جبل نورسين 🇲🇦 (مكتملة )

الجزء 35

🌕🌕جبل نورسين ⛰️⛰️

الجزء 216 :

جبل: لا انا اللي غانعلمك رشيد كايكون مشغول

نورسين : [ بعفوية ] رشيد ضريف و ولد ناس عزيز عليا بزاف فاش تلاقيتو هنا إحساس فشكل و الله كيرجعني لديك طفولة ديالي عرفتي فاش كنت صغيرة كان كيشفر الحلوة من حانوت باباه و كيجيبها ليا [إبتاسمت ] كنت انا و ياه ما كنتفارقوش حتى كانت ماما كتقول ليا [ كملات كلامها بحزن ] نتي آخرتك غانزوجك لرشيد

على إثر جملتها الأخيرة حس بألم شبيه بطعنة خنجر فقلبو غصة مريرة فحلقو اما روحو فكانت كتنزف ما حس براسو حتى زاد جر لجام بطريقة قوية حتى إنطلق بيهم الحصان بسرعة بطريقة مجنونة لدرجة نورسين تخلعات و شداتها الدوخة كتحس براسها غاتطيح و تروع قلبها و بدات تغوت ليه بصوتها رقيق ...

نورسين: حبس عفااااك عفااااك جبل

جبل حتى سمع صوتها عاد ضرب برجلو فالفرس باش يقلل من سرعة عاد بدات كتباطئ سرعة الحصان حتى بدا غير كيتمشى بيهم كيفما اللول نورسين كتحس براسها كيدوخ فالفراغ كان غايسكت ليها القلب ...

جبل : نورسين واش نتي بخير ؟؟

نورسين : بخير غير شداتني دوخة

جبل : سمحي ليا

نورسين : لا بالعكس زوين عجبني الحال و لكن ما مولفاش بهاد السرعة كاملة

جبل : تبغي نرجعو ولا نكملو ؟؟

نورسين : ما سخيتش و لكن نرجعو أحسن

جبل قلب إتجاه الفرس و عم الصمت بيناتهم حتى وصلو لحدا الفيلا و نزل جبل بإحترافية مولف ؛ و بقات نورسين راكبة كتشوف فيه بخوف ...

نورسين : كتبان ليا نزلة أصعب من الركبة

جبل : غير بشوية عليك تهدني انا غانشدك حيدي رجلك غير بشوية

نورسين كتحرك راسها بنفي غاتحمقو ...

نورسين: ما عرفتش خفت

جبل : [ بحنان ] واش انا معاك و تخافي

نورسين: نخاف نطيح

جبل مد يدو بجوج حيت بانت ليه مخلوعة ما غاتعرفش تنزل بوحدها واخا يبقى معاها هاكا نهار كامل ...

جبل : تلاحي لعندي

نورسين : [بعفوية ] غاتشدني ياك

جبل : [ بمزاح ] لا غانلوحك ؛ تلاحي لعندي ما تخافيش

نورسين بقات كتشوف فيه مدة عدة ثواني حتى تلاحت لعندو بجزءها العلو و عنقاتو مزيرة عليه حتى بورشات داتو كاملة ؛ مرر يدو من مور ضهرها و جرها لعندو حتى نزلها من ضهر الفرس ...

❣❣❣❣

بينما جوهرة كانت خارجة من الفيلا و لمحاتهم فنفس المنظر معانقين بطريقة متقاربة بزاف منظر قسم قلبها لشطرين حسات بدمعة تجمعات على طرف جفونها احاسيس سامة تكونو فداخلها قتلوها فثانية ميات مرة عمرها ضنات بلي غاتشوف جبل فهاد الوضعية مع شي انثى من غيرها حاولات تقوي راسها و تمسح دموعها و دخل لراسها بلي جبل ماشي ديالها و عمرو غايكون ديالها من اللول إرتاكبت غلط فاش حطاتو فراسها ...