🌕🌕جبل نورسين ⛰️⛰️
الجزء 272 :
❣❣❣
بينما جبل طلع و حط سارة فبيتها و غطاها حنى باسها فراسها و قرصها فخدها بشوية باش ما تفيقش و قال ...
جبل: سمحيلي
تقاد فالوقفة و خرج من بيتها اتاجه لبيت جوهرة حل الباب لقاها طافية ضواو شعل الضو و بانت ليه مكمشة على روحها ففراشها قرب حتى وقف على راسها بانت ليه مغمضة عويناتها و أنفاسها منتظمة باينة ناعسة حنى و حط يدو على جبهتها يشوفها واش سخونة ساعة وجد درجة حرارتها معتدلة عاد ارتاح جوهرة بحال بنتو و كيخاف عليها بزاف قرب و قبلها فجبينها و تقاد فالوقفة و اتاجه بخطواتو حتى وصل لباب و قال بهمس رجولي ...
جبل: سمحيلي حيت آديتك فقلبك أ بنتي
طفا ضواو و سد الباب و خرج من عندها ؛ طلع لطابق الثالث كيحس بعظامو مدڭدڭين حتى هو باغي غير يرتاح عيا يدير فالخاطر حتى كايبقى هو بلا خاطر تهد فصحتو و كره عيشتو حل الباب ديال بيتو و اتاجه للحمام حيد حوايجو كاملين و دخل تحت رشاش لعله يزول هاد تعب كلشي كيبغيه الا هي ما كتبغيهش واش فنظركم جبل اللي طايب فالحب و الغرام ما غايعرفش بلي جوهرة كتبغيه واش غاتخفى عليه نظراتها و غيرتها الواضحة قدام نورسين أكيد عارف بلي عندها مشاعر اتجاهو من زمان و لكن عارف غير حب مراهقة دغيا يفوت و واخا يكون حب حقيقي عندو طرقو باش يبعدها من هنا و يحيد هاد الحب من قلبها للأبد هو كتهمو وحدة و بس هي نورسين ما كايشوفش من غيرها ترسخات فداكرة قلبو و عقلو و ما غاتزول منهم حتى يتدفن ....
لبس بينوار ديال الحمام فالأسود و خرج اتاجه لدريسنغ روم الكبيرة اللي عندو فبيتو لبس شورط و ديباردور مبين عضلاتو و لاصق على لحمو فالأسود و مع شعرو مخربق بالما جا المظهر ديالو زوين بزاف لبس كلاكيطة و خرج من بيتو هبط فالدروج حتى وصل لسفلي و اتاجه لعند سلمى و يعقوب و نورسين بالخصوص باغي يشوفها و يسقي عويناتو بشوفتها و يشحن قلبو ببراءتها و عفويتها ...
❣❣❣
بينما نورسين كانت جالسة مع سلمى و يعقوب هي كانت جالسة اونفاص معاهم ففوطوي فالجردة و سلمى جالسة حدا يعقوب و حاطة راسها على كتفو و قابطين فيد بعضياتهم ....
سلمى : أهلن أهلن بلالا نورسين نورتينا
يعقوب : أغبرتو علينا هاد العشية فين كنتو سارحين نتي و داك بولحية ؟؟
نورسين خجلوها بأسئلتهم ندموها ڭاع علاش جات عندهم كيحسسوها بحال كانت فموعد غرامي ....
نورسين: غير خرج جبل سارة ل لافوار و مشيت معاهم كان غايصحاب ليا حتى نتوما غاتمشيو
سلمى : و مالنا حنا هما اولياء امرك خرجي أ حبيبتي و فوجي مع راساتك تنساي الهم و الغم
أنت تقرأ
جبل نورسين 🇲🇦 (مكتملة )
Romansaيعقوب : حتى انا اخويا دزت من الحب من طرف واحد و لكن ماوصلتش ليك نتا المرحلة اللي وصلتي ليها ديال الحماق جبل: و راني حمق واش كانبان ليك بعقلي نورسين فين خلات ليا شي عقل بقا ساكت و سهى فالفراغ و قال بحرقة كأن قلبو اللي كيتكلم فهاد اللحظة ... جبل :...
