🌕🌕جبل نورسين ⛰️⛰️
تتمة الجزء 119 :
جبل حل الباب و نزل خلا نورسين غير ساهية فالفراغ و كتخمم فتصرفاتو معاها واخا كيجيوها فشكل ما باغاش تدخل فكرة انه معجب بها حيت اولا سيد لابس عليه و عند بالها بلي ما عمر شي حد يديها فيها و زيد عليها سيد كيقوليها مرة بنتي مرة اختي مرة عائلتي يعني غير داك الحرمان ديال انه ما عندو لا تالي لا والي هو اللي خاليه يعاملها هاكاك هدا هو المنطق اللي غادة بيه و هاكا كتفكر نورسين هي ماشي غبية حتى لديك درجة باش ما تفهمش تصرفاتو على ان فيهم شي حاجة فشكل و لكن نورسين اللوجيك اللي غادة بيه هاكا داير بالاضافة انها مؤثرة بقصص الحب و عارفة عدابو قاصح لدلك من الاحسن كتجنب تدخل فكرة ان جبل معجب بها حيت كتخاف من الحب مع الأسف 💔...
فاقت من سهوتها فاش شافت الباب تحل و مع ابتسامة مزينة وجهو ؛ كيفما العادة عمرها شافتو مخنزر فوجهها بالعكس ديما كيبتاسم معاها الشيئ اللي كيعطيها واحد الانطباع زوين عليه ❤....
جبل : تفضلي
حيدات الصمطة و نزلات بشوية عليها لمح جبل المنديل اللي شاداه فيديها ضاغطة به على بلاصة جرحة باش يتقطع الدم ؛ هز يديها و هي بقات غير كتشوف حيد داك المنديل و نورسين غير حاضياه لمح سميتو منقوشة بالحنة بخط كبير و عريض بقا مصدوم كأنه ما ثيقش شنو كتشوف عينو بقا غير كيرمش فضهر يديها بينما نورسين طرطقات عينيها على وسعهم فاش شافتو قشع سميتو اللي من الصباح و هي كتحاول تخفيها حسات بدوخة فهاد اللحظة الله يا ربي الله واش هي سانية كونطرا مع الشوهة قدام جبل و كل مرة كتطلع ليها شوهة فشكل أكفس من شوهة اللي قبل ...
جبل ما بغاش يحرجها و رجع لمنديل لبلاصتو عرف غايكون البلان من تصميم سلمى و نيشان مشى دماغو لفاش كانو فالبيت و كانو مدابزين عجبو الحال حيت شاف سميتو مكتوبة على يديها كأنه حس بنورسين ديالو و ملكو و ما كاينش اللي يحيدها ليه ❤...
جبل : تقطع ليك دم خاصنا نديرو عليها pansement
نورسين غير كتصرط فريقها و تفكيرها فواش شاف سميتو و دار عين ميكة و لا عور ما شافهاش حيت مادار حتى ردة فعل بقات ساهية فيه ما جاوباتو لا ب اه لا بلا الشيئ اللي خلاه يهز يدو يمررها حدا عويناتها و قال مع ابتسامة فيها نوع من تلاعب ...
جبل : فين مشيتي ؟؟
نورسين فاقت من سهوتها ...
نورسين: لا هانا معاك شنو قلتي
جبل : تسنايني هنا نمشي لفارمسي نجيب ليك pansement و نجي داكوغ
نورسين : داكوغ
جبل : اوا هانتي كاتعرفي لفرونسي علاش كاتقولي ليا ما كنعرفش بان ليا بلا ما ندير ليك شي سوايع
غمزها و ضحك و عطاها بالضهر بينما هي بقات متبعاه بعويناتها حتى زهقات ليها ابتسامة اعجاب بشخصيتو الزوينة شخصيتو اللي كتحس بيها فشكل حنين ضريف الله يعمرها سلعة و كيخاف عليها كأنها وحدة من عائلتو ما عارفاش شنو قصتو بالضبط و لكن فغيمون شخصيتو اثرات فيها عمرها شافت شي حد بحالو كتقول فنفسها فهاد اللحظة سعدات بنت المراة اللي غاتدي شخص بحالو الا كانت هادي هي شخصيتو الحقيقية اللي كيبين ليها راه انسان ملاك ما منوش جوج هادشي اللي كيقوليها عقلها ❤...
أنت تقرأ
جبل نورسين 🇲🇦 (مكتملة )
عاطفيةيعقوب : حتى انا اخويا دزت من الحب من طرف واحد و لكن ماوصلتش ليك نتا المرحلة اللي وصلتي ليها ديال الحماق جبل: و راني حمق واش كانبان ليك بعقلي نورسين فين خلات ليا شي عقل بقا ساكت و سهى فالفراغ و قال بحرقة كأن قلبو اللي كيتكلم فهاد اللحظة ... جبل :...
