدا باب دار و نزل هو و نورسين هزات راسها بانتلها الخيمة فسطح و الموسيقى مطلوقة نورسين غاطير بالفرحة حيت جات طلعات فدروج بسرعة و جبل موراها حتى وصلات لسطح لقات واحد المنظر فشلها بضحك ربيع من فوق العمارية و لابسة جلابة و دايرة طربوش أحمر و نضاضر كوحل ديال شمس فعينو و قابط الميكرو فيدو و كيغني و كلشي كيصفق
ربيع : اسيدي ربيع ياااا الوردة و عليك يطيح ندى ياااالاه كلكم معايا
الكل : اسيدي ربيع يا الوردة و عليك يطيح ندى
ربيع: أ رجاء أ القردة اشداني لشي زردة
رجاء شيرات عليه ببلغتها و كلشي دار كراخ بضحك و هوما كيشوف فهاد الهبال
ربيع : *هاز الميكروفون فيدو * قلقنا رجاء بلاتي بلاتي يالاه كلكم معايا أ ربيع أقطيب اللوز ....
كيدير الميكرو لجيهتهم
الكل : خليوه يدوز
ربيع : أربيع أقطيب البنان ....
الكل :خليوه يبان
ربيع : واااااهي العريس ضوي بشمع البلدي وااااهيا العريس ضوي بطريسينطي شي تزغريتة أ العيالات
دور الميكرو لجيهتهم و كلشي بدا يزغرت حتى شقو ليه راسو