جبل نورسين 🇲🇦 (مكتملة )

الجزء 32

🌕🌕جبل نورسين ⛰️⛰️

الجزء 190:
🌺🌺🌺

فمكان آخر و بالضبط حدا المستشفى داخل سيارة من نوع رانج روفر سوداء كان جالس جبل و فيدو كارو حال نافدة ديال سيارتو و حاط مرفوق عليها كيكمي و كينفث دخان و كيخرج يدو من نافدة ساهي فالفراغ و كيتفكر فاش طاحت نورسين مغمى عليها حس بقلبو تشنج داخل قفصو صدري صدقا الموت كان أهون من داك الألم اللي حس بيه فاش فقدات وعيها  بين يدو جميع الافكار سلبية طاحو عليه خايف تفارقو و يتحرم منها و هو بستة و ستين كشيفة باش لقاها عندو هاجس و فوبيا من انه يفقدها أو توقع ليها شي حاجة راه يقدر يمشي فيها يتبعها ما يفكرش جوج مرات فاش كتألم كيتألم أضعافها فاش كتفرح كيفرح أضعافها أحاسيسو مرتابطة بيها كأن روحو و روحها واحد منطابقين او بكثرة عشقو ليها و هوسو بيها  رجعات بداخلو أكثر منو صدقا الحب جميل و لكن فاش كيتعدى الحدود كيعدب مولاه و يمرمدو مزيان الشيئ ان زاد عن حده إنقلب الى ضده و هادشي اللي واقع لجبل لو أنه كان كيعاني من مرض عضال عندو دوا  و ما يكونش كيعاني من مرض مزمن كينهش فالقلب و ما عندو دوا  💔...

فاش طاحت بين يدو ما فكرش جوج مرات فالبلاصة هزها جابها لاوبيطال حتى من جدو و جداتو ما ساقوش الخبار كان باغي غير يوصلها للكلينيك باش يعرفو مالها  فاش جابها بقا واقف شحال كيساين  ساعة دازت عندو بحال القرن كايحس بروحو غاتخرج باغي غير يعرف شنو عندها و لحسن الحظ ما كان عندها والو غير ضغط نزل ليها و سخانة كانت فيها عطاوها إبرة خفضوها ليها و عطاوها مهدئات باش ترتاح و حتى هو عاد حس براسو ارتاح  فاش طل عليها من نافدة لقاها ناعسة مرتاحة عاد رجعات فيه روح ما بغاش يزعجها حيت طبيبة قالت ليه ما غاتفيق على ساعة داكشي علاش هبط لطوموبيلتو و بقا فيها كيسف فالكارو و كيبرد فهاد الحرقة اللي شاعلة فقلبو ...

حل الباب و نزل من طوموبيل و لاح الكارو اللي فيدو زطم عليه و اتاجه للمستشفى  يشوفها واش فاقت و لا مزال حيت كيحس بقلبو توحشها و عينو اشتاقت لشوفتها ...

طلع فالدروج ديال المستشفى بخطوات سريعة حتى دخل لباب داير يدو فجيبو و كيتمشى بخطوات واثقة رزينة  حتى كيلمح طفلة جاية كتجري بإتجاهو ابتاسم بلا ما يشعر شحال كيحمقوه البنيتات  خاصة اللي شعرهم مبوكل كيفكروه غير فيها  اي حاجة كتشبه ليها كتسطيه حتى قربات ليه البنيوتة  عاد وقفات حاطة يديها على صدرها كتنهج ؛ جبل بلا ما يشعر حنى عندها جلس قفازي و حط يدو على كتفها مررو بحنان و قال بحب ...

جبل: غي بشوية عليك

هزات عويناتها الصافيين الملونيين شافت فيه و حركات راسها   مع إبتسامة حتى نطق جبل بملامح بشوشة ...

جبل : شنو سميتك ؟؟

أنور :نيليا

هز جبل راسو شاف شكون اللي وقف عليهم  بمجرد ما لمح وجهو و هو    يصغر عينو فهاد الشخص ؛  وجهو ما خافيش عليه و ملامح وجهو مألوفة ؛ وقف جبل من الأرض فاش شاف باباها قبط فيديها  و خنزر فجبل  و جرها و خرجو من المستشفى...